परमेश्वर खुश कराणे बाड़ी सेवा
13
1 त ए ट्यारेओ! अपफ बुच परेम त भाईचारा बड़ाई कइ रखे। 2 होर मेहमानी के सेवा पाणि करण न बिसरीए, किस कि ईं करणे बेलिए कतु जेईं अणजाणे अन्तर स्वर्गेदूती के सेवा पाणि किओ असी।a 3 तेन्हि कैदी विश्वासी के ईं ख्याल रखे, जीं तुस अपफ बि तेन्हि जोई साते जेहेल अन्तर असे। होर जे भुंजाओ असे, तेन्के बि ईं समझ कइ ख्याल रखे कि जीं तुसे भुंजाण लोओ असे।4 ब्याहे सोबी इज्जत करीण चहिए। त ब्याहे बछाण शुचु रखे, किस कि परमेश्वर नाजायज रिश्ता रखणे बाड़ी त गलत तरीके जुए जिसमे संमंध रखणे बाड़ी के पंची कता। 5 होर तुं मन अन्तर केसे चीजी लाछ न लौती। जे किछ बि तुसी केईं असु तेस अन्तर खुश बिशे, किस कि परमेश्वरे अपफ बोलो असु,
“अउं तुसी कदी छड़ ना देन्ता, होर ना तुसी कदी बिसरीन्ता।”b
6 तोउं त, अस विश्वास जोई नडर भोई कइ बोते,
“प्रभु में मदत करणे बाड़ा भो।
अउं ना डरता। मेह्णु में की बिगाड़ सकते?”c
7 जेन्हि तुसी परमेश्वरे वचन शुणाओ थिए, अपु तेन्हि खुश खबरी सेवकी याद करे; त विश्वासे लिए तेन्के जीण त कमे फल हेर कइ तेन्के ईं विश्वास करणे कोशिश करे। 8 यीशु मसीह ही, आज त जुग जुग तकर सेईंया असा। 9 तोउं त, होरे होरे अजीब प्रवचन शुण कइ यीशु पुठ विश्वास करण छड़ न दिए। खरु ई असु कि परमेश्वरे कृपाई बेलि हें मन ताकत मेओ लौती, ना कि खाणे पीणे चीजी के बेलि, किस कि खाणे पीणे नियम मानणे बाड़ी के तेन्हि नियमे बेलि कुछ फायदा न भुआ। 10 असी जे यीशु मसीह क्रूस पुठ मरा, जे शुचे कुण्ड पुठ हें भकत ईं असा। पर जे इस धरती तेस उगाही डेरे सेवा कते, तेन्हि तसे भकती कोई फायदा ना भुन्ता। 11 किस कि अपु त प्रजाई के माफी लिए जेन्हि जानवरी के लहु सुआ शुचे कुण्ड अन्तर बोडा पुजारा घिन एन्ता, तेन्के लाश दूर नी कइ जाईन्ती।d 12 तोउं त, यीशु बि अपु लहु बहाई कइ शेहर केआं बाहर मरा, ताकि तसे लहुए बेलि मेह्णु शुचे करियेल। 13 तोउं त चले, अस बि बाहर तेस केईं घेन्ते, ताकि अस बि तेन्हि बेज्जती सीढ़ुं, जे तेन सीढ़ो थी। 14 किस कि इस धरती पुठ हें कोई अमर शेहर नेईं, बल्कि अस त तेस शेहर भाड़ण लगो असे, जे परमेश्वर केईआं एणे बाड़ा असा। 15 त चले, अस यीशु बेलि लगातार परमेश्वर जे धन्यवाद देणे बाड़ी भकत चढ़ान्ते। से भकत ई भो कि असी अपु मुंहे बइ तसे नओं नेन्ते रेहण। 16 होरी के भलाई करण त तेन्के जरूरते चीजे देण न बिसरीण, किस कि परमेश्वर एसे ईं भकती बेलिए खुश भुन्ता।
17 तुस अपु मुखिये के केहणा माने त तेन्के वश अन्तर बिशे, किस कि तुस तेन्के जिम्मेबारी भो त तेन्हि बि लेखाजोखा देण एन्ता। तोउं से अपु कम खुशी जोई कते, ना कि यक भरोठ समझ कइ। किस कि अगर तीं कते त तुं कोई फायदा न भुन्ता।
18 अस जाणते कि हें अन्तरात्मा साफ असी। होर अस हर यक बोक अन्तर इज्जत जोई जिन्दगी जीण चहन्ते। त हें लिए प्रार्थना कते रिहे। 19 पूरे दिल जोई प्रार्थना करण जे अउं तुसी दुबारी तोउं समझाण लगो असा, ताकि अउं फि झठ तुसी केईं वापस एई बटुं।
अशुश प्रार्थना
20 त अभेईं, जे परमेश्वर, ढडुड़ के बोडा पुहाल हें प्रभु यीशु मसीह, अपु अमर जुबानी लहुए ताकती बेलि, मरो तेन्हि अन्तरा दुबारी जीआ, से तुसी शान्ति दिए। 21 होर से तुसी तसे इच्छा पूरी करणे लिए सोबी भली गुणी बइ भर छड़े। जे किछ तस खरु लगतु, से यीशु मसीहे बेलिए तुं अन्तर घिए। तसे महिमा जुग जुग तकर भुन्ति रिहे।
आमीन!
अखिरि बोके त नमस्कार
22 ए ट्यारेओ! अउं तुं छनेअरे कता कि तुस में उपदेश लाह जोई शुणिण दिए, किस कि मेईं तुसी जे चिट्ठि अन्तर थोड़ु भइ लिखो असु। 23 अउं तुसी जे यक बोक बतान्ता कि हें भाई तिमुथियुस जेहेल अन्तरा छूट गो असा। होर अगर से झठ एई घियाल त अउं तेस जोई साते तुसी केईं एन्ता। 24 विश्वास अन्तर अपु सोबी मुखिया त शुचा मेह्णु जे नमस्कार बोले। इटली देश केईआं अओ भाई तुसी जे नमस्कार बोते। 25 तुसी सोबी पुठ परमेश्वरे कृपादृष्टि भुन्ति रिहे।
आमीन!