अखिरि बोके त नमस्कार
(12:1—13:25)
परमेश्वरे अपु गभुर समझाणे तरीका
12
1 त किस कि बदेई के ईं हें चोहरो कना एन्हि मेह्णु के उगाही के अत हुसुड़ा लगो असा, त एईए, असी हर यक तेन्हि लुन्जयारी बोके त पाप, जे असी अराम जोई अपु जाल अन्तर फसान्ते, तेन्हि दूर फटाई छते। होर यीशु मसीह पुठ ध्यान लाई कइ, लाह जोई तेस दौड़ अन्तर दौड़ते, जेस अन्तर असी दौड़ुण असु। 2 होर चले, हें विश्वासे मालिक त हें विश्वास सिद्ध करणे बाड़ा, तेस यीशु मसीह पुठ अस अपु नजर टगाई रखते। तेन तेस खुशी लिए जे तसे अगर थी, लजीणे कोई परवाह न कर कइ क्रूस पुठ मर गा त अब परमेश्वरे सिंहासने देहणा कना इज्जते बाड़ी जगाई घेई बिशा। 3 तोउं त, तेस पुठ ध्यान करे, जेन पापी त गलत करणे बाड़े मेह्णु के अत कष्ट सीढ़े, ताकि तुस उदास भोई कइ विश्वास करणे हिम्मत न हार छड़ियेल। 4 तुस पापे त गलत करणे खिलाफ लड़ाई करण लगो असे। पर एतु बि नेईं लगो कि तुस लहुलुहान भोई गो असे। 5 कि तुस धरमे कताबे तेस उपदेश बिश्री गो असे ना, जे परमेश्वरे अपु गभुर मान कइ तुं धे दुतो थिआ?“ए में कोईया! प्रभु जड़काण बेकार न समझ,
होर जपल से तोउ डराल त लाह जोई बिश।
6 किस कि प्रभु तेन्हि डरान्ता, जेन्हि जोई से परेम कता।
होर जे तेन अपु गभुर के ईं समझो असे, तेन्हि सज्जा बि देन्ता।”a
7 त तुस दुख तकलीफ तसे डराण समझ कइ सीढ़िण दिए। परमेश्वर तुसी जुए तिहांणि कता, जीं बोउ अपु गभुर जोई कता। भला ईं कोउं गभुर असु, जेसे बोउ तस डरान्ता नउ? 8 समझान्ते, लोडीयान्ते त सोब, पर अगर तुस लोडीयेल त समझियेल नउ, त ना तुस तेन्के अपु, होर ना से तुं। 9 होर, अगर अस हें मतोके बोउए इज्जत कते, जे असी लोडीयान्ता, समझान्ता, त अस अपु स्वर्गे बोउ परमेश्वरे वश अन्तर बिश कइ जिन्दगी जी न बटते ना? 10 इस मतोके बोउ त हें किछ रोजे जिन्दगी लिए अपु समझ हेसाब जुए लोडीयान्ता, समझान्ता। पर परमेश्वर त हें अमर फायदे लिए कता, ताकि अस बि तसे ईं शुचे बण घियेल। 11 लोडीयांण, समझाण तेस टेम खरु ना, बल्कि दुख देणे बाड़ु लगतु। पर जे एसे बेलिए शिच घेन्ते, से पता अपु जिन्दगी धरम त शान्ति जुए जीन्ते।
12 तोउं त, तुं आत्मा जे कमजोर त सुस्त भोई गो असी, तस विश्वास अन्तर ताकतवर बणाण दिए। 13 त परमेश्वरे इच्छाई मुताविक जीण दिए, ताकि तुसी हेर कइ जे विश्वास अन्तर लटी गो असे, से सुसुर भोई सकियेल।
परमेश्वरे समाणि समोझि कइ बिशुण जे उपदेश
14 सोबी जुए उई मी कइ बिशे त शुची जिन्दगी जीणे कोशिश करे, किस कि जे शुची जिन्दगी न जीन्ता, से कदी परमेश्वर हेर ना बटता। 15 चौकाने बिशे कि तुसी बुचा कोई बि परमेश्वरे छतरछाया केआं दूर ना भुओल। होर अपफ बुछ केसे बि नराज ना करे। तसे असर सोबी पुठ भुन्ता त तुस खराब भोई घेन्ते। 16 खबरदार बिशे कि तुसी बुचा कोई बि ना गलत तरीके जुए जिसमे संमंध रखियेल, होर ना अधर्मी बणियेल जीं एसाव थिआ। तेन त अपु हकदार भुणे हक बि यक डंगे खाण जे बेच छो थिआ।b 17 तुस त जाणते कि पता जपल तेन अपु बोउ इसहाक केईआं रोल रोल कइ बि हकदार भुणे अशुश पाण चही, तोउं बि तस न मेई, किस कि तसे मन बदलियेरा नेओथ।
18 तुस तेस फाट केईं नेईं अओ, जेस तुस छुई बटते। पेहले जपल इस्राएले मेह्णु तठि अओ थिए त तठि सुआ आगे टह्नु थिआ। तस पुठ का बदेए, अन्हु, होर चोहरो कना तुफान थिआ।c 19 तठि रेशमि अवाज भुण लगो थी, होर परमेश्वरे ईं बोके की कि शुणणे बाड़ी भे घेई गई त परमेश्वर जे बोलुण जे तेन्हि मूसे छने की कि से अब तेन्हि जुए हउ बोके न करे। 20 किस कि परमेश्वरे ई निआंग दुतो थी,
“जानवर बि अगर एस फाट छुईयेल त
से घोड़िआई कइ मारण।”d
एन निआंगी से तीं डराओ थिए। 21 सच्चे बि, से घटना हेरण जे एती डरौणी थी कि मूसे बि बोलु, “अउं डर कइ ठरकता।”e पर तुस तेस सिनै फाट केईं नेईं अओ।
22 पर तुस तेस सिनै फाट केईं अओ असे, स्वर्गे तेस यरुशलेम शेहर केईं अओ असे,f जेठि परमेश्वर बिश्ता त अणगणे स्वर्गेदूत खुशी मनाण जे किठे भुओ असे। 23 तुस तेस परमेश्वर केईं अओ असे, जे सोबी के न्याय कता। तुस जेठे गभुर के ईं हक रखणे बाड़ी तेस सतसंग जे अओ असे, जेठि परमेश्वरे सिद्ध किओ धर्मी मेह्णु असे, जेन्के नओं स्वर्ग अन्तर लिखो असु। 24 तुस तेस यीशु केईं अओ असे, जे नोई जुबानी पंच भो। तुस तसे छिड़काओ लहु केईं अओ असे, जे हाबिले लहु केईआं बि सुआ भलु करणे बाड़ु असु।g
25 त तुस चौकाने बिश कइ परमेश्वरे निआंग माने, जे तुसी जुए बोक करण लगो असा। किस कि सिनै फाट पुठा जे बोक करण लगो थिआ, तस न मान कइ अगर कोई बच ना बटा त स्वर्गे निआंग न मान कइ अस कि बचणे उम्मीद कइ बटते ना? 26 तेस टेम परमेश्वरे अवाजे धरती हिलाई छो थी; पर अब तेन दुबारी सोह किओ असे कि “होर यक लिंगि अउं हिलान्ता! सद धरती ना, बल्कि अम्बर बि हिलाई छता।”h 27 “होर यक लिंगि” बोलुणे मतलब कि मतोके जे चीज हिलेईन्ती, से बड़ाओ चीज भुणे बझई जुए खतम भोई घेन्ति, ताकि जे चीज हिलेईन्ती नउ, से बणोरी रिहेल। 28 तोउं त, किस कि असी यक ईं राज्य मेण लगो असा, जे कदी न हिलेईन्ता, त एईए, असी परमेश्वरे धन्यवाद करुं त एस मौके हथ केईआं घेण न दिउं। असी ईं भक्ति त डर जोई परमेश्वरे पूजा अराधना करीण, जेसे बेलिए से खुश भुन्ता, 29 किस कि हें परमेश्वर भसम करणे बाड़ी आग भो।