कुलोसी शेहरे मेह्णु जे
प्रतिनिधि पौलुसे चिट्ठि
नमस्कार
1
1-2 ट्यारे कुलोसी शेहरे शुचे त विश्वासी भाई त भेणिओं! अउं जे परमेश्वरे इच्छाई बेलि यीशु मसीहे प्रतिनिधि बणो असा, अउं पौलुस त भाई तिमुथियुस तुसी सोबी जे नमस्कार कते।हें परमपिता परमेश्वरे कृपादृष्टि तुसी पुठ भुन्ति रिहे त शान्ति तुसी मेती रिहे।
आमीन
सतसंग जे पौलुसे धन्यवाद त दुआ
3-4 में ट्यारेओ, इ शुण कइ कि तुस यीशु मसीह पुठ विश्वास कते होर सम्हाई शुचे मेह्णु जोई परेम कते, अस तुसी जे रोज दुआ कर कइ परमपिता परमेश्वरे धन्यवाद कते रेहन्ते। 5 तुं विश्वास त परेम इ हरालता कि स्वर्ग पुठ जे अशुश तुसी जे असी, तस पुठ तुसी जब्बर उम्मीद रखो असी, जेसे बारे तुसी खुश खबरी बेलि शुणो थिउ। 6 खुश खबरी बेलिए जीं पूरे धरती अन्तर मेह्णु अपु अपु जीण बदलाण लगो असे, तीं जपल केआं खड़ी तुसी खुश खबरी पुठ विश्वास किओ असा, तुं जीण बि बदलीण लगो असु, किस की तुसी परमेश्वरे सच्ची कृपादृष्टि पिछाणो असी। 7 तुस एसे बारे हें ट्यारा साथी त मसीहे यकीन लेएक सेवक भाई इपफ्रास केआं शिचे।a 8 जे परेम शुची आत्माई तुन्धे होरी जोई परेम करण जे दुतो असा, तसे बारे बि तेन असी जे बोताउ। 9 त जिखेईं केआं असी इ शुणो असु, तुसी जे प्रार्थना करण केआं अस नेईं रुको। अस विनती कते कि तुसी शुची आत्माई बेलि सम्हाई बुद्धि त ज्ञान जुए परमेश्वरे इच्छाई ठीक ठाक पता लगो लौता। 10 ताकि तुस प्रभु खुश भुणे लेएक जीवन जी बटियेल, त हर यक अब्बल अब्बल कमी के फले बेलि परमेश्वर खुश कइ बटियेल त तसे ज्ञान अन्तर हउ बि बधियेल। 11 अस इ बि प्रार्थना कते कि परमेश्वरे बोडी ताकती बेलि तुस ईं ताकतवर बणे कि कष्ट अन्तर बि सुआ धीरज त बोडी खुशी जुए तेस सीढ़ बटियेल। 12 तेस परमपिता परमेश्वरे धन्यवाद करे, जेन अस इस लेएक बणाए कि अस बि तसे तेन्हि शुचे मेह्णु जोई हकदार बणुण जे टगड़ियार अन्तर जीन्ते।b 13-14 तेन हें सम्हाई पाप माफ कर कइ, अस अन्हारे अधिकारी शैतान केआं बचाए, त टगड़ियारी राज्य अन्तर मतलब अपु ट्यारे कोईये राज्य जे नीए।c
सोबी केआं मसीह बोडा
15 परमेश्वर केसे बि ना केता। पर तसे कुआ यीशु मसीहे असी परमेश्वर हराला। एईएं सोबी सृष्टि पुठ बोडा त पेहला भो। 16 किस कि परमेश्वर तसे बेलि स्वर्गे या धरती, केणे बाड़ा या ना केणे बाड़ा, राज त राजगद्दी, हक, शक्ति सम्हाई बणाई, ताकि एन्हि सोबी के बेलि यीशु मसीहे महिमा भो। 17 किछ बि बणुण केआं पेहले से थिआ त तसे बेलि ईं सम्हाई कुछ सुसुर बिश्ते। 18 सेईंया जिसम मतलब सतसंगे मगिरि ईं असा। त सेईंया जेठा कुआ भो, मरो तेन्हि अन्तरा दुबारी जीणे बाड़े बुछ पेहला भो। तोउं त से सोबी पुठ बोडा अधिकारी भो।d 19 किस कि परमेश्वर जे ई खरु लगु कि अपु सम्हाई गुण त हक यीशु मसीह अन्तर रिहे। 20 त तेन क्रूस पुठ अपु जान दी कइ सम्हाई भुमण अपफ जुए मिआ, चहे से स्वर्गे भो या धरती भो।e
21 पेहले तुस बि परमेश्वर जे अणजाण त दुश्माणे ईं थिए, किस कि तुं सोच त कम तसे इच्छाई खिलाफ थिए। 22 तोउं बि अभेईं तेन मसीहे जिसम अन्तर मरणे बेलि अपफ जुए दुबारी मिआ, ताकि तेन तुस शुचे त बजन कोई दोषे त ना कोई दाग धब्बे बणाई कइ अपफ जे तेयार करियाल। 23 ई तपल भोई सकतु जपल तुस अपु विश्वास जब्बर टाइ रख कइ टिग बिश्ते त खुश खबरी अन्तर, जेस उम्मीदे बारे तुसी शुणो असु तस कदी ना छते। एस खुश खबरी सोबी मेह्णु के अगर प्रचार भुण लगो असा त अउं पौलुस असे प्रचार करण जे सेवक बणो असा।
सतसंगे सेवक पौलुस
24 त जे कष्ट अउं तुसी, गैर यहूदी विश्वासी जे सेहन्ता तस जे खुश असा। किस कि मसीहे जीं कष्ट सेहा, तीं तसे जिसम, सतसंग बि कष्ट सेहण एन्ता।f इस बझई जुए अउं सतसंग जे अपु बंटि कष्ट सेही कइ तस पूरा करण लगो असा। 25 त परमेश्वरे खुश खबरी प्रचार करणे जिम्मा मेन्धे दी कइ तेन अउं सतसंगे सेवक बणा। 26 जुग जुग त पीढ़ी पीढ़ी तकर खुश खबरी बोक मेह्णु केआं नियको थी, पर अभेईं परमेश्वर अपु तेन्हि शुचे मेह्णु जे तसे राज खुलो असा। 27 तेन चहु कि शुचे मेह्णु ई पता लगो लौता कि तसे खुश खबरी अन्तर जे नियको बोक असी, से सम्हाई मेह्णु जे कती बोडी फायदा बाड़ी असी। से बोक ई असी कि मसीह हें अन्तर बिश्ता त तसे बेलि ईं अस सम्हाई परमेश्वरे हकदार बणो असे। 28 मेह्णु के अगर अस मसीहे बारे प्रचार कते। अस हर यक मेह्णु समोझियेर छते त सम्हाई बुद्धि जुए सोबी शिचालते, ताकि अस सोबी जेईं विश्वास अन्तर ताकतवर बणाई कइ परमेश्वरे अगर पेश कइ बटियेल। 29 तोउं त परमेश्वरे दुतो तेस शक्ति जुए, जे में अन्तर कम करण लगो असी, तेस बेलि अउं पूरा मन त शक्ति लाई कइ सुआ कष्ट कता।