4
1 तोउं त, में ट्यारे भाई त भेण, जीं मेईं बोलो असु तीं प्रभु पुठ विश्वास अन्तर बस घिए। तुस मोउं खुशी देन्ते। तुस तेस मुकुटे ईं असे जे मोउं अपु कमे लिए प्रभु केआं मेओ असा। तुस मोउं तीं ट्यारे असे त अउं तुसी जोई मीण चहन्ता।फिलिप्पी शेहरे मेह्णु बधरेणे बोके
2 अउं यूओदिया त सुन्तुखे भेणि समझान्ता कि दुहे जेईं बणिण दिए किस कि तुस प्रभु पुठ विश्वास कती। 3 ए में सच्चा साथीआ! अउं तें छनेअरे कता कि एन्हि जिल्हाणु के अणबण मुकाण जे मदत कर। किस कि एन्हि मोउं जुए, क्लेमेंस त में होरे साथी जुए खुश खबरी प्रचार करण अन्तर तीं कम किओ थिउ। एन्के नओं परमेश्वरे अपु कताब अन्तर लिख छो असु, जेस अन्तर तेन्हि मेह्णु के नओं असे, जेन्हि केईं अमर जीवन असा।
4 खुशी मनान्ते रिहे किस कि तुस परमेश्वरे भिन्थ। अउं दुबारी बोता कि खुशी मनान्ते रिहे! 5 सम्हाई जेईं हराली छड़े कि तुं अन्तर कत दाह त परेम भरिए असा, किस कि प्रभु झट एण लगो असा। 6 केसे बोक पुठ बि स्यापा ना करे। बल्कि हर यक हाल पुठ धन्यवाद जुए परमेश्वर अगर प्रार्थना त विनती करे। 7 तोउं, परमेश्वरे से शान्ति जे हें समझ ना एन्ती, तुं मन त ध्यान सही सलामत रखता, किस कि तुस मसीह जुए मिओ असे।
8 त में ट्यारे भाई त भेणिओं! अउं चहन्ता कि जे कुछ बि सच्चाई असी, इज्जतदार असे, सही असे, शुचा त अब्बल असे, जे जे बि खरे असे त तारीफ लेएक असे, तुस तसे बारे सोचते रिहे। 9 मोउं केआं तुसी जे किछ बि शिचो असु, अउं करण काओ असा, त शुणो असु, से सम्हाई रोज कते रिहे। तोउं शान्ति देण बाड़ा परमेश्वर तुसी जुए भुन्ता।
चन्ना देणे बाड़ी जे धन्यवाद
10 सुआ रोज पता में बारे सोच कइ किछ मदत करणे जे तुसी हउ यक मौका मेईंया। इस बझई जुए अउं तीं खुश भोई कइ प्रभु धन्यवाद कता। मोउं पता असा कि तुस शुरुवात केआं ईं में बारे सोचते रेहन्ते, पर तुसी मौका नेओथ मेओ। 11 ई ना सोचे कि अउं अपु गरीबी बझई जुए ईं बोलुण लगो असा। पर ना, मेईं हर हाल अन्तर खुश भोई कइ बिशुण शिचो असु। 12 चहे गरीबी अन्तर, चहे अमीरी अन्तर, चहे रज्जि भोल, चहे ढुका भोल, चहे खरे ठाट जुए, चहे नगा, मेईं हर हाल अन्तर खुश भोई कइ जीण शिचो असु। 13 जे मोउं ताकत देन्ता, से मसीह भो। तेसे बेलि अउं हर हाले सामणा कइ बटता। 14 तोउं बि में कष्ट अन्तर तुसी मोउं जे चन्ना लंघाई कइ खरु किउ।
15 फिलिप्पी शेहरे भाई त भेणिओं! तुसी याद असु ना जपल अउं मकिदुनिया राज्य अन्तर पेहली बार खुश खबरी प्रचार कर कइ गा त तुसी छड़ दी कइ होर केनि बि सतसंगे मेन्धे चन्ना ना दिता। 16 हांलाकि जपल अउं थेस्सलुनीका शेहर अन्तर थिआ, तपल बि तुसी यक लिंग ना, बल्कि दुई दुई लिंगि मोउं जे किछ लंघो थिउ। 17 ई नेईं कि अउं तुसी केआं चन्ना चहन्ता, पर अउं चहन्ता कि तुं चन्ने बेलि परमेश्वर तुसी तीं अशुश दिए। 18 अभेईं में जरूरत जे मोउं सुआ मेओ असु त मोउं केईं डट कइ असु। इफ्रुदितुस केईआं तुसी जे चन्ना लंघो थिआ, तसे बेलि अउं रज्जि भोई गो असा। से चन्ना परमेश्वरे लेएक तस खुश करण जे यक अब्बल मुश्कदार भकत ईं असा। 19 में परमेश्वर अपु बेहिसाब अमीरी जुए यीशु मसीहे बेलि तुं हर यक जरूरत पूरी कता। 20 हें परमपिता परमेश्वरे इज्जत त महिमा जुग जुग भुन्ति रिहे।
इहांणि भो लौतु!
अखिरि बोके त नमस्कार