फिलिप्पी 3

मसीह जाणणे मुल

1 त में भाई त भेणिओं! खुशी मनान्ते रेह किस कि अस परमेश्वरे भिन्थ। जे जे बोक मेईं पेहले तुसी जे बोलो थी तोउं बि तस घड़ी घड़ी लिखुण जे अउं कोई परवाह ना कता, किस कि तेन्के बेलि तुं विश्वास सही सलामत रेहन्ता। 2 तुस तेन्हि दुष्ट मेह्‍णु केईआं खबरदार बिशे जे बोते कि परमेश्वरे गभुर भुण जे रीति रिवाज जुए खतना कराण जरूरी असा। एन्हि कुतरेउ हेर दूर बिशे। 3 अस से भिन्थ जे परमेश्वरे सच्चे गभुर भो, किस कि अस परमेश्वरे आत्माई मदते बेलि तसे अराधना कते त यीशु मसीह असी बचाण जे किओ कम पुठ रोभ लान्ते। अस रीति रिवाज पुठ भरोसा ना कते। 4 अगर रीति रिवाज पुठ भरोसा करणे बोक असी त अउं बि अपु भरोसा रख बटता, किस कि मोउं केईं बि सोबी केआं ज्यादा तेन्हि पुठ भरोसा करणे बझह असी। 5 भरोसा करणे बझह असी कि मूसे दुतो नियम हिसाब जुए में खतना अठूं रोज भुआ। अउं यक इस्राएली भो। अउं बिन्यामीने ऊड़ी अन्तर जमो असा त में जिसम अन्तर पुरखी के साफ लहु असु। अउं फरीसी दले यक मेह्‍णु थिआ, जे बड़े ध्यान जुएई सम्हाई नियम मानतेथ। 6 में धरम मोउं एत ट्यारा थिआ कि अउं मसीहे सतसंग भुंजान्‍ताथ त नियम मनण अन्तर अउं यकदम धर्मी थिआ। 7 मोउं लगतुथ कि ए सोब मोउं जे फायदामन्द असु। पर अभेईं मोउं लगतु कि मसीह जाणणे लिए असे कोई फायदा नेईं। 8 आं! में प्रभु यीशु मसीह जाणण अन्तर जे अनमोल अशुश असी, तस सामणि सद से सोब नेईं जे मेईं बोलो असु, बल्कि बाकी सोब किछ बेकार असु। मेईं त अपु सम्हाई किछ गन्‍द-फन्‍द समझ कइ मसीहे खातिर छड़ दुतो असु, ताकि अउं तस अपु बणेउ। 9 त अउं मसीह जुए मिउं। तोउं त, अभेईं मोउं पता लगो असा कि नियम मानणे बेलि अउं परमेश्वरे अगर धर्मी ना बणता, बल्कि यीशु मसीह पुठ विश्वास करणे बेलि धर्मी बणता किस कि परमेश्वर ईं असा जे असी धर्मी बणान्ता अगर कोई मसीह पुठ विश्वास कराल त। 10 अउं मसीह सुसुर जाणण चहन्ता। अउं तसे दुबारी जीणे ताकत अपु जिन्‍दगी अन्तर मेहसुस करण चहन्ता, त अउं मरुण तकर बि तसे ईं कष्ट सीढ़ण चहन्ता। 11 ताकि मरण केआं दुबारी जी बटियाल। 12 अउं ईं बोलुण नेईं लगो कि अउं इस पुठ कमियाब भोई गो असा, त परमेश्वरे अगर सिद्ध भोई गो असा। पर अउं यीशु मसीहे ईं भुण जे जब्बर कोशिश करण लगो असा, किस कि एसे खातिर तेन अउं चुणो असा।

13 ए भाई त भेणिओं! मोउं ना लगतु कि अउं पूरा तसे ईं बणि गो असा। पर अउं यक कम कता कि पुराणि बोके जे घेई गो असी, तस बिसिर कइ जे में अगर असा तस कना छेड़ा देन्ते घेण लगो असा। 14 अउं यक खिलाड़ी ईं निशाणी पतूं दौड़ुण लगो असा, ताकि मोउं से ईनाम मेईंयाल जे परमेश्वर मेन्धे देन्ता। से ईनाम स्वर्ग अन्तर अमर जीवन असा। तस देण जे तेन अउं भिहो असा, किस कि अउं यीशु मसीह पुठ विश्वास कता।

15 त चले, अस जे विश्वास अन्तर सिद्ध भोई गो असे, में पेहले बोलो बोकी के ईं सोचते। अगर तुसी बिचा कोई होरा ईं सोचता त परमेश्वर तस समझान्ता। 16 पर जेस सच्चाई परमेश्वर असी पता करवा तसे हिसाब जुए जीण लौतु

17 ए ट्यारेओ! अपु अपु लियागत त चाल चलण में ईं त तेन्के ईं करे, जे हें शिक्षा मान कइ जीन्ते। 18 किस कि सुआ मेह्‍णु के चाल चलण मसीहे खिलाफ असा, जेन्के बारे मेईं तुसी घड़ी घड़ी बोलो थी। अउं अभेईं बि रोलते रोलते बोता कि से मसीहे दुश्माण असे किस कि से क्रूस पुठ तसे मरणे कोई कदर ना कते। 19 परमेश्वर तेन्हि सज्जा दी कइ मुकाई छता, किस कि से अपु जिसमे इच्छाई वश अन्तर असे। से सम्हाई बेशर्मी कमी पुठ रोभ किढ़ते। तेन्हि अपु अपु मन सद इस धरती चीजी पुठ लोओ असे। 20 पर अस जे मसीह पुठ विश्वास कते, जेठि बिश्ते से स्वर्ग भो। अस प्रभु यीशु मसीह, हें बचाणे बाड़ा तठिआ दुबारी एणे बोडी बेशब्री जुए भाड़ते। 21 से मरणे बाड़ा हें मनखे जिसम बदिल कइ तसेरी ईं जिसम बणान्ता जे कदी न मरता। तस केईं सम्हाई किछ अपु वश अन्तर करणे ताकत असी। तेस ताकती बेलि से हें जिसम अपु ईं बणान्ता।