मसीहे बेलि मेओ अपु अजादी बचाई रखे
5
1 त ए भाई त भेणिओं! मसीह अस नियमे वश केआं छुड़को असे, त सावधान बिशे कि दुबारी तेसे गुलामी ना करे। 2 शुणे! अउं पौलुस बोता कि अगर तुस परमेश्वरे सामणि धर्मी बणण जे खतना कते त मसीहे मरुण त दुबारी जीण केआं तुसी कुछ फायदा नेईं। 3 अउं हउ बि बोता कि परमेश्वर खुश करण जे अगर नियम मनी कइ खतना कते त तुसी मूसे दुतो सम्हाई नियम मनणे एन्ते। 4 त अगर कोई नियम मान कइ परमेश्वरे सामणि धर्मी भुण चहन्ता त से मसीह त तसे किओ बचाणे कम केआं अपफ दूर रखो असा। 5 पर, अस शुची आत्माई बेलि उम्मीद कते कि मसीह त तसे किओ कम पुठ विश्वास करणे बेलि परमेश्वर असी धर्मी मानता। 6 किस कि जपल कोई मसीह यीशु पुठ विश्वास कता त तस खतना भुणे या ना भुणे कोई मुल नेईं। सद विश्वासे मुल असा जे परेमे बेलि अपफ हरालता।7 यीशु पतोती त तुस सुसुर घेण लगो थिए, त तुस केन खाई छड़े? 8 परमेश्वर त ई ना कता! तेन त तुस अपु पतोती घेण जे भिहो असा। 9 मेह्णु के शिक्षा जीं टाक असी, जे बेशक धिक भइ भुन्ति, पर थोड़ी देर अन्तर सम्हाई आटा टकाण छती।a तीं तेन्के शिक्षा बि सम्हाई खराब कइ छती। त तुस कशि कइ बिशे। 10 परमेश्वर पुठ में पूरा यकीन असा कि तुस कोई होरी शिक्षा ना मानते। त चहे, से कोई बि भोल, परमेश्वर तस जरूर सज्जा देन्ता, जे तुसी होरी होरी शिक्षा देन्ता।
11 ए में भाई त भेणिओं! मेईं त तुसी जे कदी खतना करण जे नेईं बोलु! अगर अउं खतना करणे प्रचार कताथ त अभेईं तकर यहूदी मेह्णु अउं ना भुंजान्तेथ त मसीहे क्रूसे बेलि जे अजादी असी, तसे खिलाफ कोई ना भुन्ताथ। 12 में त मन कता कि काश ए जे तुसी खतना करण जे शिचालते, से अपु अपु पूरा लिंग कटी कइ फटाई छतेथ।
13 ए भाई त भेणिओं! परमेश्वरे तुस खुल कइ जीण जे भिहो असे। पर खबरदार बिशे कि जे छूट तुसी परमेश्वर केईं मेओ असी, तसे बेलि तुस अपु अपु जिसमे बुरी इच्छा पूरा ना करे, बल्कि परेम जुए यकी होरी सेवा करे। 14 किस कि इस यके निआंग पुठ ईं त सम्हाई नियम मनी घेन्ति। से निआंग भो
“सम्हाई जुओई तुसी अपु बराबर परेम करण।”b
15 पर, अगर तुस अपफ बुच पलचिन्ते त यकी होरी दान्तियान्ते जीं कुतर कते, त हेरी बिशे कि यकी होरी ना मुकाई छड़े।
शुची आत्माई बेलि जीण
16 अउं त बोता कि शुची आत्माई दुतो नोउएं गुणे बेलि जीण दिए ताकि तुस अपु पुराणि गुणे बुरी इच्छा पूरी ना करियेल। 17 किस कि नोउएं गुण शुची आत्माई इच्छा पूरा करण चहन्ता त पुराणि गुण जिसमे इच्छा पूरी करण चहन्ता। ए गुण, नोउएं गुण खिलाफ कता रेहन्ता त तुसी खरे कम करण केआं रोकता। 18 त अगर तुस नोउआं गुण बेलि जीन्ते त तुस मूसे दुतो नियमे वश अन्तर नेईं रिहो। 19 तुसी त पता असा कि जे जिसमे इच्छाई वश अन्तर रेहन्ता, से की की कता। से नाजायज रिश्ता रखता, बेशर्मी कम कता त लूचपन अन्तर बिश्ता। 20 से मुर्तिपुजा कता, त खेचरो-भुचरो कर कइ मेह्णु दुख देन्ता, मेह्णु जुए बैर रखता, त झगड़ीन्ता। से होरी कमाई हेर जड़ता। से घड़ी घड़ी लेहेर किढ़ता। से हर अब्बल कमे खिलाफ भुन्ता, त मेह्णु बुच अणबण करान्ता, त मतलबी भुन्ता। 21 त होरे मेह्णु तस रशुणे लगते। से प्याकड़ भुन्ता त से मौज मस्ती अन्तर जीन्ता। एसे छड़, से हर किस्मे गलत कम कता। मेईं जीं पेहले बोलो थिउ, तीं अभेईं बि बोता कि ईं कम करणे बाड़ा परमेश्वरे राज्ये कदी भोई ना बटता।
22 पर नोउएं गुण जे शुची आत्माई बेलि असी मेता तसे बेलि अस परेम त खुशी जुए उई मी कइ बिश्ते। अस बोडे लाह रख कइ दाह जुए यक होरी मदत कते। हें मन अन्तर हर बेले शान्ति भुन्ति त अस सम्हाई अब्बल अब्बल कम कते, होर यकीन लेएक भुन्ते। 23 अस अपु इच्छा नोउएं गुणे वश अन्तर रखते त सम्हाई जेईं अराम जुए धरान्ते। इन्हि कमी के खिलाफ कोई नियम नेईं। 24 त जे यीशु मसीहे भो, तेन अपु जिसमे सम्हाई इच्छा त बुरी गुण पूरे मुकाई छउ असे। 25 त अगर अस शुची आत्माई बेलि जीन्ते असे त तसे इच्छाई मुताविक बि जीण असु। 26 त चले, अस इरुह रोभ ना किढ़ते, होरी तंग ना कते, त तेन्के बुरु ना सोचते।