4
1 अउं इ बोता कि हकदार बेशक पूरे जायेदादे मालिक भोल, तोउं बि जपल तकर से मठड़ असा, से यक नौखर ईं भुन्ता। 2 त अपु बोउए ठीक किओ टेम तकर से देखभाल करणे बाड़ी के वश अन्तर रेहन्ता। 3 तीं अस बि मसीह पुठ विश्वास करणे तकर मठड़ गभुर ईं थिए त मतोके रीति रिवाजे वश अन्तर कैद थिए। 4 पर जपल परमेश्वरे ठीक किओ टेम आ त तेन अपु कुआ लंघा, जे जिल्हाणु बेलि यक यहूदी टब्बर अन्तर जमा त नियमे वश अन्तर रेहा। 5 ताकि जे नियमे वश अन्तर कैद असे, तेन्हि से अपु जान दी कइ छुड़काल त परमेश्वर असी अपु गभुर बणाल। 6 त किस कि असa तसे गभुर भोई गो असे, त तेन अपु कोईये आत्मा असी केईं लंघो असी, ताकि अस बि तस “बोउ”b बोल कइ हक दियेल। 7 तोउं त, अस अब हउ गुलाम नेईं, पर तसे गभुर असे; त अगर गभुर असे त अस परमेश्वरे हकदार असे।गलाती इलाके मेह्णु जे पौलुसे चिन्ता
8 ए ट्यारेओ, तुस पेहले परमेश्वर न जाणतेथ। तुस नौखर ईं बण कइ तेन्के सेवा कतेथ जे सच्चे बि परमेश्वर नेओथ। 9 पर अभेईं त तुसी सच्चा परमेश्वर पिछाणो असा, बल्कि परमेश्वरे तुसी अपु गभुर बणो असे। त दुबारी किस से नकम्मे त बेकार मतोके रीति रिवाजे शिक्षा बेलि जीण चहन्ते? 10 तुस कुछ खास घड़ी, दन, मेहना त साल अन्तर पूजा त ब्रत रख कइ परमेश्वरे अशुश पाणे कोशिश कते। 11 मोउं त डर असा कि तुसी जे मेईं जे कष्ट किओ थिआ, से शयद बेकार भोई घेन्ता। 12 में ट्यारे भाई त भेणिओं! अउं तुसी जे हथ जोड़ता कि जीं अउं तुसी जे बजन कोई यहूदी धरमे नियम त रीति रिवाज बाड़ा बणो थिआ, तिहांणि तुस बि एन्हि छड़ कइ में ईं बणे।
तुसी में किछ बुराई ना की। 13 हांलाकि जिसमे कमजोरी जुए अउं पेहली बार तुसी खुश खबरी शुणाण जे अओ थिआ। 14 तुसी में जिसमे हाल हेर कइ बि अउं नीच ना समझा, बल्कि तुसी त अउं परमेश्वरे स्वर्गेदूत समझ कइ, बल्कि अउंए मसीह यीशु समझ कइ में खरी सेवा की। से त तुं परीक्षा थी। 15 अउं त इस बोके बि उगाह दी बटता कि अगर तुसी जे ए मुमकिन भुन्ताथ त तुस मेन्धे अपु टीर बि किढ़ कइ देन्तेथ। त तुं से खुशी त परेम को गा? 16 तुसी जे सच्चाई बोलुणे बेलि कि अउं तुं दुश्माण बणि गा ना, आं? 17 परमेश्वरे अगर धर्मी बणुण जे, जे तुसी मूसे दुतो सोबी नियम मनण जे शिचालते, से तुं मितर बणुण त चहन्ते, पर तेन्के मतलब कुछ होरा असा। से त मोउं त तुसी अलग करण चहन्ते ताकि तुस तेन्के मितर बणे। 18 चले, अगर कोई तुं छेड़ि ढचते त ठीक असु, पर तेन्के मतलब खरा लौता। अउं त चहन्ता कि तुस हमेशा में ढिएड़ी मारी बणे, सद तपले ईं नेईं, जपल अउं तुसी जुए भुन्ता, पर हमेशा। 19 ए में गलाती इलाके ट्यारे गभुरुओ! जपल तकर तुस मसीह पुठ विश्वास अन्तर बसी ना घियेल, जीं गभुरवाल जिल्हाणु शुले एन्ती, तीं तुसी जे मोउं बि एण लगो असी। 20 मन त कता कि अभेईं अउं तुसी जुए भुन्ताथ त धिक परेम जुए बोक कताथ। पर की करुं? तुं बारे मोउं स्यापा भुण लगो असा।
हाजिरा त सारा
21 गलाती इलाके तुस सम्हाई! जे नियमे वश अन्तर जीण चहन्ते, मोउं जे बोलीण दिए, तुसी कि पता नेईं ना मूसा दुतो नियम की बोता? 22 नियम त इ बोता कि अब्राहम दुई कुआ जमो थिए। यक त नौखराणि हाजिरा केआं,c त होरा अपु जुएली सारे केआं,d जे नौखराणि नेओथ। 23 जे कुआ नौखराणि केआं जमो थिआ, से मेह्णु इच्छाई बेलि जमा, पर जे तसे जुएली केआं जमो थिआ, से त परमेश्वरे दुतो जुबानी बेलि जमा।e 24 इन्हि दुई जिल्हाणु जीं दुई जुबान असी। यक त सिनै फाट केईआं थी, जे कि तेस नौखराणि हाजिरा ईं सद नौखर जमाणती। 25 आजकण यरुशलेम शेहर बि तेस हाजिरे ईं असा किस कि यरुशलेम शेहरे मेह्णु बि मूसे दुतो नियमे गुलामी अन्तर असे। हाजिरा त यरुशलेम शेहर जीं अरब देशे सिनै फाटेf ईं असे। 26 पर दोकी जुबान स्वर्ग पुठि तेस यरुशलेम शेहरे ईं असा, जे सारा ईं अजाद गभुर जमाणती। से नौखराणि नेओथ त अस जे विश्वास कते तसे गभुर भिन्थ। 27 किस कि धरमे कताब अन्तर लिखो असु कि
“ए जिल्हाणुआ, तु जे शन्हि असी, खुशी मना!
तु जेस कदी शुले नेईं ओ, लियार दी दी कइ खुशी मना,
किस कि तें गभुर तेस जिल्हाणु गभुर केआं बि सुआ असे,
जे अपु धाणि जुए बिश्ति।”g
28 तोउं त, ए भाई त भेणिओं! तुस सारे कुआ इसहाके ईं परमेश्वरे जुबान बेलि जमो गभुर असे। 29 त जीं मेह्णु इच्छाई बेलि जमो गभुर परमेश्वरे दुतो जुबान बेलि जमो गभुर भुंजान्ताथ, तीं अस विश्वासी बि तेन्हि केआं कष्ट सेहन्ते रेहन्ते, जे मूसे दुतो नियम जुए शची गो असे।h 30 पर धरमे कताब बोती ईं कि “नौखराणि त तसे कुआ नशाण छड़, किस कि नौखराणि कुआ, अजाद जिल्हाणु कुआ जुए हकदार ना बणता।”i 31 तोउं त, ए ट्यारेओ! अस नौखराणि ना, बल्कि तेस जिल्हाणु गभुर भिन्थ, जेसे धाणि असा।