यक होरी मदत करे
6
1 ए भाई त भेणिओं! फि बि अगर तुसी बुचा कोउं जेईं केस पाप अन्तर फसी गो असे त तुस जे नोउएं गुणे बेलि जीन्ते, तस बोडे अराम जुए समझाई कइ दुबारी विश्वासे जीण अन्तर मजबूत करे। तुस सद तसे ध्यान ना रखे, बल्कि अपु बि ध्यान रखे, ना त तुस बि तेस जाल अन्तर फस घेन्ते। 2 परेशानी त कष्ट अन्तर तुस यकी होरी मदत करे। ई करणे बेलि तुस मसीहे शिक्षाई हेसाब जुए जी सकते। 3 अगर कोउं अपफ जे बोडा समझता, पर असल अन्तर नेईं, त से अपफ धोखा देन्ता। 4 पर हर यक जेईं अपु अपु कम परखुण जरूरी असु, ताकि से होरी के कम हेर कइ ना, पर अपु कम हेर कइ खुश भुई घियेल त पूरे सच्चाई जुए रोभ किढ़ बटियेल। 5 किस कि सोबी अपु अपु कमे जिम्मेबारी नेणे जरूरी असी।6 ए ठीक भुन्तु कि जे तुसी परमेश्वरे वचने शिक्षा देन्ते, तुस तेन्के हर किस्मे मदत करे। 7 ई ना समझे कि तुस परमेश्वरे मखोल बणाई कइ बच घेन्ते; किस कि
साचे बुढ़े जिआणु सोबी जे असु।a
8 जे अपु जिसमे इच्छा पूरा करणे बिएजु बांता, से तसे फल कमजोरी त मरण कटता, त जे शुची आत्माई खुश करणे कमे बिएजु बांता, से तेस आत्माई बेलि अमर जीवन पान्ता। 9 त, चले! खरे कम करुण जे हिम्मत ना हारते। अगर अस हिम्मत ना हार कइ खरे कम कते रेहन्ते त सुसुर टेम पुठ परमेश्वर असी खरी ईनाम देन्ता। 10 तोउं त, जपल असी मौका मेओ असा, चले, सोबी जे भलाई कते, खास कइ तेन्हि जे, जे विश्वास अन्तर हें टब्बरे ईं असे।
अखिर शिक्षा त नमस्कार
11 हेरे, मेईं कीं बोडे बोडे अखर अपु हथे बइ लिखो असे। 12 जे तुसी खतना करण जे जोर देन्ते, से सद अपु नओं कमाण चहन्ते कि तेन कत मेह्णु के खतना कराई छड़ा। त से ना चहन्ते कि मसीह पुठ विश्वास करणे बझई जुए तेन्के यहूदी साथी तेन्हि भुंजाल। 13 ए खतना कराणे बाड़े अपफ त मूसे दुतो सम्हाई नियम ना मानते, पर से चहन्ते कि तुस नियम मान कइ अपु खतना करे, ताकि तुं जिसमे खतने बझई जुए से रोभ किढ़ बटियेल। 14 पर ईं कदी ना भुई सकतु कि अउं मसीह यीशु क्रूस पुठ किओ कम छड़ दी कइ किछ होरे पुठ रोभ किढ़ाल। एस बझई जुए त मतोक अब मोउं वश अन्तर कइ ना सकतु त में बि मतोके कोई कम करणे इच्छा नेईं।b 15 किस कि ई जरूरी नेईं कि केसे खतना भो असा, या नेईं भो। पर जरूरी असु कि से मसीहे दुतो नोउएं गुणे बेलि जी कइ नोई सृष्टि भो। 16 त जत मेह्णु ई बोक मान कइ जीन्ते, से परमेश्वरे सच्चे गभुरc बणते त परमेश्वरे शान्ति त दाह तेन्हि पुठ भुन्ति रेहन्ती
17 छने, मोउं हउ परेशान ना करे। पर हेरे कि मसीह यीशु जे में जिसम पुठ कत निशाण लगो असे।
18 में ट्यारे भाई त भेणिओं! हें प्रभु यीशु मसीहे कृपादृष्टि तुसी पुठ भुन्ति रिहे। आमीन।