प्रतिनिधि 9

शाऊले मन बदलीण

1 पर अपल तकर शाऊल अन्तर प्रभु चेली धमकाणे त मारणे भूत सवार थिआ। से बोडे पुजारे केईं गा, 2 त तेस केईआं दमिश्क शेहरे अराधनालये नओएं तस हक देणे बाड़ी चिट्ठि मगी, ताकि तेन्हि अराधनालय अन्तर अगर कोई यीशु बते बोक मानणे बाड़े भोल, त कि जिल्हाणु त कि मड़द, तेन्हि बन्हि कइ यरुशलेम शेहर जे अण्ह बटियाल।

3 तेन्हि चिट्ठि घिन कइ जपल से दमिश्क शेहरे भेएड़ पुजा त अजगता ईं अम्बर केआं तसे चोहरो कना बिजली चमकी। 4 से भीं झड़ गा त ईं अवाज शुणी, “ए शाऊला, ए शाऊला, तु मोउं किस भुंजान्ता?”

5 शाऊले बोलु, “तु कोउं भो, प्रभु?” तेन बोलु, “अउं यीशु भो, जेस तु भुंजान्ता। 6 पर अब तु खड़ भो त शेहर जे गा। तठि तोउ की करण असु, बताई घेन्तु।” 7 इस पुठ जे मेह्‍णु तेस जोई साते थिए, से हैरान रेही गे; किस कि तेन्हि अवाज त शुणी, पर कोई बि ना काआ। 8 तोउं शाऊल भींआ खड़ भुआ। पर जपल टीर उघाड़े त तस किछ ना केण लगु। तोउं शाऊले साथी तसे हथ टाइ कइ तस दमिश्क शेहर अन्तर घिन गे। 9 तठि टाई रोज तकर से अन्हा भोई कइ रिहा, होर तेन ना कुछ खउ, ना पिउ।

10 तेस दमिश्क शेहर अन्तर हनन्याह नओएं यक प्रभु विश्वासी थिआ। प्रभु तेस दर्शण दी कइ बोलु, “ए हनन्याह!” तेन बोलु, “आं, प्रभु।” 11 तोउं प्रभु तेस जे बोलु, “खड़ भो त तेस गहि अन्तर गा जे ‘सिधि’ बोलिन्ती। तठि यहूदे नओएं मेह्‍णु गी, तरसुस शेहरे शाऊले बारे पता कर। होर शुण, से अभेईं प्रार्थना करण लगो असा। 12 त तस दर्शण भुओ असे, कि हनन्याह नओएं यक मेह्‍णु तस केईं एन्ता त तेस पुठ हथ रखता; ताकि दुबारी तसे टीर सारी घियेल।”

13 पर हनन्याहे जवाब दिता, “ए प्रभु, मेईं एस मेह्‍णु बारे सुआ जेईं केआं शुणो असु कि एनि यरुशलेम शेहर अन्तर तें शुचे मेह्‍णु जोई की की बुरु किओ असु। 14 होर इठि बि एस मुख्य पुजारी हक दुतो असा कि जे मेह्‍णु तें नओं नेन्ते, तेन्हि सोबी बन्हि कइ नियाल।”

15 पर प्रभु तेस जे बोलु, “तु घेण दे; किस कि से त में चुणो भो, ताकि से में नओएं गैर यहूदी, राजी त इस्राएली मेह्‍णु के सामणि प्रचार करियाल। 16 होर अउं तेस हरालता कि में नओएं लिए तेस की की दुख सेहण एन्ते।”

17 तोउं हनन्याह खड़ भोई कइ तेस गी गा, त तेस पुठ अपु हथ रख कइ बोलु, “ए भाई शाऊला, इएर जे एन्ते टेम बथ जे प्रभु यीशु तोउ दर्शण दुतो थिआ, तेन अउं लंघाओ असा कि तु दुबारी हेर बटियाल त शुची आत्माई बेलि भरी घियाल।” 18 तिखेईंए तसे टीरी अन्तरा शोपट ईं किछ भीं झड़ु त तेस केण लग गोउ। तोउं से खड़ भुआ त हनन्याह से यीशु नओएं बेलि पुओणि अन्तर चुसा। 19 फिर रौठि खाई कइ तस टंगबल एई गा।

दमिश्क शेहर अन्तर शाऊल प्रचार करण

शाऊल कुछ रोजे लिए तेन्हि चेली जोई बिशा, जे दमिश्क शेहर अन्तर थिए। 20 त बजन वकत गवाणे से तठिआ होरे होरे यहूदी अराधनालय अन्तर यीशु बारे खुश खबरी शुणाण लगा कि सेईंए परमेश्वरे कुआ भो। 21 तसे सोब शुणणे बाड़े हैरान भोई कइ बोतेथ, “कि ए सेईंए मेह्‍णु न भो ना, जे यरुशलेम शेहर अन्तर तेन्हि खतम कइ छताथ, जे यीशु नओएं भक्ति कते? होर इठि बि ए तोउं अओ थिआ कि तेन्हि बन्ह कइ मुख्य पुजारे केईं घिन घियाल।” 22 पर शाऊल हउ बि ताकती बइ प्रचार कते गा। त सोबी यीशु ईं मसीह भुणे साबित कर कइ दमिश्क शेहरे यहूदी मेह्‍णु के मुंह जीं मुरुड़ दी छउ।

23 ईं कते-कुते जपल शाऊले सुआ रोज भोई गे त यहूदी मेह्‍णु मी कइ तेस मारणे मेझर किआ। 24 पर तेन्के मेझरे शाऊल पता लग गा। से त तेस मारणे लिए दन रात दुआरी पुठ पेहरा दी बिशतेथ। 25 पर रात तसे चेली से चाउं अन्तर किआ, त रेजुड़ी बइ शेहरे बाड़ि पुठि बइ ढनाई कइ उणिहां छड़ा।

यरुशलेम शेहर अन्तर शाऊल

26 तठिआ यरुशलेम शेहर अन्तर पूज कइ शाऊले विश्वासी जोई मिइणे कोशिश की; पर सोब तेस हेर डरतेथ, किस कि तेन्हि यकीन न भुन्ताथ कि से बि विश्वासी बण गो असा। 27 पर भाई बर्नबास से अपफ जोई साते प्रतिनिधि केईं नीआ त तेन्हि जे बोलु कि एन कीं बथ प्रभु काआ, त तेन एस जोई की बोके की। बर्नबासे ई बि बताउ कि दमिश्क शेहर अन्तर शाऊले कीं नडर भोई कइ यीशु नओएं खुश खबरी शुणाई। 28 तढ़िया पता से तेन्हि प्रतिनिधि जोई साते यरुशलेम शेहर अन्तर एन्ता घेन्ता रिहा त नडर भोई कइ प्रभु नओएं खुश खबरी शुणान्‍ताथ। 29 होर से यूनानी भाषा बोलुणे बाड़े यहूदी मेह्‍णु जोई बोक त बेहेस कता रेहन्ताथ; पर से बि तेस मारणे कोशिश करण लगे। 30 जपल विश्वासी भाई भेण तेन्हि बोकी पता लगा त से तेस कैसरिया शेहर घिन आए, तठिआ जहाज पुठ बिशाई कइ से अपु शेहर तरसुस जे लंघाई छड़ा।

31 तोउं सोब यहूदिया, गलील त सामरिया राज्य अन्तर सतसंग बाड़ी खरा चैन मेईंया, त तेन्के तरक्की भुन्ति रेही; होर सतसंग बाड़े प्रभु हेर डर कइ त शुची आत्माई दुतो शान्ति बेलिए बधते गे।

पतरस यक अदरंगे बीमार मेह्‍णु ठीक करण

32 तोउं भु ईं कि पतरस खुश खबरी प्रचार कते हर जगाई हंटता-फिरता रेहा। से तेन्हि विश्वासी मेह्‍णु केईं बि पुजा जे लुद्दा नओएं ग्रां अन्तर बिशतेथ। 33 तठि तेस एनियास नओएं यक अदरंगे बीमारी बाड़ा मेह्‍णु मेईंया, जे अठ साल केआं मन्जे पुठ रिहो थिआ। 34 पतरसे तेस जे बोलु, “ए एनियास! यीशु मसीह तोउ ठीक कता। खड़ भो, त अपु बछाण टड।” तोउं से तिखेईंए खड़ भोई गा। 35 त तेस हेर कइ लुद्दा ग्रांए त शारोन इलाके सुआ मेह्‍णु प्रभु कना जे खिरके।

पतरस यक मरो जिल्हाणु दुबारी जीआण

36 जोपा शेहर अन्तर तबीता नओएं यक विश्वासी जिल्हाणु बिश्तीथ। (जेसे यूनानी नओं “दोरकास” मतलब “हिरणी” असु)। से सुआ भले भले कम त दान कती रेहन्तीथ। 37 तेन्हि दिनि से बीमार भोई कइ मर गई; तोउं मेह्‍णु से सन्हुवाई कइ भखेरी रख छइ। 38 त किस कि लुद्दा ग्रां जोपा शेहरे भेएड़ थिआ, विश्वासी ईं शुण कइ कि पतरस तठि असा, दुई मेह्‍णु लंघाई कइ तसे छनेअरे किउ, “छने, हें भेएड़ एण जे चेरे न ला, झठ आई।” 39 त पतरस तेन्हि जोई साते घेई गा, जपल तठि पुजा त तेन्हि से तेस भखेरी जे नीआ जेठि से रखो थी। सोब विधवा जिल्हाणु रोलती तसे भेएड़ एई कइ खड़ खड़ बिश गई, होर जे कमीर त झिणे दोरकासे तेन्हि जोई साते बणाओ थिए, हरालण लगी। 40 तोउं पतरसे सोब जेईं बाहर लाई छड़े, त उटेऊ बिश कइ प्रार्थना की। होर लाशे कना जे हेर कइ बोलु, “ए तबीता, खड़ भो।” तोउं तेन अपु टीर उघाड़ छड़े; त पतरस हेर कइ खड़ भोई गई। 41 तेन हथ टाइ कइ से खड़ेरी, त विश्वासी मेह्‍णु त विधवा जिल्हाणु भिआई कइ से तेन्के हवाले कइ छइ। 42 एस बोकी पूरे जोपा शेहर अन्तर हू भोई गोउ; त सुआ जेईं प्रभु पुठ विश्वास किआ। 43 पतरस सुआ रोज तकर जोपा शेहरे शमौन नओएं यक चमारे गी बिशा।