प्रतिनिधि 10

रोमी सुबेदार कुर्नेलियुस दर्शण

1 कैसरिया शेहर अन्तर कुर्नेलियुस नओएं यक मेह्‍णु बिश्ताथ, जे इटलिनी नओएं पलटने सुबेदार थिआ। 2 से परमेश्वरे भक्त थिआ, होर तसे अपु पूरे टब्बरा परमेश्वर हेर डरताथ। से मेह्‍णु कें धे खुल कइ दान दक्षिणा देन्ताथ, त हर घड़ी परमेश्वरे प्रार्थना कताथ।

3 तेन यक रोज ब्यादली टेम कोई टाई बज दर्शण अन्तर हेरु कि परमेश्वरे स्वर्गेदूते तसे भेएड़ एई कइ बोलु, “ए कुर्नेलियुसा!” 4 तेन तसे धे हेरु त डर कइ बोलु, “ए प्रभु! की भु?” स्वर्गेदूते तेस जे बोलु, “तें प्रार्थना त दान परमेश्वरे याद किओ असे। 5 अब जोपा शेहर जे मेह्‍णु लंघाई कइ शमौन नओएं मेह्‍णु, जेस जे पतरस बोते, भिआण दे। 6 से शमौन चमारे गी मेहमान असा, जेसे घर समन्दरे औत पुठ असा।” 7 तोउं जपल से स्वर्गेदूत जे तेस जोई बोक करण लगो थिआ, घेई गा, त कुर्नेलियुसे अपु दुई नौखर, होर जे तेस सेवा करण जे भुन्तेथ तेन्हि सपाही अन्तरा यक भक्त सपाही भिआ। 8 होर तेन्हि सोब बोके समझाई कइ से जोपा शेहर जे लंघाए।

पतरस दर्शण

9 दोके रोजे जपल से हंटते हंटते शेहरे भेएड़ पुजुण लगो थिए, त दिसाई पतरस प्रार्थना करण जे लहाड़ि पुठ गा। 10 तेस ढुक लगो थी त से किछ खाण चहन्ताथ। पर जपल मेह्‍णु खांजे बणा लगो थिए त पतरस यक दर्शण भुआ। 11 तेन हेरु कि अम्बर खुल गा; तोउं यक बोडु चादुर उडुरतु धरती पुठ आउ। 12 होर तेस अन्तर मतोके हर किस्मी जानवर, कीड़ी के ईं घिशकिण देणे बाड़े जानवर त अम्बरे चड़ी चखुरु थिए। 13 तोउं तेन यक ईं अवाज शुणी, “ए पतरसा, खड़ भो! इन्हि बणाई कइ खाण दे!” 14 पर पतरसे बोलु, “ना प्रभु, कदी ना; किस कि मेईं कदी बि कोई जुठी त अशुची चीज नेईं खओ।” 15 तोउं तेन दुबारी ईं अवाज शुणी, “जे किछ परमेश्वरे अपफ शुचु किओ असु, तेस तु जुठु न बोल।” 16 टाई लिंगि इहांणि भु; तोउं तिखेईंए से चीज अम्बर अन्तर खड़िया नी छइ।

17 पतरस होता ई समझुण लगो थिआ कि ए जे दर्शण मोउं भुओ असे, एसे मतलब की भोई सकता। त हेरे, से मेह्‍णु जे कुर्नेलियुसे लंघो थिए, शमौने गीहे पता लाई कइ, तसे दुआर पुठ खड़ भोई गे। 18 तोउं हक दी कइ पुछुण लगे, “कि शमौन, जेस जे ‘पतरस’ बोते, तुं इठि मेहमान असा ना?” 19 पतरस तेस दर्शणे बारे सोचुण लगो थिआ कि शुची आत्माई तेस जे बोलु, “हेर, टाई मेह्‍णु तोउ तोपुण लगो असे। 20 खड़ भोई कइ बुन्ह गा, त तेन्हि जोई साते घेण दे; किस कि मेईं से लंघो असे।” 21 तोउं पतरसे बुन्ह एई कइ तेन्हि मेह्‍णु जे बोलु, “हेरे, जेस तुस तोपुण लगो असे, से अउं भो। तुस मोउं किस तोपुण लगो असे?” 22 तेन्हि बोलु, “अस सुबेदारे कुर्नेलियुसे लंघो असे, जे धर्मी त परमेश्वर हेर डरणे बाड़ा त सोबी यहूदी मेह्‍णु के ट्यारा असा। यक शुचे स्वर्गेदूत केआं तस ई निआंग मेई कि तोउ अपु गी भिआई कइ, तोउ केआं शुणे, जे तोउ बोलुण असु।” 23 तोउं पतरसे से अन्तर भिए त तेन्के खातिरदारी की।

दोके रोज पतरस तेन्हि जोई साते गा, त जोपा शेहरे विश्वासी भाई अन्तरा केहि तेस जोई साते गे।

कुर्नेलियुसे गी पतरस

24 तोउं होउस से कैसरिया शेहर पुजे। कुर्नेलियुसे अपु रिश्तेदार त खास खास मितर भिआई कइ तेन्हि भाड़ बिशो थिआ। 25 जपल पतरस तसे गीहे दुआर पुठ थिआ कि कुर्नेलियुस तेस जोई मिआ, त उटेऊ तेन तसे खुर बिने। 26 पर पतरसे से ईं बोल कइ टाता “खड़ भो, खड़ भो, अउं बि त तें ईं मेह्‍णु भो।” 27 होर तेस जोई बोक कते-कुते अन्तर आ त हेरु कि तठि सुआ मेह्‍णु कठे भुओ असे। 28 त पतरसे तेन्हि जे बोलु, “तुस सोब जाणते कि गैर यहूदी मेह्‍णु जोई संगत करीण या तेन्के गी घेण यहूदी धरमे नियमे खिलाफ असु। तोउं बि परमेश्वरे मोउं जे हरालो असु कि केसे बि मेह्‍णु जे जुठा या अशुचा बोलुण ठीक नेईं। 29 तोउं त जपल तुसी अउं भिआ त बगैर किछ बोलुणे, अउं एई गा। अब अउं पुछता कि अउं केस कमे लिए भिहो असा?” 30 कुर्नेलियुसे बोलु, “चोउर रोज पेहले इसे टेम, ब्यादली टाई बज अउं अपु गी प्रार्थना करण लगो थिआ; त हेरे, चिल-चिलान्ते झिणे लाओ यक मेह्‍णु एई कइ में सामणि खड़ भुआ। 31 त बोलुण लगा, ‘ए कुर्नेलियुस! परमेश्वरे तें प्रार्थना शुण छइ त तें दान तेन याद किओ असे। 32 तोउं त, अब केस जेईं जोपा शेहर लंघा त शमौन जेस जे “पतरस” बोते, भिआण दे। से शमौन चमारे गी मेहमान असा, जेसे घर समन्दरे औत पुठ असा।’ 33 तोउं मेईं झठ तुसी केईं जे मेह्‍णु लंघाए, होर तुसी भलु किउ जे तुस एई गे। अब अस सोब इठि कठे असे, ताकि जे किछ परमेश्वरे तुसी जे बोलो असु, तेस शुणुण।”

पतरस यीशु बारे कुर्नेलियुस जे बताण

34 तोउं पतरस बोलुण लगा, “अब मोउं सुसुर समझ आउ कि परमेश्वर केसे जोई केहर-बेहर न कता। 35 केसे बि जाति मेह्‍णु, जे तेस हेर डरते त धरमे कम कते, से तेस ट्यारे लगते।”

36 “सोबी जेईं के प्रभु, यीशु मसीह शान्ति खुश खबरी शुणाणे बेलि जे समाचार परमेश्वरे इस्राएली मेह्‍णु कें धे दिता, तसे बारे त तुसी पता ईं भोल। 37 नासरत ग्रांए यीशु जोई जुड़ो तेन्हि सोबी घटनाई के बारे बि तुस जाणते, जे पूरे यहूदिया राज्य अन्तर भुआ। से सोब गलील राज्य अन्तर शुरु भुआ, जपल से पोण अन्तर चुसिआ, जेसे बारे यूहन्ने प्रचार किओ थिआ। 38 परमेश्वरे तेस नासरत ग्रांए यीशु धे शुची आत्मा त अपु ताकत दुतो थी। से भलाई कता त तेन्हि सोबी ठीक कते, जे शैताने भुंजो थिए, इएर-ओवर हंटते रिहा, किस कि परमेश्वर तेस जोई साते थिआ। 39 अस तेन्हि सोबी कमी के उगाह असे; जे तेन यहूदिया राज्य त यरुशलेम शेहर अन्तर किए। होर से यीशु मेह्‍णु क्रूस पुठ ढनाई कइ मार छड़ा। 40 पर परमेश्वरे से टेके रोजे दुबारी जीआई छड़ा, त से हराला बि। 41 सोबी मेह्‍णु के समाणि ना, बल्कि तेन्हि उगाही के, जे परमेश्वरे पेहलाई चुणो थिए, मतलब हें समाणि, किस कि मर कइ जीण केआं पता जेन्हि तेस जोई साते खउ पिउ, से अस असे। 42 तोउं तेन असी जे ई निआंग दिती कि मेह्‍णु के बुछ खुश खबरी शुणाए त उगाही दिए, कि यीशु सेईंए भो जे परमेश्वरे जीन्ते त मरो तेन्के न्याय करण जे नियुक्त किओ असा। 43 यीशु बारे ईं सोब भविष्य वक्ते उगाही देन्ते कि जे कोउं तेस पुठ विश्वास कता, तेस तसे नओएं बेलिए पापी के माफी मेई घेन्ति।”

गैर यहूदी मेह्‍णु पुठ शुची आत्मा एण

44 पतरस ईं बोके बोलुण लगो थिआ कि शुची आत्मा सोब शुणणे बाड़ी पुठ एई गई। 45 होर ई हेर कइ पतरस जोई अओ यहूदी विश्वासी भाई सोब हैरान भोई गे कि गैर यहूदी मेह्‍णु बि शुची आत्माई वरदान मेई गा। 46 किस कि तेन्हि से होरी होरी भाषा अन्तर बोते त परमेश्वरे गुणगान कते शुणे। तोउं पतरसे बोलु, 47 “एन्हि बि हें ईं शुची आत्मा मेओ असी। त कि कोउं एन्हि पुओणि अन्तर चुसुण केआं रोक सकता ना?” 48 तोउं पतरसे निआंग दिती कि से यीशु मसीहे नओएं बइ पुओणि अन्तर चुसिए। तोउं तेन्हि पतरसे छने किउ कि से हउ कुछ रोज तेन्हि जोई बिशियेल।