9
1 तोउं यीशु तेन्हि जे बोलु, “अउं तुसी जे बोता कि जे इठि असे, अन्हि अन्तर कोई कोई ईं असे, जे कि जपल तकर परमेश्वरे राज्य पूरे ताकत जुए एण न हेरियाल, तपल तकर ना मरते”।यीशु रूप बदलण
2 छे रोज पता, यीशु पतरस, याकूब त यूहन्ना साते दूर यक उचे फाट पुठ नीए। तठि तेन्के सामणि तसे रूप बदली गा। 3 त तसे झिणे ईं चमकुण लगे कि सुआ टगड़ु भोई गोउ, ईं त धरती पुठ कोई धोबि बि झिणे चमकाई न बटता। 4 तोउं तेन्हि मूसा जोई एलिय्याह बि काआ; से यीशु जोई बोक करण लगो थिए। 5 इस पुठ पतरसे यीशु जे बोलु, “ए गुरुजीa, हें इठि भुण ठीक असु। अस टाई डेरा बणान्ते, यक तोउ जे, यक मूसा जे त यक एलिय्याह जे”। 6 पतरसे ए बोक तोउं बोली किस कि से टाहो सुआ डर गओ थिए, त तस समझ ना आउ कि की बोलुण। 7 तिखेईंए यक बदेए से घट छड़े, त तेस बदेए अन्तरा यक अवाज निथि, “ए में ट्यारा कुआ भो, असे शुणे!”b 8 तपले ईं चेले चोहरो कना हेरण लगे, पर यीशु छड़ कइ अपफ जोई साते होर कोई न काआ।
9 फाट पुठा उणिहां एंत-पेंत तेन तेन्हि जे निआंग दी कइ बोलु कि जपल तकर मनखे कुआ मरो मेह्णु अन्तरा दुबारी जी न घियाल, तपल तकर जे किछ तुसी हेरु, से केसे जे न बोलुण। 10 तेन्हि ए बोक याद रखी; त अपफ बुच बोक विचार करण लगे कि, “मरो मेह्णु अन्तरा दुबारी जीणे मतलब की असा?” 11 तोउं तेन्हि तेस केआं पुछु, “धर्मशास्त्री किस बोते कि एलिय्याह पेहले एण जरूरी असु?”c 12 तेन तेन्हि जे बोलु, “एलिय्याह सच्चे पेहले एई कइ सोब किछ सुसुर कता, पर मनखे कोईये बारे ईं किस लिखो असु कि से सुआ दुख सेहन्ता त मेह्णु तस ना मानते? 13 पर अउं तुसी जे बोता कि एलिय्याह त एई गो असा, त जीं तसे बारे लिखो असु, मेह्णु जीं चहु तीं तेस जोई किउ”।
यीशु यक कुआ केआं दुष्ट आत्मा बाहर नशाणी
14 जपल यीशु त से टाई चेले बाकी चेली के भेएड़ आए, त हेरु कि तेन्के चोहरो कना मेह्णु के हुसुड़ा लगो असा त धर्मशास्त्री तेन्हि जोई बेहसेईण लगो असे। 15 यीशु हेर कइ सोब हैरान भोई गे, त तसे भेएड़ जे दौड़े त तेस जे नमस्कार किउ। 16 तेन तेन्हि केआं पुछु, “तुस केस बोक पुठ अस जोई बेहसेईण लगो असे?” 17 हुसुड़े अन्तरा यक जेईं तेस जे जवाब दुतु, “ए गुरु, मेईं अपु कुआ तोउ केईं अण्हतो थिआ, किस कि तस अन्तर गुंगी आत्मा असी, 18 जेठि कोठि से तेस टान्ती त तठि फटाई छती : तोउं तसे आसी अन्तर शोफे भरी घेन्ति। से दन्त कुरुड़ खांता, त टटोरा भोई घेन्ता। मेईं तें चेली जे बोलु कि से तेस आत्मा नशाणे, पर तेन्हि से नशाणी ना बटी”। 19 ईं शुण कइ तेन तेन्हि जे जवाब दी कइ बोलु, “ए अविश्वासी मेह्णुओ! अउं कपल तकर तुसी जोई बिश्ता त कपल तकर तुं सेहन्ता? तेस में भेएड़ घिन एईए”। 20 त से तेस यीशु भेएड़ घिन ए। जपल तेन से हेरा, त तेन आत्माई से झट मरोड़ा त भीं फटाई छड़ा। तोउं तसे मुंहे बइ शोफे निसि त से लोटीण देण लगा। 21 तेन तसे बोउ केआं पुछु, “असे ईं हालत कपल केआं भो असी?” 22 तेन बोलु, “मठड़ियार केआं। तेन से खतम करण जे कपले आग त कपले पुओणि अन्तर फटा। पर अगर तु कुछ कइ सकता, त असी पुठ तरस खाई कइ हें भलु करे।” 23 यीशु तेस जे बोलु, “अगर तु कइ सकता? ए कि बोक भुई! विश्वास करणे बाड़ी जे सोब किछ भोई सकतु”। 24 कोईया बोउए झट तसे खुर टाइ कइ बोलु, “ए प्रभु, अउं विश्वास कता। छने में मदत कर कि में कमजोर विश्वास ताकतवर बणियाल।” 25 जपल यीशु हेरु कि मेह्णु दौड़ी दौड़ी हुसुड़ा लाण लगो असे, त से दुष्ट आत्मा जे ईं बोल कइ लेहरिआ, “ए गुंगी त टौणी आत्मा, अउं तोउ जे निआंग देन्ता कि अस अन्तरा बाहर निस त दुबारी असे अन्तर न घेण।” 26 त से लियारी दी कइ त तेस मरोड़ कइ बाहर निस गई; त कुआ अधमरा भोई गा। त मेह्णु बोलुण लगे, “ए त खतम भोई गा।” 27 पर यीशु तसे हतेउ टाइ कइ से खड़ेरा, त से खड़ भोई गा।
28 पता, जपल से गी आ, त तसे चेली तेस केआं अकेले अन्तर पुछु, “असी से किस ना निशाण बटी?” 29 तेन तेन्हि जे बोलु, “एस किस्मे आत्मा बगैर दुआ प्रार्थनाए केसे होर उपाय बइ न निस्ती”।
अपु मरणे बारे यीशु दोकी भविष्य वाणि
30 पता, यीशु त तसे चेले तठिआ नठे त गलीले इलाके बइ घेण लगो थिए। से न चहन्ताथ कि तसे बारे केसे पता लगे। 31 किस कि से अपु चेली शिचालताथ। त तेन्हि शिचालते टेम तेन बोलु, “मनखे कुआ जे अउं असा, मनखे हथे टोवेई घेण असा, त से मोउं मार छते; त मरणे पता टेके रोजे अउं दुबारी जीं घेन्ता”। 32 पर ए बोक तेन्के समझ अन्तर न आई, त से तेस पुछुण हेर बि डरतेथ।
स्वर्गराज्य अन्तर बोडा कोउं?
33 फि यीशु त तसे चेले कफरनहुम शेहर ए; त गी एई कइ तेन अपु चेली केआं पुछु, “बथ तुस केस बोक पुठ बेहसेईण लगो थिए?” 34 से चुप बिशे, किस कि बथ से इस बोक पुठ बेहसेईण लगो थिए कि असी बुच कोउं बोडा असा?d 35 तोउं यीशु भीं बिशा त से बारोह जेईं भिए, त तेन्हि जे बोलु, “अगर कोउं मुखिया बणुण चहन्ता, त सोबी केआं मठुड़ त सोबी के सेवक बणे।”e 36 तोउं तेन यक गभुर टाता त तेन्के बुच खड़ किआ। तेस कल्हाई कर कइ तेन्हि जे बोलु, 37 “जे कोउं में नओं जोई ईं गभुर अन्तरा केसे यक जेईं बि अपणान्ता, से मोउं बि अपणान्ता; होर जे कोउं मोउं अपणान्ता, से सद मोउंए न, बल्कि मोउं लंघाणे बाड़े बि अपणान्ता।”f
कोउं यीशु मितर त दुश्माण असा?
38 तोउं यूहन्ने तेस जे बोलु, “ए गुरु, असी यक मेह्णु का, जे तें नओएं बइ दुष्ट आत्मा नशाणताथ त असी से रोक छड़ा, किस कि से असी बिची ना थिआ”। 39 यीशु बोलु, “तेस न रोके; किस कि कोई ईं नेईं जे में नओएं बइ चमत्कारी कम कर कइ तपले ईं में बुराई करियेल। 40 किस कि जे हें बैरी नेईं, से हें कना असा।g 41 जे कोउं तुसी यक गलास ठन्नु पाणि बि इस बझई जोई पियाल कि तुस मसीहे भो त अउं तुसी जे बोता कि तेस तसे ईनाम जरूर मेता।”h
मेह्णु पाप कराणे बझह बणणे बारे
42 तोउं यीशु बोलु, “तेन्हि सुआ भयंकर सज्जा मेती जे कोउं ए जे मोउं पुठ विश्वास कते इन्हि मठड़ अन्तरा यक जेईं बि पाप करणे बझह बणियेल त तेन्के लिए त यक बोडे घते पठ कियाड़ी बइ ढनाई कइ दरेउ भरुण बि घट असु। 43 अगर तें हतेउ तोउ पाप करणे बझह बणता, त तेस काट छड़। किस कि दुई हतेउ जुए कदी ना हुशणे बाड़ी आगे जगाह नर्क अन्तर घेण केआं टूंटा भोई कइ स्वर्ग अन्तर अमर जीवन जे घेणे तोउ जे खरु असु।ij [ 44 किस कि तेस नर्क अन्तर लोलुड़ बि ना मरते त आग बि ना हुशती।] 45 अगर तें खुर तोउ पाप करणे बझह बणता त तेस काट छड़। 46 दुई खुरे रेहन्ते नर्के आग अन्तर घेणे बदले लटा भोई कइ स्वर्गे जिन्दगी जे घेण तोउ जे खरु असु, किस कि तेस नर्क अन्तर लोलुड़ बि ना मरते त आग बि ना हुशती। 47 अगर तें टीर तोउ पाप करणे बझह बणते त तेस भीं किढ़ छड़। दुई टीर जुए नर्क अन्तर घेण केआं अन्हा भोई कइ स्वर्गे जीवन जे घेण तोउ जे खरु असु।k 48 जेठि लोलुड़ बि ना मरते त आग बि ना हुशती। 49 किस कि जीं हर यक चीज लुणे बेलि साफ करिन्ती,l तिहांणि हर यक मेह्णु बि आगी बइ साफ करिन्ते। 50 लुण त अब्बल असु। पर अगर लुणे स्वाद खतम भोई घेईयाल त तेस केन बइ लुणकी कते?m तोउं त अपु अन्तर लुणे ईं गुण रखे त अपफ बुच उई मी कइ बिशे”।