मेह्णु पाप कराणे बझह ना बणुण
17
1 यक रोज यीशु अपु चेली जे बोलु, “ई त पक्का असा कि हर कोई पाप अन्तर घेन्ता। पर तेस मेह्णु खेया खाट भोई घेन्ति, जेसे बेलिए पाप करी घेन्ते! 2 जे एन्हि मठुड़ अन्तरा केसे यक जेईं केआं पाप करणे बझह बणता, तेस जे ईं खरु भुन्तु कि घते पठ तसे कियाड़ी बइ ढनाई कइ से दरेउ अन्तर छइ छाण। 3 त इसे बारे ध्यान कते रिहे;a अगर तुं भाई कोई गलती करियेल त तुस तेस समझाण दिए, त अगर पछताल त तस माफ करे।b 4 अगर से यक रोज अन्तर सत फेरि गलती कर कइ सत फेरि एई कइ तोउ जे बोलियेल कि, ‘भाई, मोउं केआं गलती भोई गई’, त तुस तस माफ करे।”c
होरी केईआं पाप कराणे बाड़ी पुठ हाए, हाए!
विश्वास बधाण
5 तपल प्रतिनिधि प्रभु जे बोलु, “हें विश्वास बधाण दिए।” 6 त प्रभु बोलु, “अगर तुसी अन्तर शरहेउ रो जत विश्वास भोल त तुस इस बुटे जे बोते कि जड़ केआं उखिड़ कइ तथ अन्तर बस त से तुं मनी छता।”d
यक नौखरे जिम्मेबारी
7 “तुसी बुच तेस अमीर मेह्णु ईं कोउं असा, जेसे नौखर बग बांता त ढडुड़ चरान्ता। त जपल से वापस एईयाल त तस जे बोलियेल, ‘झट एई कइ रौठि खाण जे बिश’? 8 कदी ना! बल्कि तुस ईं बोते कि ‘मोउं जे रौठि बणा, त जपल तकर अउं खाउं पिउं नउ में सेवा पाणि कर। तढ़ेया पता तु बि खाण पीण दे’। 9 कि से तेस नौखरे एहसान मानता ना कि तेन तिहांणि कम किउ, जीं तेन बोलो थिउ? 10 इहांणि तुस बि तेन्हि कमी कइ घियेल जे तुसी जे बोलो थिए त बोले अस नालायकी नौखर असे; जे असी करुण थिउ, असी सद सेईंया किउ।”
दस कोढ़ी ठीक करण
11 यक रोज ईं भु कि यीशु सामरिया त गलील राज्ये बीच बइ यरुशलेम जे घेण लगो थिआ। 12 केस ग्रां अन्तर घेण वकत तेस दस कोढ़ी मेईंए। 13 तेन्हि दूर खड़ भोई कइ जोरी जोरी बोलु, “ए यीशु, ए मालिका, असी पुठ दाह कर!” 14 त तेन तेन्के धे हेर कइ बोलु, “घिए त अपफ पुजारे हराले।”e त घेन्ते घेन्ते से ठीक भोई गे। 15 त तेन्हि बुचा यक ईं हेर कइ कि से ठीक भोई गो असा, जोरी जोरी परमेश्वरे धन्यवाद कते-कुते वापस आ; 16 त यीशु खुरी पुठ मुंहे बल झड़ कइ तेसे धन्यवाद करण लगा। से यक सामरीf थिआ। 17 इस पुठ यीशु बोलु, “कि दसो कोढ़ी ठीक ना भुए ना? त फिर बाकी नोउ कोठि असे? 18 कि एस परदेशी छड़ दी कइ कोई होर ना निसा जे परमेश्वरे महिमा कता?” 19 तोउं तेन तस जे बोलु, “खड़ भो त घेई गा, मोउं पुठ तें विश्वासे तु ठीक किओ असा।”
परमेश्वरे राज्य एण
20 फि यक रोज, जपल फरीसी यीशु केआं पुछु कि परमेश्वरे राज्य कपल एन्ता, त तेन तेन्हि जे जवाब दिता, “परमेश्वरे राज्य एण नजर ना एन्ता। 21 ना त मेह्णु ईं ना बोते ना कि ‘हेरे, इठि असा, हेरे ओठि असा।’ ना, परमेश्वरे राज्य तीं ना भुन्ता। इए हेरे, परमेश्वरे राज्य त तुं बुच जाई कपल एई गो असा, पर तुस तस पिछाणते नोउ।”
22 तोउं तेन चेली कें धे हेर कइ बोलु, “से रोज बि एन्ता, जपल मनखे कुआ सोबी केआं दूर करिन्ता। तोउं तुस मनखे कोईये रोजी अन्तरा यक रोज बि हेरण चहन्ते, पर तुस ना हेर बटते। 23 मेह्णु तुसी जे बोते कि ‘हेर, ओठि असा, या हेर, इठि असा!’ पर तुसी तेन्के ना शुणुण होर ना तेन्के पता घेण। 24 किस कि जीं अम्बर अन्तर बिजली यक कुणे केआं होर कुणे तकर चमकती तिहांणि मनखे कुआ बि अपु रोज एन्ता त सोब मेह्णु हेरते। 25 पर पेहले ई जरूरी असु कि से सुआ दुख सीढ़ाल त इस जुगे मेह्णु तस ना मानते। 26 जीं नूहेg रोज भुओ थिउ, तीं मनखे कोईये एणे रोज बि भुन्तु। 27 जेस रोज तकर नूह जहाज अन्तर ना गा, तेस रोज तकर मेह्णु खांते पीन्ते, त ब्याह जानि कते रिहे। तोउं, हड़ आउ त से सोब बहाई छड़े। 28 त जीं लूतेh रोज अन्तर भुओ थी कि मेह्णु खांते पीन्तेथ, लेण देण कतेथ, त बुटे बसान्तेथ त गी बणान्तेथ; 29 पर जिएस लूत सदोम केआं घेई गा, तिएस आग त वारुद अम्बर केआं झड़े त सदोमे सोब कुछ खतम कइ छोउ। 30 मनखे कोईये एणे रोज बि इहांणि भुन्तु।”
31 “तेस रोज जे लहाड़ पुठ भोल, तसे सामान गी अन्तर भोल त से तेस नेण जे ना अन्तर ना घिए। तिहांणि जे बग अन्तर भोल से पतूं ना आईए।i 32 लूते जुएलीj याद रखे! 33 जे कोई अपु प्राण बचाण चहाल से तेस गवाई छता, त जे कोई अपु प्राण देन्ता से तेस सुसुर रखता।k 34 अउं तुसी जे बोता, तेस रोज दुई मेह्णु यक मन्जे पुठ उंघ भुन्ते, तेन्हि बुचा परमेश्वर अपफ जे यक घिन घेन्ता त यक तठि बिशुण देन्ता। 35 दुई जिल्हाणु साते हटाट करण लगो भुओल। पर तेन्हि बुचा परमेश्वर यक घिन घेन्ता त यक बिशुण देन्ता। 36 दुई जेईं बग भुओल, त परमेश्वर अपफ जे यक नी छान्ता त होरा बिशुण देन्ता।” 37 इ शुण कइ तेन्हि तस केआं पुछु, “ए प्रभु, ए कोठि भुन्तु?” तेन तेन्हि जे बोलु, “जेठि मुड़दा भुओल तठि हुडानी किठिन्ती।”l