छुटिबा भुणे बारे यीशु शिक्षा
10
1 फिर यीशु कफरनहुम शेहर केआं घेई कइ यहूदिया राज्य अन्तर त यरदन दरेउ पार आ। त तसे भेएड़ दुबारी हुसुड़ा किठा भोई गा, त से रोजेरीं ईं तेन्हि शिक्षा देण लगा। 2 तपल फरीसी तसे भेएड़ एई कइ तस फसाण जे तेस केआं पुछु, “गुरुजी! हें नियमे हेसाब जुए मड़द अपु जुएली छुटिबा करण की ठीक असु ना?” 3 तेन तेन्हि जे जवाब दिता, “मूसे तुन्धे की निआंग दुतो असी?” 4 तेन्हि बोलु, “मूसे लिख तुखि कइ जुएली छड़ देणे इजाजत दुतो असी।”a 5 यीशु तेन्हि जे बोलु, “तुं नकठर मने बझई जुए ईं तेन तुसी जे ईं निआंग लिखि। 6 पर सृष्टि शुरुवात अन्तर जपल परमेश्वर से बड़ाए, तेन मड़द त जिल्हाणु कर कइ बणाए।7 ‘इस बझई जोई मड़द अपु ईया बोउ केआं बखी कइ
अपु जुएली जोई बिश्ता
8 त से दुहे मी कइ यक जिसम बणते’b
तोउं त से अब दुई नेईं बल्कि यक जिसम बण गो असे।
9 तोउं त जे परमेश्वरे जोड़ो असे, तेस मेह्णु बखरे न करे”।
10 पता जपल से गी एई गे त चेली दुबारी छुटिबा करणे बारे तेस केआं पुछु। 11 तेन तेन्हि जे बोलु, “जे कोउं अपु जुएली छड़ दी कइ होरी जोई ब्याह कता त से अपु पेहलकण जुएली खिलाफ नाजायज रिश्ता रखता।c 12 त अगर जुएली अपु धाणि छड़ दी कइ होरी जोई ब्याह कती त से बि नाजायज रिश्ता रखती।”
गभुर ईं भुण
13 तोउं मेह्णु अपु गभुर यीशु केईं अण्हण लगे कि से तेन्हि पुठ हथ रख कइ अशुश दिए, पर चेले तेन्हि जे लेहरिए। 14 यीशु ईं हेर कइ तेन्हि जोई नराज भोई गा त बोलु, “गभुर मोउं केईं एण दिए त अन्हि रोके नउ, किस कि परमेश्वरे राज्य इन्हि गभुर के ईं मेह्णु के भो। 15 अउं तुसी जे बोता कि जे कोउं परमेश्वरे राज्य गभुर ईं ना अपणाल, त से तेस अन्तर कदी घेई ना सकते।”d 16 तोउं तेन से कल्हाई किए, त तेन्हि पुठ हथ रख कइ अशुश दिती।
अमीर मेह्णु त अमर जीवन
17 पता, जपल से तठिआ निस कइ घेण लगा, त यक मेह्णु दौड़ता तेस केईं आ, तसे अगर उटेऊ बिश कइ पुछु, “ए खरा गुरु! मोउं अमर जीवन मेण जे की करुण?” 18 यीशु तेस जे बोलु, “तु मोउं जे ‘खरा’ किस बोता? परमेश्वर छड़ दी कइ कोई खरा नेईं। 19 तु नियम त जाणता :
‘कोउं मारण नउ,
नाजायज रिश्ता न रखण,
चोरुण नउ,
झुठी उगाही न देण,
कोउं ठगण नउ,
अपु ईये बोउए इज्जत करीण।’”e
20 तेन तेस जे बोलु, “ए गुरु! इन्हि सोबी त अउं मठड़ियार केआं मानता।” 21 इस बोकी पुठ यीशु से ट्यारा लगा त तसे धे हेर कइ बोलु, “तोउ अन्तर यक बोकी कमी असी। गा, जे किछ तोउ केईं असु तेस बेच कइ गरीब कें धे बांट छड़, त में पता आई, तोउं तोउ स्वर्ग अन्तर धन मेता”। 22 इ शुण कइ तसे चेहरा उदास भोई गा, त से दुखी भोई कइ घेई गा, किस कि से सुआ अमीर थिआ। 23 यीशु चोहरो कना हेर कइ अपु चेली जे बोलु, “अमीरी के परमेश्वरे राज्य अन्तर घेण सुआ औखु असु!”
24 चेले तसे बोकी बेलि हैरान भोई गे। त यीशु तेन्हि जे बोलु, “ए गभुरुओ! बचुण जे जे धन पुठ भरोसा कते, तेन्हि परमेश्वरे राज्य अन्तर घेण जे औखु असु! 25 सच्चाई त ई असी कि अमीर मेह्णु के परमेश्वरे राज्य अन्तर घेण ईं औखु असु, जीं ऊंटे स्नाणि छिने बइ निशरुण।” 26 से सुआ हैरान भोई कइ अपफ बुच बोलुण लगे, “त फि कोउं बच सकता?” 27 यीशु तेन्के धे हेर कइ बोलु, “मेह्णु केईआं त ईं न भोई सकतु, पर परमेश्वर केईआं भोई सकतु; किस कि परमेश्वर केईआं सोब कुछ भोई सकतु”। 28 त पतरस तेस जे बोलुण लगा, “हेर, अस त सोब किछ छड़ दी कइ तें पतोती ओ असे।” 29 यीशु बोलु, “अउं तुसी जे बोता कि जेन बि में त खुश खबरी लिए अपु घरबार, भाई भेण, ई बोउ, गभुरु-छिएड़ु, बग-बघुई, छड़ दुतो असे, 30 तस मेह्णु भुंजान्ते, फि बि इस टेम तस सद सौ गुणा घरबार, भाई भेण, ई बोउ, गभुरु-छिएड़ु, बग-बघुईएं ना मेती, बल्कि तस त एण बाड़े रोज अन्तर अमर जीवन बि मेता। 31 पर सुआ जेईं जे अगर असे, से पतूं भोई घेन्ते; त जे पतूं असे, से अगर भोई घेन्ते।”f
अपु मरणे बारे यीशु टेकी भविष्य वाणि
32 यीशु त तसे चेले यरुशलेम शेहर जे घेन्त पेंत बथ थिए। त यीशु तेन्के अगर अगर हंटो थिआ : पर चेले हैरान थिए कि से यरुशलेम जे घेण लगो असा। त जे हुसुड़ा तसे पता थिआ से बि डरो थिए। तपल यीशु फिर से बाराह चेले बखरे नी कइ तेस जुए जे भुणे बाड़ु थिउ, तेस बारे बोक करण लगा। 33 तेन बोलु, “हेरे, अस यरुशलेम शेहर जे घेण लगो असे, त तठि मुख्य पुजारी त धर्मशास्त्री मनखे कुआ मतलब मोउं टान्ते त मरणे दोषी कर कइ गैर यहूदी के हतेउ दी छते। 34 से सोब में मखोल बणान्ते, मोउं पुठ थूकते, त चाबुके बइ मडी मडी कइ घायल कते, तोउं मार छते। पर टेके रोज बाद अउं दुबारी जी घेन्ता”।
याकूब त यूहन्ना
35 तोउं जबदी कुआ याकूब त यूहन्ना तसे भेएड़ एई कइ बोलु, “ए गुरु, अस चहन्ते कि जे कुछ अस तुसी केआं मगुं, तुस असी जे करे”। 36 तेन तेन्हि जे बोलु, “तुस की चहन्ते कि अउं तुं लिए करुं?” 37 तेन्हि तेस जे बोलु, “अस चहन्ते कि तुं राज्य अन्तर तुं राजगद्दी जोई असी बि साते बिशुण दिए: यक जेईं देहणा कना त यक जेईं बउंआ कना।” 38 यीशु तेन्हि जे बोलु, “तुस न जाणते कि तुस की मगण लगो असे? जे दुख अउं सेहणे बाड़ा असा, तुस कि सेह सकते ना; होर जीं अउं मरणे बाड़ा असा तुस कि तीं मर सकते ना?”gh 39 तेन्हि तेस जे बोलु, “अस कइ सकते।” त यीशु तेन्हि जे बोलु, “जे दुख अउं सेहणे बाड़ा असा, तुस जरूर सेहन्ते; होर जीं अउं मरणे बाड़ा असा, तुस बि तिहांणि मरते। 40 पर केस बि अपु देहणा त बउंआ कना बिशाणण हक मोउं केईं नेईं। ए जगाह तेन्के लिए असी जे परमेश्वरे पेहलाई चुणो असे।” 41 याकूब त यूहन्ने बोके शुण कइ होरे दस चेले तेन्हि जोई नराज भोई गे। 42 त यीशु से अपु भेएड़ भिए त तेन्हि जे बोलु, “तुस त जाणते कि जे मेह्णु पुठ राज कते, से तेन्हि पुठ जुलुम कते; त से तेन्हि पुठ अपु हक जतान्ते। 43 पर तुसी बुछ तीं न भुओ लौतु, किस कि तुसी अन्तर अगर कोउं बोडा भुण चहन्ता से तुं सेवक बणे;i 44 होर जे कोउं तुं मुखिया बणुण चहन्ता, से सोबी के नौखर बणे। 45 किस कि अउं मनखे कुआ तोउं नेईं अओ कि में सेवा करेउं। अउं तोउं अओ असा कि होरी के सेवा करुं, त सोबी मेह्णु पापे सज्जाई केआं बचाणे लिए अपु प्राण दिउं।”
अन्हा बरतिमाई सारा करण
46 पता, यीशु त तसे चेले यरीहो शेहर पुजे। जपल यीशु त तसे पता पता चेले होर मेह्णु के बोडा हुसुड़ा यरीहो शेहर केआं घेण लगे, तपल बरतिमाई नओएं यक अन्हा भिकारी, जे तिमाई कुआ थिआ, बते औत बिशो थिआ। 47 से ईं शुण कइ कि नासरत ग्रांए यीशु घेण लगो असा, से हक दी दी कइ बोलुण लगा, “ए दाऊदे कोईया यीशु! मोउं पुठ दाह कर!” 48 सुआ मेह्णु तेस डराई कइ चुप बिशाणणे कोशिश की, पर से जोरी जोरी हक देण लगा, “ए दाऊदे कोईयाj, मोउं पुठ दाह कर!” 49 त यीशु रुक कइ बोलु, “अस इए भिए।” तोउं मेह्णु से अन्हा मेह्णु भिआ त तेस जे बोलु, “खड़ भो, हिम्मत कर! ए तोउ भिआण लगो असा।” 50 त जे टलिड़ तेन फुलोउ थी तस फटाई कइ तिखेईं से खड़ी गा, त यीशु भेएड़ आ। 51 त यीशु तेस जे बोलु, “तु मोउं केआं की चहन्ता?” अन्हे तेस जे बोलु, “ए गुरु, अउं हेरुण चहन्ता।” 52 यीशु तेस जे बोलु, “गा, तेईं मोउं पुठ विश्वास किआ, तोउं त तु ठीक भुआ।” से तिखेईंए हेरण लग गा, त तसे पता पता घेण लगा।