याकू 4

मोंजीपूर तो बानीलोड चेंग बिड़रानो

1 इम कान कावडी उयरानोव आरू तापा ताप्पी एर्रानोव आरे तीग वेञ्ञोव? आव इम मेन्न ती लेड़ा जुजा एर्रान लालेचूल तीगी गो आय वेञ्ञोव। 2 ईम नातीन एरको मेन्न चाजूरार आरू आद इमूंग टोन्डाया, आदूग आनकीकतार। ईम जिवड़ेय एर्रार आरू बेटू ओड़ार, आदूग ईम कावडी उयरार आरू तापा ताप्पी एर्रार। ईम आडारा, आदूग आय टोन्डाया। 3 इम लालेचूलीन पूरा चाजू ईम आडरानूग, इम उवाटूल गेलती मेन्डाव; आदूग ईम आडोड बेले इमूंग टोन्डाया। 4 ए दारीयालेर आकाटतोरे! माईड आपला आयालीन आरू आयाल आपला माईडीन चायी आवूर लोगीनोड दोस पाडरान कामूल चाजूरान आकाट, ईम मापोरबून चायी किली आवूर तोन मानूरान लोग आय! मापोरबून विरूद ती मेन्डान मोंजीपूर तो बानीलीन चोग चाजूरानो मापोरबूनोड कुचेर एर्रान आकाटी आय एनी ईम पूनार काय एटे? एड एरको ई मोंजीपूर तो बानीलोड चेंग बिड़ू कानताड, ओड आपलेनी मापोरबून कुचरेय एरीकताड। 5 “मापोरबू आम्म कान डेरा पात्तू इडरान जियोम, आम आवूर नातोन एरको पातीयाकपोड कुचेर एर्राड” एनी मापोरबून कागेत पोका पोक्कूमो एनी चोमजूमोर काय एटे? 6 एरोड मापोरबू चियरान माया पेम इदूग ले आगेर तो आय; आदूगी “डेंग एर्रानेरीन मापोरबू विरूद चाजूराड, एरोड चुचारूत लोगीन एके माया पेम चाजूराड” एनी मापोरबून कागेत ती लिका मेन्डा। 7 आदूगी मापोरबून काबजे ती इमीन ईमी ओपीक एरूर। आरू बूत डुमेलीन मुकीयाट चेयतानीनोड लेड़ूर। तेबे आद इम लेग्गाट तीग पेची तूल्ला। 8 मापोरबून लेग्गे वेरूर आरू मापोरबू बेले इम लेग्गे वेर्राड। ए पापीयालेरे! ईम आपला केय्यूलीन ओगराकपूर। ए दुय बेदीयालेरा! इम मेन्नूलीन ओगराकपूर। 9 बिचारपूर। मुर मुरा एरूर आरू कूय कूयी आड़ूर। इम नावकूड मुर मुरे ती बादली चेनको; आरू इम वेड़का एके बिचार चुमरान कान बादली चेनको। 10 पोरबून मुन्देल सोजालेर एरूर; तेबे ओड इमीन बेड़कूल एरीकताड।

ओकूरीन ओकूर कियाल ऊबूमोर

11 ए बिसवासी बायीयोवे आरू दादेरे! ओकूर ओकूरीन विरूद ती कियाल ऊबूमोर। एड आपला तोल्लेडीन विरूद ती कियाल ऊबूराड, चिलाड आपला तोल्लेडीन केचूरतेड एनी चिड़ाकताड, ओड नियोमीन विरूद ती कियाल पोकराड आरू नियोमीन नियाव चिड़ाकताड। एरोड ईन नियोमीन नियाव चाजोड ईन आदीन ती चेलानोत एरा, एरोड आदीन नियाव चाजूरानोत आय। 12 नियोमीन चियरानेड आरू नियाव चाजूरानेड मापोरबू ओकूरी गो आय। ओड ओकूरी आय आरू नाचाक नाम्बीकताड। आपला लेग्गेत लोगीन नियाव चिड़ाकतानोत ईन एड आय?

तोल्ली एटे एर्रा एनी एडी पूनार

13 “इने चिलाड तोल्ली, आम आरो बेले आवूर तो गेड़े ती चेनी किली आना बेरचीकार आत्ती मेन्नी बेबार एनकी किली लाब कामाकताम” एन्डान ईम इदीन गो वेनूर गाट: 14 ईम एके तोल्ली एटे एर्रा एनी पूनार; इम जियोम नातो आय आदूग? ईम गो डेन्डीक देका पाड्डी मारी माय चेन्डान दुवांरीन आकाटतोर आय। 15 इमूंग ईटे पोकरान ले उलटा, “पोरबून उवाट एरोड आम जियोम मेन्डाम आरू इदीन चिलाड आदीन चाजूराम” एन्डानो आय। 16 एरोड, एपोर ईम इम डेंग तीग बोड़पान एरमोर; आटे बोड़पान एर्रानो कियाल आय। 17 आदूगी एड एरको नातो चाजोड रेच्चाट आय एनी पुन्नी किली, आ रेच्चाटीन चाजाकोड आद ओनूग पापदेरोम एर्रा।