सावकारकूलूग चुवाल
5
1 ए सावकारकूले वेनूर गो।
ईम इमूंग एर्रान गेरेलीन चेत्तूग आड़ूर आरू कूय कूयी आड़ूर।
2 इम देन माल चाम्म चेन्डो ना,
इम गान्डेलीन एलूब तिन्दो ना।
3 इम कान तो सोन आरू रूप उगडी चेन्डो ना;
आरू उगडूरानो एके इमीन केचूर तो लोग एनी गोवाई पोकरा आरू नरक कून्ड तो किच्चीन आकाट इम मेनीन तिन्दा।
ईम एके मुरजूरान जुग ती इमूंग देन मालीन चान्दीकतोर नार गो।
4 चूड़ूर!
इम कामेयीन कोयरान बूती लोगीन बूतीन ईम दाबाक किली इट्टोर नार जे?
आद इम विरूद कोलार एरमो आरू कोयरानेरीन गुवारना सरग तो पालटेनकूल मान्देत पोरबून केकोल आर्रे एदोतो ना।
5 ईम मोंजीपूर ती रेच्चा चुक ती पिञ्ञोर आरू आपलेनी वेड़का एरीकतान कान बिड़ी मेट्टोर।
लोग तानीन चाटरार एनी पूनाका रेच्चा मेन काट्टीक एर्रान बोकड़ेन आकाट ईम मापोरबू नियाव चिड़ाकतान वादेकतूग आपला मेन्नीन तायार एरीकमोर।
6 ईम देरमी मांजेन केचूरतेड एनी नियाव चिड़ाक किली चाय्यीकतोर।
ओड एके आनीन ईम आनकीकमोर एनी इमीन नानी एनेडा।
दिरजा पात्ती मेनूर
7 ए बिसवासी बायीयोवे आरू दादेरे!
पोरबू मारी वेर्रारे दिरजा पात्ती मेनूर।
कामाकतान मांजा नेन्दील तो निक्के मोल्लेत कामेयूग पोईल वाञी तीग पात्ती चेरा चेरीत वाञी वेर्रारे एटे दिरजा पात्ती काताड एन्डानोन चूड़ूर।
8 आटनी ईम बेले दिरजा पात्ती मेनूर।
आपला मेन्नीन मोंजीबूत चाजूर।
एटे एनोड पोरबू वेर्रान दिना एदाल-एदाल एरमो।
9 ए बिसवासी बायीयोवे आरू दादेरे!
ईम ओकूरीन ओकूर विरूद गुर मुरा एरमोर।
तेबे इमीन नियाव चिड़ाकपारा।
चूड़ूर!
नियाव चिड़ाकतानेड वेल ती निलतेड नाड।
10 ए बिसवासी बायीयोवे आरू दादेरे!
पोरबून पिदीर ती ऊबूरान मापोरबून कान तीग काबेर वेन्नी किली लोगीन पोक चियरान गुरूकूल सताक एर्रान तीग आरू दिरजा पात्ती मेन्डान तीग आमीन बेले ओर आकाट मेनूंग पाव टोटीकतेर।
11 चूड़ूर!
सामालची मेन्डानेरीन आम आसतीरतेर एन्डाम:
ईम आयूबa एन्डानेड सामालची किली मेन्डानोन आरू सामालची किली मेन्डान पिटतेल पोरबू ओनूग नातो चिञ्ञेड आदीन बेले पुट्टोर।
आदीन तीग पोरबू पूरा केरमा गोटोक एरी किली पूरा जियोम नोयपीकतानेड आय एनी पाता चेलूमो।b
12 एरोड ए आन्न बिसवासी बायीयोवे आरू दादेरे!
जाम्मेन ले रेच्चाट पाटा इद आय:
सरग पोडे चिलाड मोंजीपूर पोडे,
आरू नाती आवूर बानीन पोडे किरीया तिनमोर;
एरोड इम ऊबाल ओ एनोड ओ आरू एरा एनोड एरा एनी मेनको।
तेबे ईम डेन्ड बेटूरान बातेरतोर एरारा।
बिसवात तो बिन्ती
13 इम कान तीग एड बेले आबोड़ूल ती मेनोड ओड बिन्ती जोड़ेकेड।
आरू एड एरको वेड़के ती मेनोड ओड मापोरबून जुवारतान पाटेल पाडेकेड।
14 एड बेले नोयकूड ती मेनोड ओड पोरबून बिसवात चाजूरान मान्देत सियानकूलीन कूयेकेड आरू ओर ओनीन नेय मेरपीक किली पोरबून पिदीर पात्ती ओनूग बिन्ती जोड़ेकेर।
15 आरू बिसवात तो बिन्ती तीग नोयकूड तो मांजा उजरूराड आरू पोरबू ओनीन चुनतीक किली नीतीकताड।
आरू ओड पापदेरोम चाजी मेनोड बेले,
ओन पापदेरोमीन मापोरबू माप चाजूराड।
16 आदूगी ईम उजरोकोर एनी,
ओकूरोड ओकूर आपला पापदेरोमीन मानूर;
आरू ओकूरूग ओकूर बिन्ती जोड़ूर।
देरमी मांजेनc बिन्ती ती निक्के लाव मेन्डा आरू कुबे बानील एरू नाम्बीकताव।
17 एलीया मेनगा बेले आम्म आकाट सादाल मांजा मेट्टेड।
आरू ओड वाञी पाडा मेनको एनी चेत्त मेन्न तीग बिन्ती जोड़ेड,
आरू मुकपोकाल आरू चोय गोटा नेलींगूल आर्रे नेन्दील ती मुरले वाञी पाडोया।d
18 पिटतेल ओड मारी बिन्ती जोड़रानूग वाञी बादोर तीग पाट्टो आरू नेन्दील कामेयीन पाड़ञीकतो।
19 ए आन्न बिसवासी बायीयोवे आरू दादेरे!
इम कान तीग एड एरको चेत्त तीग बूलकी चेनोड आरू एड बेले ओनीन मापोरबूनेल मेन्डची एन्देरपोड,
20 मेन्डची एन्देर्रानेड इदीन चुरते ती पात्तेकेड:
एड एरको पापीयालीन ओड बूलकूरान कान तीग मेन्डची एन्देरपोड,
मेन्डची एन्देर्रानेड एके बूलकी चेन्डानेडीन जियोमीन चाय्यकूड तीग बाचाकमेड आरू बूलकी चेन्डानेडीन चेड़ीगेन पापदेरोमूल बेले माप एर चेन्डाव।