याकू 3

नेवान्डीन काबजे ती चाजूरानो

1 ए आन्न बिसवासी बायीयोवे आरू दादेरे! इम कान तीग कुबे लोग मेरचीकतानेर एरमोर। एटे एनोड मेरचीकतान आम, आवूर लोगीन ले आगेर नियाव चिड़ाक एर्राम एनी पुट्टोर। 2 एटे एनोड आम जाम्मा कुबे इसाबूल ती गेलती चाजी किली उट तिरूमोम। एड एरको तान ऊबूरान ती गेलती चिलाका ऊबूराड, ओडी आय नातेली बेले कोमी चिलायेड; आरू ओड आपला जाम्मा मेनीन बेले काबजे ती चाजू नाम्बीकताड। 3 आम गुर्रोलीन आम्म काबजे ती चाजू आदीन चोन्ड ती कोंगरीन कुप्पीक किली कासरा पातीकपोड, आम आदीन जाम्मा मेनीन बेले मेन्डूक नाम्बीकताम। 4 नीर-जाजूलीन बेले चूड़ूर; आव निक्के बेड़कूल मेनोड बेले, निक्के वाल्ली दूकोड आद जाजीन वालीकता। एरोड बेले ओक पिटीत आकाट तो केलनेनोड गाटवारी आदीन आट मेन्डूक बावोड आट मेन्डताड। 5 आटनी नेवान्ड बेले मेन तो ओक पिटीत आकाट तो बाग आय, एरोड आद बेड़कूल-बेड़कूल पाटेलीन बोड़पान पोकरा। चूड़ूर! किन्डीक आकाट किच निक्के बेड़तो मेरामीन केरीकता। 6 नेवान्ड बेले किच्चीन आकाट तो आय। आद ओदेरोम तीग कोप्पी मेन्डा। आद आम्म मेन तो ओक बाग मेन्नी गुलाय मेनीन केचूर तो एरीक किली पीयरान जाम्मा दिनेलीन नाचाक काडरा। आरू नरक कून्ड तो किच तीग केरीकता। 7 एटे एनोड जाम्मा बानीत जेत जियादूल, तीतेल, रेंगूरान पिन्दा पुड़ूत आरू सोमून्द तो जियादूल नातेकीन गो मांजा आपला काबजे ती चाजू नाम्बीकताड आरू काबजे ती चाजेड नाड बेले। 8 एरोड नेवान्डीन एके आपला काबजे ती आरोई मांजा चाजू ओड़ाड; आद ओक एडी आटकाक ओड़ा एड़जाट आरू चाय्यीकतान मोरेन तीग कोपरानो आय। 9 आम आयची नेवान्डोड आम्म पोरबून आरू बुवा मापोरबून जुवार पोकराम; आरू आयची नेवान्डोड मापोरबू तान्न मुरीत ती गेड़ी मेन्डान लोगीन चेरापूराम। 10 ओकती चोन्ड तीग जुवारतानो आरू चेरापूरानो इरडूकी पेताव। 11 ए आन्न बिसवासी बायीयोवे आरू दादेरे! आटे एरा मेनको। 12 एटे बीजा पेतान ओकती बोत्ते तीग तिर्राट आरू केर तो नीर पेता आदूग? ए आन्न बिसवासी बायीयोवे आरू दादेरे! एटे तोय मेरी ती तुम्बरी चिलाड आंगूर टुन्डे ती एके बाका आदूग? आटनी केर नीर तो बीजे ती एडो नीर पेपाया।

पोडी तीग वेर्रान गियान

13 इम कान तीग गियानतेड आरू चोमेनतेड एड मेन्डाड? ओड आपला कामूलीन चुचारू तो गियान तीग पेतान आपला रेच्चाट चेलनूकूड़ूल तीग टोटीकपेकेड। 14 एरोड ईम इम गेरोब ती टेक पात्ती किली कुचेर एरी, आपलेनी चान्दीकतान उवाटीन पात्ती मेनोड, बोड़पान एरमोर, आरू चेत्तीन टेगरान पाटा एरीकमोर। 15 आटो गियान पोडी तीग वेर्रानो एरा। आद मोंजीपूर तो आय। आद बोकती चिलायो आरू बूत डुमेल इसाब तो आय। 16 एटे एनोड आट-आट कुचेर आरू आपलेनी चान्दीकतान उवाट मेन्डा आना लोग आबूच एर्रार आरू जाम्मा एड़जाट कामूल चाजूरार। 17 एरोड पोडी तीग वेर्रान गियान बेटूरानेड, पोईल केचूर चिलायेड, आनातले मिलेन ती मेन्डानेड, चुचारूतेड, लोगीनोन वेनदानेड, निक्के जियोम नोयपीकतानेड, आरू रेच्चाट पालकूल आकाट तो काम चाजूरानेड, चेकी एराएड आरू चेत्तेतेड मेन्डाड। 18 आरू मिलाकतानेड मिलेन ती मेन्डानो एन्डान वित्तीलीन वीती किली देरोम एन्डान पालकूलीन कोयराड।