याकू 2

जाम्मा ई लोगीन ओकती काटारतेर आय एनी चोमजूर

1 ए आन्न बिसवासी बायीयोवे आरू दादेरे! ईम निरबे रेच्चाट चाबाव तीग मेडूरान रेग तो, आम्म पोरबू ईसू का बिसवात चाजूरानूग, जाम्मा ई लोगीन ओकती काटारतेर आत एनी चोमजूर। 2 एटे एनोड ओक मांजा एके सोन तो वात्त तुन्दी आरू रेच्चाट गान्डेल नूड़ी ईम उलजूरान कान वेरोड, आरू ओकूर चाकोल मांजा चार्रान गान्डेल नूड़रानेड बेले वेरोड, 3 आरू ईम आ रेच्चाट गान्डेल नूड़ी वेर्रानेडीन रेच्चा मोकोम चूड़ी किली, “इद ईन, आ रेच्चाट पाड ती उन्ड” एनोड; आरू आ चाकोल मांजेन एके “इना निलची मेन” चिलाड “आन्न केल लेग्गे किड़ी उन्डी मेन” एनी पोकोड, 4 एटे ईम लोगीन पुटकाकतानोर आरू केचूर तो चुरतेनोड लोगीन आन्ताज चाजूरानोर एरोरा आदूग? 5 ए आन्न लाड तो बिसवासी बायीयोवे आरू दादेरे! इदीन वेनूर: एटे मापोरबू मोंजीपूर तो चाकोल लोगीन बिसवात ती सावकार एरू, आरू तानीन चोग चाजूरान लोगूग पाटा चियी मेन्डान मापोरबू जाम्मेनी आंगरूरान इसाब तो काबजेतेर एरू आचाडी आदूग? 6 एरोड ईम एके चाकोल लोगीन इजीत चुमीकतोर। एटे सावकारकूली इमीन बुकताकपारा आदूग? आरू एटे ओरी इमीन पेसी उन्डरान कान टान्ड टान्डी उयारा आदूग? 7 एटे ईम पातीयाकमोर जे? आ ईसू मसीयालीन इजीत तो पिदीरीन निन्दरूरानेर ओरी एरा आदूग?

8 “ईन आपलेनी एटे चोग चाजूरात आटनी आपला लेग्गेत लोगीनोड चोग चाज” एनी मापोरबून कागेत ती लिकी मेन्डान आकाट मापोरबून राज तो नियोमीन चेत्ते पूरा चाजोड, ईम रेच्चा ई चाजूमोर। 9 एरोड ईम एके जाम्मा ई लोगीन ओकती काटारतेर एनी चोमजाकोड, ईम पापदेरोम चाजूमोर आरू नियोम इमीन, ईम नियोमीन मानायोर आय एनी चिड़ाकता। 10 एटे एनोड एड एरको, पूरा नियोमीन मानोड बेले ओकती पाटेन जूकी किली उट तिरोड, ओड जाम्मा पाटेलीन माना कियालतेड एञ्ञेड। 11 एटे एनोड “दारीयाट कामूलीन चाजूमेन” एन्डानेडी, “एरीनी आनकीकमेन” एट्टेड नाड। आदूगी ईन दारीयाट काम गो चाजोता, एरोड आनकीकपोड बेले ईन नियोमीन मानायोत एञ्ञोत। 12 डेन्ड तीग चोड़ाकतान नियोम तो इसाब ती मापोरबू इमीन नियाव चिड़ाकताड; आदीन चुरता चाजी किली ईम ऊबूर आरू काम चाजूर। 13 एटे एनोड एड जियोम नोयपीकपाडा, ओनूग बेले मापोरबू जियोम नोयपीकपाका नियाव चिड़ाकताड। लोगूग जियोम नोयपीकतानेड मापोरबू नियाव चिड़ाकतान इसाबूग नारचू लागाया।

बिसवातीन काम ती लागाकतानो

14 ए आन्न बिसवासी बायीयोवे आरू दादेरे! एड बेले तान बिसवात चाजूमेन एनी पोक्की किली, आदीन रेच्चाट काम तीग टोटीकपाकोड, ओनूग नातो लाब एर्रा? एटे आटो बिसवात, एतोड एरको ओनीन नाम्बीकता आदूग? 15 एबे आरो बिसवासी तोल्लेडूग चिलाड बिसवासी बायीग नूड़ू गान्डा पूराकोड, आरू ओरूग रोजे तिनूंग रान्दा चिलाकोड, 16 आरू इम कान तीग एड बेले ओरीन, “चुक ती चेनूर, वेदी मेनूर आरू पाञारे तिनूर” एनी किली, ओर मेनूग लागूरान बानीलीन चियाकोड नातो लाब एर्रा आदूग? 17 आटनी आन बिसवात चाजूमेन एनी किली आदीन रेच्चाट काम तीग टोटीकपाकोड आद चाय्यी मेन्डान बिसवात आय।

18 एरोड, एड बेले आनीन, “इन लेग्गाट बिसवात मेन्डा; आरू आन्न लेग्गाट एके रेच्चाट काम मेन्डा” एनी पोक्कू नाम्बीकताड। आन ओनीन, “एपोर ईन नाती रेच्चाट काम चाजाका इन बिसवातीन आनीन टोटीक आरू आन इनीन आन्न बिसवातीन आन कामूल चाजूरान तीग टोटीकतान” एनूंग नाम्बीकतान। 19 ईन “ओकूरी मापोरबू मेन्डाड” एनी बिसवात चाजूमोत एरोड, ईन रेच्चा चाजूमोत। एरोड बूत डुमेल बेले आटनी बिसवात चाजी किली तिरूराव। 20 एरोड ए बाकवाल मांजेने! रेच्चाट काम चाजाका, आमान बिसवात चाजूरानो पोकातो आय एनी ईन पूनात आदूग? 21 आम्म पेपी दादी इबराईम मेनगा आपला चिन्ड इसाकीन जेतरा पाड ती कुड्डी किली गो, तान चाजूरान रेच्चाट काम तीग देरमी एरीक एञ्ञेड। 22 ओन बिसवात ओन रेच्चाट कामीन चेंगे मिसी किली काम चाजोतो आरू रेच्चाट कामूल तीग ओन बिसवात पूरा एञ्ञो एनी ईन चूड़ूमोत। 23 आरू “इबराईम मापोरबून बिसवात चाजेड, आरू आदूगी मापोरबू ओनीन देरमी आय एनी मानेड” एनी मापोरबून कागेत ती लिकी मेन्डान पाटा पूरा एञ्ञो। आरू ओड मापोरबून चेंगा एनीक एञ्ञेड। 24 आदूगी मांजा आमान बिसवात तीगी एरा, एरोड रेच्चाट कामूल तीग देरमी एरीक एर्राड एनी ईम चूड़ूमोर। 25 आटनी दारीयाट राआब बेले काबेर तो लोगूग तान्न ओलेक ती पाड चियी आवूर तो पावोड चेनूंग पाव चियी किली आपला रेच्चाट कामूल तीग गो देरमी एरीक एञ्ञो। 26 जियोम पेची चेनोड मेन मोड़ी एर्रान आकाट रेच्चाट काम चिला बिसवात बेले चाय्यरान आकाट तो आय।