याकू 1

याकूब

लिकूरान चिट्टी

जुवारतानो

1 मापोरबू आरू पोरबू ईसू कामीयाल याकूबीन टिटाक ले जाम्मा देचेल ती बुरली एरी मेन्डान बारा गोटा बोस तो लोगूग जुवार पोक्की किली लिकूरानो:

बिसवात आरू बुदी

2 ए आन्न बिसवासी बायीयोवे आरू दादेरे! इमूंग एतोड एरको बानीग-बानीग तो पोरकूरानोव वेरोड ईम आपलेनी आम निक्के वेड़केतोम आय एनी मानूर। 3 एटे एनोड आव इम बिसवातीन पोरकूरानूग इमूंग दिरजा टोन्डूरा। 4 एरोड दिरजेन तान्न कामीन पूरा चाजू इडूर; तेबे ईम नातेली बेले कोमी चिलाका मोंजीबूत आरू पूरा एरी मेन्डानोर मेन्डार।

5 एरोड इम कान तीग एरूग बेले बुदी कोम मेन्डा एरोड, मापोरबून आडूर; ओड कावडाका आरू लोब एराका जाम्मेगी चेड़ीगेन चियराड; आरू आडूरानेडूग बुदी चियराडी। 6 एरोड ओड बिसवात तीग आरू किन्डीक बेले दुय मेन्न एराका आडेकेड; एटे एनोड दुय मेन्न एर्रानेड वाल्ली आट्टोड उदलूरान सोमून्द तो एलकेन आकाटतेड आय। 7 आटो मांजा आनूंग पोरबून तीग नातो एरको टोन्डूरा एनी चोमजा मेनकेड। 8 ओड दुय बेदीयाल आय आरू आपला जाम्मा पाटेल ती चुल बुलीयाल एर्रानेड आय।

देन माल मेन्डानो आरू नाती चिलाका मेन्डानो

9 नाती चिला बिसवासी लोग, मापोरबू ओनीन आपला नेंजेर ती जाम्मा बानी मेन्डानेर एरीकतानूग बोड़पान एरकेर। 10 आरू सावकार तान नाती चिलायेड एर्रानूग बोड़पान एरकेड। एटे एनोड लाटेत पूवूल वाड चेन्डान आकाट ओड डेन्डीक माय चेन्डाड। 11 एटे एनोड पोकाल पेची किली केर नेन्डी आट्टोड, आ पूव पोर्रेन वाडपीकता; आरू आदीन बिगलूरान पूवूल ईल चेन्डाव; आरू आवीन चाबाव बेले माय चेन्डा। आटनी सावकार बेले आपला दान्दा चाज चाजी मेनेकी नाच चेन्डाड।

पोरकूरानो

12 पोरकूरान कान बेरकेच मेन्डान मांजा आसतीरीन बेटूराड; एटे एनोड ओड पोरकूरानोन सामालतान पिटतेल मापोरबू तानीन चोग चाजूरानेरूग चियरान एनी पाटा चियी मेन्डान जुग-जुग तो जियोमीन इनामीन आकाट बेटूराड। 13 एरूग एरको पोरकूरानोव वेरोड, ओड “आनूंग मापोरबून टिटाक तीग पोरकूरानो वेरमो” एना मेनकेड। एटे एनोड एडी मापोरबून कियाल चाजपीक पोरकू ओड़ाड। आरू ओड बेले तानी एरीनी कियाल चाजपीक पोरकाडा। 14 एरोड ओक-ओक मांजा आपला ई लालेचूल ती बिड़ी आरू चिरंगी किली पोरकूरान कान पाडराड। 15 पिटतेल लालेच, मेन ती तेबी किली पापदेरोमीन जेनमाकता आरू पापदेरोम पूरा चान्दोड चाय्यकूडीन एन्देर्रा।

16 ए आन्न लाड तो बिसवासी बायीयोवे आरू दादेरे! एडी इमीन दोका चियू ओड़ा मेनकेर। 17 एटे एनोड जाम्मा रेच्चाट आरू नातेली बेले कोमी चिला इनाम पोडी तीगी, विलीजूलीन गेड़रानेडीन टिटाक तीग टोन्डूरा। ओड एतोडी बादलाडा; नेलींग पुनी आरू चावाड एरी किली बादला बादली एर्रान आकाट मेनाडा। 18 तान गेड़रान जाम्मा बानील ती, आम मापोरबूग चोत्तीकतान पोईलात पाल्लीन आकाट, आम ओनोम एरकोम एनी आय, ओड तानी तान्न उवाट चाजी किली, चेत्ते तो पोद्द तीग आमीन जेनमाकतेड।

वेनदानो आरू आदीन ती चेल्लानो

19 ए आन्न लाड तो बिसवासी बायीयोवे आरू दादेरे! इदीन पुनूर: ओक-ओक मांजा वेनूंग निक्के तायार ती मेनूर, ऊबू दीरे एरूर आरू रिच एरू दीरे एरूर। 20 एटे एनोड मांजेन रिच मापोरबूग मेन लागूरान देरोम तो इसाबूलीन चाजू इडाया। 21 आदूगी जाम्मा इसाबूल तो कियाल आरू निरबे एड़जाट इसाबूलीन चाय काड्डी, मापोरबू इम गेरोब ती ऊदी मेन्डान आरू इम जियोमीन पोद्दीन चुचारू तीग पातीयाकपूर।

22 मापोरबून पोद्दीन आमान वेनदानोर एरा, एरोड आदीन ती चेलानोर बेले एरूर। आरू आपलेनी आपला ई दोका चियमोर। 23 एटे एनोड एड एरको पोद्दीन वेनदानेड मेन्नी, आदीन ती चेलायेड मेनोड, ओड तान्न मोकोमीन रोजे देरपोन ती चूड़रानेडीन आकाटतेड आय। 24 एटे एनोड ओड तानीन तानी चूड़ी किली चेन काडराड आरू तुरते नी तान्न मुड़ा एटे मेट्टो एनी बुलकूराड। 25 एरोड आरो मांजा नातेली बेले कोमी चिला नियोम ती चिलाड बान्देन तीग चोड़ाकतान नियोम ती मेन्न लागाक किली आदीन ती बान्नी मेन्डाड, ओड आमान वेन्नी किली बूलकूरानेड एरा, एरोड आदीन ती चेलानेड मेन्डाड। ओड नातोन चाजूराड आदीन ती आसतीरीन बेटूराड।

26 एड एरको तान बोकती ती मेन्डान एनी चोमजोड, आरू आपला नेवान्डीन लागाम काटरान आकाट चाजी किली काटलाकपाका मेनोड आपला मेन्नीन दोका चियराड; आरू ओन बोकती पोकातो आय। 27 केटाचीलूग आरू पोरटालेरूग ओर आबोड़ूल ती चेंग चियरानो, आरू आपलेनी, ई मोंजीपूर तो लालेचूल तीग चूत पाडीकपाका मेनीकतानो ई, आम्म बुवा मापोरबून नेंजेर ती ओगराक मेन्डान आरू चूत पाडा बोकती आय।