မ်ထ 19

လွင် အီမာယ် အီဘိုန့် လာယ် ဝဲန်

1 ဇဝ် ယေဆူ ဟဲ့ ဟွတ့် ကာလာင် ဂြုဝ်း ဇိုဝ် တီ၊ အန် ဝီ လေး ခဲင် အိူင် ဂါလီလေ၊ ဝီ ဟာဝ် ဇမ် ခဲင် အိူင် ယူဒါ။ အန် မိူဝ် ဟာဝ် နာ တ ဘ့လဲင် ယောဒါန်။ 2 ဒေါ အန် တီ န့ ဝီ မိုဝ်း ဒူအီ ကိူန် အီ တး ဒူပ် အန်။ အန် မိူဝ် ပီကဲန် ဆဝ် ဂေ ဒွန် မျုဝ်။

3 န့ ဘော မိုဝ်း ဒူအီ ခဲင် ဖိုင် ဖာရီဆဲ မင် အီ၊ ဂေ တး ဒူင် ကွယ် အန်။ ဂေ ဆီ ဟြေတ့် ဒင် အန်၊ တဲး ဂေ ပွိုန် ဒီ ဖျာက် ဇဝ် ယေဆူ။ ဂေ တဝ်း၊ “ဆေ ဒူအီ အူ ဝီ ဆီ ဝဲန် အီဘိုန့် အန်၊ ဘော နပ် ဒီ ကာလာင် ပီ လုတ့် အီဘိုန့် အန် လွင် မာဆေ အာဝ် တဝ်း၊ န့ ဒူပ် တူ ဒူပ် ဒါရာ။း”

4 ဇဝ် ယေဆူ ဝီ တဝ်း၊ “ဘေ ဟဲ့ ဒွိုမ် တိး ခဲင် ဘပ် ဇဝ်ဖြာ လွင် အူ ဆိန့် ဒေါ ဂုဝ် အန်၊ ဒေါ ဘူင် ဇဝ်ဖြာ ဘော အီမာယ် ဘော အီဘိုန့်။ 5 ဒေါ အန် တီ ဇဝ်ဖြာ မိူဝ် ဟဲ့ တဝ်း၊ ‘ခုဝ် အန် တီ အီမာယ် ဒီ ဝဲန် ဂုန့် မာ အန်၊ တဲး အန် ဒူပ် အီဘိုန့် အန်။ ဂါယ် မိူဝ် ဒီ ဘဲန် ပီ ဒုဝ် ဘူင့် အူ ဘူင့်။’ 6 န့ ပီ ဂါယ် အာဝ် ဟူ မုး ဒူအီ အာ ဝီ။ ဂါယ် ဟဲ့ ဘဲန် ပီ အူ ဝီ။ ခုဝ်၊ ဆေ ဇဝ်ဖြာ ဟဲ့ တဲး အာ ဝီ လာယ် ခတ်၊ ဝီ ဘဲန် ပီ အူ ဝီ၊ ဒူအီ အာဝ် ပွိုန် ဘူင် တဲး ဂါယ် ဝီ ကာယဝ်း။”

7 ဂေ ဝီ တဝ်း၊ “ဆေ န့ ပါယ် တီ၊ မှဝ် န့ ပါယ် ပီ တဝ်း ဒါ ဆာရာ အာမုဝ်ဆဲ တွိုန်၊ အီမာယ် ပွိုန် ဒဲမ် ပဲ့ လွင် လာယ် ဝဲန်။း ဟဲ့ ဟွတ့် အန် ပွိုန် ဟုဝ် လေး အီဘိုန့် အန် ခဲင် ကာင် အန်။”

8 ဇဝ် ယေဆူ ဝီ တဝ်း၊ “အာမုဝ်ဆဲ တွိုန် ဟဲ့ ခ့ဝါင် ဘေ အီမာယ် ဝဲန် အီဘိုန့် ဘေ၊ ကူပ် တူ မိုဝ်း ဘေ နဝ်း ရွက့် ကာဝေ ဒူအီ။ အူ ဆိန့် ဒေါ ဂုဝ် အန် န့ ယီ တူ မုး ပါယ် တီ။ 9 အုဝ် တဝ်း ဒီ ဘေ၊ ဆေ အီဘိုန့် တူ မိုဝ်း နဝ်း ကိူန်၊ အီမာယ် ယီ ဝဲန် အီဘိုန့် အန် တီ၊ ဝီ လာယ် အီဘိုန့် ပေါ အူ ဝီ၊ မှာပ် အန် ပီ မှာပ် လုတ့် အီဘိုန့် အီ။”

10 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဒီဘဲ အန်၊ ဂေ ဝီ တဝ်း ဒီ အန်၊ “ဆေ လွင် အီဘိုန့် အီမာယ် ဘော ညှာပ် ပါယ် တီ၊ အာဝ် မွှိုမ် လာယ် ဒိုဝ်း။”

11 ဇဝ် ယေဆူ ဝီ တဝ်း၊ “ပီ ဒီ ကာလာင် အုဝ် ဒေါ တီ နီ၊ အာဝ် မုး ဒူအီ ဒွန် အီ ဒီ ပွိုန် ဒူပ်။ န့ ယီ မိုဝ်း မင် အီ၊ ဇဝ်ဖြာ ဟဲ့ တဲး ဂေ ပွိုန် ဒူပ်။ 12 န့ မိုဝ်း အီမာယ် မင် အီ အီ ဟဲ့ ဆး အူ ဆိန့် ဒေါ ဂွိုတ် ဂေ။ န့ ဘော မိုဝ်း မင် အီ အီ ဟဲ့ ခမ် ဒီ ဆး။ ပေါ မင် အီ ထာင်၊ ဆေ ဂေ တူ ခတ်၊ ဂေ ပွိုန် ဒီ ဘူင် ဆီချာ ဂါန် ဇဝ်ဖြာ။ ခုဝ်၊ ဂေ တူ ဒိုဝ်း အီဘိုန့်၊ ခမ် ဒီ ယိူန်။ အာဆေ ထာင်၊ အန် ပဲ ဒီ ခမ် ဇိုဝ် တီ၊ တဲး အန် ခမ်။”

လွင် ဂွန် ဒီတဲတ် တး ဒူင် ကွယ် ဇဝ် ယေဆူ

13 ဝါယ် အန် တီ ဂေ တး တိုယ် ဂွန် ဒီတဲတ် ဒူင် ကွယ် ဇဝ် ယေဆူ၊ တဲး ဇဝ် ယေဆူ ဒါင် ဒဲ အန် ဒဲင် ဂိန့် ဂေ၊ ဆာခိုဝ် ဒါင် ဂေ။ ဂေ ဒီဘဲ ဇဝ် ယေဆူ ယီ အေး ဂေ အီ တး တိုယ် ဂွန် ဂေ တီ။

14 ဇဝ် ယေဆူ ယီ တဝ်း၊ “တဲး ဂေ ဂွန် ဒီတဲတ် တး ဒီ အုဝ်။ ကွဲ့ ခြဲ ဂေ။ အာဆေ ဆီ ကွယ် ခဲင် မိူင် ပီ အိုပ် ဇဝ်ဖြာ၊ အန် လုဝ် ဘဲန် ပီ ဂွန် ဂေ နီ။” 15 ပန် တီ အန် မိူဝ် ဒါင် ဒဲ အန် ဒဲင် ဂိန့် ဂေ၊ ဆာခိုဝ် ဒါင် ဂေ။ ဟဲ့ ဟွတ့်၊ အန် ဝီ လေး ဒူင် ကွယ် အန် တွိုန်။

လွင် ဒူအီ ခြမ်

16 ဝါယ် အန် တီ န့ ဘော မိုဝ်း ဒူအီ အူ ဝီ၊ အန် တး ဇမ် ဒူင် ကွယ် ဇဝ် ယေဆူ။ အန် ဝီ ဒီမွှတ် ဇဝ် ယေဆူ တဝ်း၊ “ဆာရာ၊ အုဝ် လုဝ် ဘူင် နာ မွှိုမ် မျုဝ် မှဝ်၊ တဲး အုဝ် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။း”

17 ဇဝ် ယေဆူ ဝီ တဝ်း၊ “မှဝ် န့ ပါယ် ပီ ကာလာင် မဲ လွင် နာ မွှိုမ်။း န့ မိုဝ်း မီ အန် ဇဝ် အူ ကာဒင် အီ ဟဲ့ မွှိုမ်။ ဆေ မဲ ဆီ ပွိုန် အာဆာက် ကာမာယ် ပီ ဒွါ ဇဝ်ဖြာ၊ တဲး မဲ ဘူင် ဒူပ် ဒါရာ အန် ဇဝ်။”

18 အန် ဝီ ဒီမွှတ်၊ “ဒါရာ မာဆေ န့ မုး။း” ဇဝ် ယေဆူ ဝီ တဝ်း၊ “ကွဲ့ ငဝ်း အာဆာက် အီ၊ ကွဲ့ လုတ့် အီဘိုန့် အီ ဟဝ်၊ ကွဲ့ ပြာ ကြုဝ် အီ၊ ကွဲ့ ကာလုဝ် ဒေါ ကာလာင် ဘေ ဆက်ဆေ လွင် အီ ဟဝ်၊ 19 ရုဝ်ဆေ ဂုန့် မာ ဘေ ဘော၊ ဘေ လုဝ် ရွက့် အီ ဟဝ်၊ တဲး န့ ပီ ပီ ရွက့် ဘေ ဒုဝ် ဘြိမ် ဘေ။”

20 ဒူအီ တွိုန် ဝီ တဝ်း၊ “ဇိုဝ် တီ အုဝ် ဟဲ့ ဘူင် တူတ့် ဒွန် မျုဝ်။ မာဆေ န့ ဆီ မိုဝ်း၊ ပီ လုဝ် အုဝ် ဘူင်။း”

21 ဇဝ် ယေဆူ ဝီ တဝ်း၊ “ဆေ မဲ ဆီ ဘူင် တဲး န့ ဇေ့ဇုင်၊ မဲ လုဝ် ယွင့် တူတ့် ကြုဝ်ကြာမ် မဲ။ ခဲ့ ပီ ပွိုန် မဲ၊ မဲ လုဝ် ဝီ ကာဆာင် ဒီ ဒူအီ ဂိန်။ ဆေ မဲ ဘူင် ပါယ် တီ၊ န့ ပီ ကြုဝ်ကြာမ် ပီ ဒီ ပွိုန် မဲ ခဲင် ဂါင်ဟြာဝ်၊ န့ ဒီ ကိူန်။ မဲ ဟီ ဟွတ့် ဘူင် ပါယ် တီ၊ မဲ လုဝ် ဝီ တး၊ ဒူပ် အုဝ်။”

22 ဒူအီ တွိုန် ဟဲ့ ယိုဝ် ဂြုဝ်း တီ၊ အန် ဝီ ဝေန့်။ နဝ်း အန် ဘော က့လိုဝ်။ ခုဝ်၊ အန် ဟဲ့ ခြမ် ကာဆဝ်။

23 ပန် တီ ဇဝ် ယေဆူ ဝီ ကာလာင် ဒီ ဒီဘဲ အန်။ အန် တဝ်း၊ “အုဝ် တဝ်း အာခ်ု ဒီ ဘေ၊ ဆေ န့ မုး ဒူအီ ခြမ်၊ န့ ညှာပ်၊ တဲး အန် ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။ 24 အုဝ် တဝ်း ဒီ ဘေ၊ ဆေ ဒူအီ လုဝ် ဟပ် ဝန် တာင်၊^a တဲး န့ လိုပ် ခဲင် ကာဒဝ် ဟျုဝ့် မာလတ့်၊ န့ ငှိုယ် လွှိုမ် ဒူအီ ခြမ် ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”

25 ဂေ ဒီဘဲ အန် ဟဲ့ ထူမ် ဂြုဝ်း အန် တီ၊ ဂေ မိူဝ် အာမ် ကာဆဝ်။ ဂေ ဝီ ဒီမွှတ် အန် တဝ်း၊ “ဆေ န့ ပါယ် တီ၊ န့ နှဲန် တူ မိုဝ်း အာဆေ အီ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ။”

26 ဇဝ် ယေဆူ ဝီ ယွတ် ဂေ၊ ဝီ တဝ်း၊ “ပီ တူ ပွိုန် ဘူင် ဒူအီ၊ ဇဝ်ဖြာ ယီ ပွိုန် ဘူင် တူတ့် ဒွန် မျုဝ်။”

27 အာပေတာရူ ဝီ တဝ်း၊ “ယေ ဟဲ့ ဟွတ့် ဝဲန် တူတ့်၊ တဲး ယေ ပွိုန် ဒီ ဒူပ် မဲ။ ယေ ဒီ ပွိုန် အာဂျိုဝ် မာဆေ။း”

28 ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ။ ဆေ ဇဝ်ဖြာ ဒီ ဘော ဘူင် တဲး န့ ကာမာယ် တူတ့် ဒွန် မျုဝ်၊ အုဝ် အီ ဟဲ့ ဘဲန် ဂွန် ဒူအီ၊ အုဝ် ဒီ ကွယ် ဒဲင် မာလာင် အီ ဘျ အာဖုင် ဒင်ခုဝ် အုဝ်၊ တဲး အုဝ် အိုပ် ကာဒါယ်။ ဒေါ အန် တီ ဘော ဘေ အီ ဟဲ့ ဒူပ် ဆီချာ အုဝ်၊ ဘေ ပွိုန် ဒီ ကွယ် ဒဲင် မာလာင် ဂိုဝ် ဒီ အာ ဘူင့်၊ တဲး ဘေ ဆုင်ဖျာတ် အာမူ ဂေ ဒူအီ အီဆာရေလ ဂိုဝ် ဒီ အာ ခြိုဝ်။ 29 န့ မိုဝ်း ဒူအီ ကိူန်၊ အီ ဟဲ့ ဝဲန် ကာင် ဂေ အူကတ် အူဝါ ဂေ၊ အီ ဟဲ့ ဝဲန် ဘော ဂုန့် မာ ဂေ ဘော ဂွန် ဂေ ဘော မာန် ဘော ဒူင် နာ ဂေ ကူပ် ဒူပ် ဂေ ဒီ အုဝ်၊ ဘူင် ပီ စ်ု အုဝ်။ ဂေ ဒီ ဝီ ပွိုန် လွှိုမ် ပဲ့ ဟဲ့ ဝဲန် ဂေ အူ မာယဝ်း ဘုန်။ အုဝ် ဒီ ဒွါ ဘော အာဆာက် ကာမာယ် ဒီ ဂေ၊ တဲး ဂေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ 30 န့ ယီ မိုဝ်း ဒူအီ အီ ဟဲ့ ယဲတ့် ဒီ အာတ့်၊ ဂေ ဒီ ဝီ ကွယ် နာ ပန်။ ဂေ ဒူအီ အီ ဒူပ် ဒီ ပန်၊ ဂေ ယီ ဝီ ကွယ် နာ အာတ့်။”