မ်ထ 18

လွင် ဒါ တာင် ခဲင် မိူင် ပီ အိုပ် ဇဝ်ဖြာ

1 ဝါယ် အန် တီ ဂေ ဒီဘဲ ဇဝ် ယေဆူ ဝီ တး ဒူင် ကွယ် အန်။ ဂေ ဝီ ဒီမွှတ် အန် တဝ်း၊ “ခဲင် မိူင် ပီ အိုပ် ဇဝ်ဖြာ၊ အာဆေ မုး ဒူအီ အီ တာင် လွှိုမ် အီ ဟဝ်။း”

2 ဇဝ် ယေဆူ ဝီ ဒဲ့ ဂွန် ဒီတဲတ် အူ ဝီ၊ တဲး အန် တး ကွယ် ကာတဲ ဂေ။ 3 အန် မိူဝ် တဝ်း၊ “အုဝ် တဝ်း အာခ်ု ဒီ ဘေ။ ဆေ ဘေ တူ ဘျွင် နဝ်း ဘေ၊ ဆေ ဘေ တူ ဝီ ဘဲန် ပီ ဂွန် ဒီတဲတ်၊ ဘေ တူ ပွိုန် ဒီ လိုပ် ခဲင် မိူင် ပီ အိုပ် ဇဝ်ဖြာ ဒေါ မှဝ်။ 4 ခုဝ်၊ အာဆေ ပီတျီမ် ဒုဝ် ဘြိမ် အန်၊ တဲး အန် ပီ ဂွန် ဒီတဲတ် နီ၊ အန် ဒီ ဝီ ဘဲန် ဒူအီ အီ တာင် လွှိုမ် အီ ဟဝ် ခဲင် မိူင် ပီ အိုပ် ဇဝ်ဖြာ။

5 ဆေ န့ မိုဝ်း ဒူအီ အီ ရွုး ဂွန် ဒီတဲတ် ဇိုဝ် တီ ကူပ် ညှိုမ် အန် ဒီ အုဝ်၊ န့ ပီ၊ အန် ရွုး အုဝ်။ 6 ဆေ န့ ဘော မိုဝ်း ဂွန် ဒီတဲတ် အီ ပီ ဂွန် နီ အီ ညှိုမ် အုဝ်၊ ဆေ ဒူအီ အူ ဝီ ဘော ကာဆုး ဂွန် ဇိုဝ် တီ ဘူင် မှာပ်၊ န့ ကာအာပ် အီ ဒိုဝ်း မာဝ် တာင် ပီ ကြိတ် အီ ခါမုန်၊ ပက် ဟွယ် ဒီ မဲင် အန်၊ ဝီ ဘျွာ ဘော အန် ဘော မာဝ် တာင် တီ ခဲင် အိုမ်၊ တဲး အန် ယမ် ကာဒမ် အိုမ်၊ ကွဲ့ ဟူ တဲး အန် ပွိုန် ဒီ ဘူင် မှာပ် ဇိုဝ် တီ။

7 ဂေ ဒူအီ အီ ကွယ် ဒဲင် ကာဒါယ် နီ၊ ဂေ ဒီ ကာဒုး ဒုက် တာင် ကူပ် ဘူင် ဂေ ဘဲန် မျုဝ် ဘဲန် မျုဝ် အီ နပ် ဒီ ကာဆုး အီ ဟဝ် ဘူင် မှာပ်။ န့ ယီ မိုဝ်း ဘဲန် မျုဝ် ဘဲန် မျုဝ် အီ တဲး ဒူအီ ဘူင် မှာပ်။ အာဆေ ယီ ကာဆုး အီ ဘူင် မှာပ်၊ ဝူတ် အန် ဒီ စန် လွှိုမ် အီ ဟဝ်။ 8 ဆေ ဒဲ ဂေ ပ့လဝ် ဘေ ယီ တဲး ဘေ ဘူင် မှာပ်၊ တဲး ဘေ ဒဲပ် ဝဲန်။ ဆေ ဘေ တူ မိုဝ်း ဒဲ ဂေ ပ့လဝ် တီ၊ ယီ ပွိုန် ကွယ် ရိုမ် ဒူပ် ဇဝ်ဖြာ ဆေဆေ၊ န့ မွှိုမ် လွှိုမ် မိုဝ်း ဘေ ဒုဝ် ဘူင့် အီ ဇေ့ဇုင်၊ ယီ စုဝ်း ကာလုဝ့် ငါရာယ်၊ အီ မိုဝ်း ငဝ် ကုး ဆေဆေ။ 9 ဆေ ငါယ် ဘေ ဝီ တဲး ဘေ ဘူင် မှာပ်၊ တဲး ဘေ ဂွဲ့ ဝဲန် ငါယ် တီ။ ဆေ ဘေ မိုဝ်း မီ ငါယ် အူ ဘ့လာက် ယီ ပွိုန် ကွယ် ရိုမ် ဒူပ် ဇဝ်ဖြာ ဆေဆေ၊ န့ ဘော မွှိုမ် လွှိုမ် မိုဝ်း ဘေ ငါယ် ဘော အာ ဘ့လာက်၊ ယီ လုဝ် စုဝ်း ကာလုဝ့် ငါရာယ် အီ မိုဝ်း ငဝ် ကုး ဆေဆေ။” ခဲ့ တီ ဇဝ် ယေဆူ ကာလာင် လွင် ဒူအီ အီ ကွယ် ခဲင် မိူင် ပီ အိုပ် ဇဝ်ဖြာ။

လွင် မာဘူ အီ ဟဲ့ ဘျုဝ်း

10 ပန် တီ ဇဝ် ယေဆူ ဝီ တဝ်း၊ “အုဝ် တဝ်း ဒီ ဘေ၊ ဂွန် ဒီတဲတ် အီ ပီ ဂွန် နီ၊ ဂေ မိုဝ်း အာမူ အာမာတ် ဇဝ်ဖြာ အီ ဘ်ု ဂေ။ အာမူ အာမာတ် ဇဝ်ဖြာ ဂေ တီ၊ ဂေ ကွယ် ဂါင်ဟြာဝ် ဒီ အာတ့် ဇဝ်ဖြာ ဆေဆေ။ ခုဝ် အန် တီ ဘေ လုဝ် ဆာဒိက်၊ ကွဲ့ တဲး ဘေ ထာင်၊ ဂွန် ဂေ နီ တူ မိုဝ်း ဒီခုဝ်။ 11 အုဝ် အီ ဟဲ့ ဘဲန် ဂွန် ဒူအီ၊ အုဝ် မိူဝ် ဟဲ့ တး၊ တဲး အုဝ် ဟြေတ့် ဂေ ဒူအီ အီ ကာလိုပ် န့တေန့် ဇဝ်ဖြာ၊ တဲး အုဝ် ပွိုန် ဒီ ချွတ် ဂေ။

12 တဲး ဘေ ဇေန့်ဇာ လွင် အူဖာမာ ပီ ဒီ ခဲ အုဝ် ဒေါ တီ နီ။ ဆေ န့ ဘော မိုဝ်း ဒူအီ အူ ဝီ၊ အီ မိုဝ်း မာဘူ အူ မာယဝ်း ဒုဝ်၊ ဆေ မာဘူ အန် အူ ဒုဝ် ဟဲ့ ဘျုဝ်း၊ ဒါ အီ ဟျီင် မာဘူ တီ၊ အန် ဒီ ဘော ဘ့လေး အုန် မာဘူ အန် ဒိမ် ဂိုဝ် ဒီ ဒိမ် ဒုဝ် တွိုန်၊ တဲး ဂေ ကွယ် ဘာင် နွန်၊ ဝီ ဟာဝ် ဟြေတ့် အူ ဒုဝ် အီ ဟဲ့ ဘျုဝ်း တွိုန်။ 13 အုဝ် တဝ်း အာခ်ု ဒီ ဘေ။ နဝ်း အန် ဒါခိုယ် ကူပ် ဆီ ကွယ် မာဘူ အန် ဒိမ် ဂိုဝ် ဒီ ဒိမ် ဒုဝ်။ ဆေ အန် ယီ ဝီ ယိုဝ် မာဘူ အူ ဒုဝ် အီ ဟဲ့ ဘျုဝ်း တွိုန်၊ အန် ဒီ ဝီ ခူယ် ကာဆဝ် ကူပ် ဟဲ့ ဝီ ယိုဝ် အန် ဒုဝ် တီ။ ဂွန် ဒီတဲတ် ဂေ နီ၊ ဂေ ပီ မာဘူ တီ။ 14 ဘော ဂုန့် အုဝ်၊ အီ ကွယ် ဂါင်ဟြာဝ်၊ အန် တူ ဆီ တဲး အာဆေ စှိုမ် အာဆာက် အန်။”

လွင် ဒူအီ လာယ် ဇွင့်

15 ဇဝ် ယေဆူ ဝီ မာနုဝ် ပေါ အူ မျုဝ်။ အန် တဝ်း၊ “ဆေ န့ မိုဝ်း ဘီနွင် အီ ညှိုမ် ဇဝ်ဖြာ ပီ မဲ၊ ဆေ အန် ဘူင် နာ တူ မွှိုမ် ဒီ မဲ၊ မဲ အူ ဝီ လုဝ် ဟာဝ် ဒူင် ကွယ် အန်၊ ကာလာင် ဒီ အန် လွင် ပဲ့ ဟဲ့ ဘူင် အန်၊ ကွဲ့ တဲး အီ ဟဝ် ထူမ်။ ဆေ အန် ထူမ် ဂြုဝ်း မဲ၊ ဘာယ် ဟဲ့ ဝီ လာယ် ဒါခိုယ်။ 16 ဆေ အန် ယီ တူ ထူမ် ဂြုဝ်း မဲ၊ မဲ လုဝ် ဒဲ့ ပေါ အူ ဝီ၊ အာ ဝီ၊ တဲး ဂါယ် ဒူပ် မဲ ဟာဝ် ဒူင် ကွယ် အန် တွိုန်။ ခုဝ်၊ အာရေ ဒွန် မျုဝ် လုဝ် မိုဝ်း ဒူအီ အာ အူယ် ဝီ အီ ဘဲန် ဆက်ဆေ လွင် အန်။ ဆေ ပီ ကာလာင် ဂေ ဟဲ့ မုး အူ မျုဝ်၊ ဟဲ့ ပွိုန် ဆုင်ဖျာတ် အီ မှာန် တူ မှာန်။ 17 ဆေ ဒူအီ တွိုန် ယီ တူ ထူမ် ဂြုဝ်း မဲ ဘော ဂြုဝ်း အီ ဒူပ် မဲ၊ မဲ လုဝ် ကာလာင် လွင် အန် တီ ဒီ ဒွန် အီ ခဲင် ဖိုင် ဇဝ် ယေဆူ။ ဆေ အန် ယီ ညှမ် အိုင် ဒီ ထူမ် ဂြုဝ်း ဂေ၊ မဲ ပွိုန် ဒီ ဘူင် ဒီ အန်၊ တဲး န့ ပီ၊ အန် မုး ဒူအီ အီ တူ နပ် ဇဝ်ဖြာ။

18 အုဝ် တဝ်း အာခ်ု ဒီ ဘေ။ ဆေ ဘေ ဆုင်ဖျာတ် တဝ်း၊ ဒူအီ အူ ဝီ တူ မှာန်၊ ဘော ဇဝ်ဖြာ ဒီ တဝ်း ပါယ် တီ။ ဆေ ဘေ ဆုင်ဖျာတ် တဝ်း၊ ဒူအီ အူ ဝီ ဟဲ့ မှာန် ဟဲ့ မုး၊ ဘော ဇဝ်ဖြာ ဒီ ဖြူမ် ရိုမ်။

19 အုဝ် တဝ်း ပေါ အူ မျုဝ် ဒီ ဘေ။ ဆေ န့ မိုဝ်း အာ ဝီ၊ ဆေ ဂါယ် လာယ် ဖြူမ်၊ တဝ်း ဒီ မှာန့် ဒီ ဇဝ်ဖြာ တဲး အန် ဘူင် အူ မျုဝ်၊ ဂုန့် အုဝ် ဒီ ဘော ဘူင် ခဲ့ ပီ မှာန့် ဂါယ် တီ။ 20 ခုဝ်၊ ဆေ န့ မိုဝ်း အာ အူယ် ဝီ အီ တး ကွယ် ရိုမ်၊ တဝ်း ဒီ ဂါဝ် ပွုန် အုဝ်၊ အုဝ် ဒီ ဘော ကွယ် ရိုမ် ဒူပ် ဂေ ဒူအီ တီ။”

လွင် ဒူအီ တူ ကာဝေ အီ ဟဝ်

21 ဝါယ် အန် တီ အာပေတာရူ ဝီ ဒီမွှတ် ဇဝ် ယေဆူ။ အန် တဝ်း၊ “မဲ ဇဝ်၊ ဆေ န့ မိုဝ်း ဘီနွင် အုဝ်၊ အီ ဟဲ့ ဘူင် နာ တူ မွှိုမ် ဒီ အုဝ်၊ နှာင် ဇေန့် အုဝ် လုဝ် ဘ့လွာ့ ဝဲန် မှာပ် အန် တီ။း ဆေ အုဝ် ဘ့လွာ့ ဝဲန် ဘူ ဇေန့် ဟဲ့ ပွိုန် စူ။း”

22 ဇဝ် ယေဆူ ဝီ တဝ်း၊ “အုဝ် တဝ်း၊ အာဝ် ဝန် မီ ခဲ့ ဘူ ဇေန့်။ လုဝ် ဘ့လွာ့ ဝဲန် ဘူ ဂိုဝ် ဒီ ဘူ ဇေန့်။

23 ခုဝ် အန် တီ အုဝ် ဒီ ကာလာင် အူဖာမာ ပေါ အူ မျုဝ်။ မိူင် ပီ အိုပ် ဇဝ်ဖြာ၊ န့ ပီ ခုန်ဒီခမ် အူ ကာဒင်။ အူ ဆီငဲ အန် တဝ်း ဒီ ယွတ် ပီ ဘူင် ဒဲစေန့် အန်၊ ယုဝ် န့ မှာန် တူ မှာန်။ 24 အန် ဘော စုး ဒီ ယွတ် မှဝ် ရွိုန် အန်။ န့ မိုဝ်း ဒူအီ အူ ဝီ၊ အန် ဟဲ့ ကာဝါယ် ရွိုန် အူ မှိုန့် ထာလေန် (န့ ပီ အာ ဆဲန် ဒီ ဘူ မှိုန့် ဆ)။ ဂေ ဝီ စ်ု အန် တး ဇမ် ဒီ အာတ့် ခုန်ဒီခမ် တွိုန်။ 25 ဒူအီ တီ ယီ တူ မိုဝ်း ဒီ ဒွါ ဝိဝ် ရွိုန် မာဆေ။ ခုဝ်၊ ခုန်ဒီခမ် စ်ု ဒဲစေန့် အန်၊ တဲး အန် ယွင့် ဘော ဒုဝ် ဘော အီဘိုန့် ဂေ ဂွန် အန်၊ တဲး ဂေ ဘဲန် ကြုဝ် အီ ဟဝ်၊ တဲး နီ အန် ကော ဘြေ့။

26 ဒူအီ တွိုန် ယီ ခြိုပ်ခြဝ် ဒီ အာတ့် ဒါ ကာညာ အန်၊ ဝီ မှာန့် တဝ်း၊ ‘တဲး မဲ ကာဝေ အုဝ်၊ တဲး မဲ နှဝ့် ပေါ န့ ပွါ။ အုဝ် ဒီ ဝျီ့ ဝိဝ် တူတ့် ဒီ မဲ။’ 27 ပန် တီ ခုန်ဒီခမ် တွိုန် ဝီ ကာဝေ ဒူအီ တီ။ အန် ဝီ ထာယ် တူတ့် ခဲ့ ပီ ကာရဝ်း အန်၊ တူ တဲး အန် ဝျီ့ ဝိဝ် မာဆေ။ ဟဲ့ ဟွတ့်၊ အန် ဘ့လေး ဒူအီ တီ၊ တဲး အန် ဝေန့် ဒူင် ကွယ် အန်။

28 ဝါယ် အန် တီ ဒူအီ တွိုန် ဟဲ့ ဟွတ့် လေး ခဲင် ကာင် ဒါ ကာညာ အန်၊ အန် ဝီ ကာတုန့် ဒဲစေန့် ပေါ အူ ဝီ၊ အီ မုး ဂိုက် အန်၊ အီ ဘူင် ရိုမ် ဂါန် ဒါ ကာညာ တွိုန်။ ဝီ တီ ဟဲ့ ဒွိုမ် ကာရဝ်း ရွိုန် အန် အူ မာယဝ်း ဘူင့်။ခုဝ်၊ အန် ဝီ မှေတ့် ဂိုက် အန် တီ၊ စုး ဒီ ဆီနျီ့ မဲင် အန်၊ ဝီ တဝ်း၊ ‘ဝျီ့ ရွိုန် ပီ ကာရဝ်း မဲ ဒီ အုဝ်။’

29 ဂိုက် အန် တွိုန် ဝီ ခြိုပ်ခြဝ် ဒီ အာတ့် အန်၊ တဝ်း၊ ‘မှာန့်၊ တဲး မဲ နှဝ့် အီ စဲက်၊ အုဝ် ဒီ ဝျီ့ ဝိဝ် တူတ့် ဒီ မဲ။’

30 ဒူအီ တွိုန် ယီ တူ နှဝ့်။ အန် ဝီ ဟာဝ် ဒီ ဒါ တာင်၊ တဲး ဂေ ခြွင့် ဂိုက် တီ ခဲင် ကာပိုမ်၊ တဲး အန် ကွယ် ကော ဇမ် အာခြာဝ် ဒီ ကာလွာ့ တူတ့် ခဲ့ ပီ ထုက် အန်။ 31 န့ ယီ မိုဝ်း ဂေ ဒဲစေန့် ခုန်ဒီခမ် တွိုန်၊ ဂေ ဘော နပ် လွင် အန် တီ၊ ဂေ ဘော ရူ။ ဂေ ဝီ ဟာဝ် ဒူင် ကွယ် ခုန်ဒီခမ် ဂေ၊ ဝီ ခဲ တူတ့် ဒွန် မျုဝ် လွင် အန် တီ။

32 ပန် တီ ခုန်ဒီခမ် ဝီ ဒဲ့ ဒါ အီ ထုက် အန် တွိုန် တဲး အန် တး ဒူင် ကွယ် အန်။ အန် ဝီ တဝ်း၊ ‘မဲ မုး ဒဲစေန့် အုဝ်၊ အီ ဟဲ့ ဟာယ် ကာဆဝ်။ အုဝ် ဟဲ့ ထာယ် တူတ့် ရွိုန် ပီ ကာရဝ်း မဲ ဒီ အုဝ်၊ တူ မှာန့် မဲ ဒွါ ဝိဝ် ဒီ အုဝ်။ အုဝ် ဟဲ့ ဘူင် ပါယ် တီ ကူပ် ဒွင်ဘာန် ကာဆဝ် မဲ ဒီ အုဝ်။ 33 မဲ ယီ တူ ဝီ ကာဝေ ဂိုက် မဲ။ မဲ တူ ဝီ ဘူင် ဒီ အန် ပီ ပီ ဘူင် အုဝ် ဒီ မဲ။’ 34 ခုန်ဒီခမ် တွိုန် မိူဝ် ဟဲ့ ရူ ကာဆဝ်၊ ဝီ စ်ု ဂေ အီ ဘ်ု ကာပိုမ် တး ဒိုဝ်း ဟာဝ် ဒူအီ တီ၊ တဲး အန် ခမ် ဒုက် တာင်၊ တဲး ကော ဇမ် အာခြာဝ် ဒီ ကာလွာ့ တူတ့် ခဲ့ ပီ ထုက် အန်။

35 ဘော ဂုန့် အုဝ် အီ ကွယ် ဂါင်ဟြာဝ် ဒီ ဘူင် ပါယ် တီ ဒီ ဘေ ဒွန် အီ။ ဆေ ဘေ တူ ဘ့လွာ့ ဝဲန် မှာပ် ဘီနွင် ဘေ ခါခ်ု၊ အန် မိူဝ် တူ ဘ့လွာ့ ဝဲန် မှာပ် ဘေ။”