မ်ထ 15

လွင် ဟိတ် ဂေ ဒူအီ ယူဒါ

1 န့ ယီ မိုဝ်း ဒူအီ ခဲင် ဖိုင် ဖာရီဆဲ မင် အီ ဘော ဂေ ဒါ ဆာရာ အီ မာနုဝ် ဒါရာ ယူဒါ မင် အီ၊ ဂေ ဟဲ့ လေး ခဲင် မိူင် ယေရူဆာလဲမ်၊ ဝီ တး ဇမ် ဒူင် ကွယ် ဇဝ် ယေဆူ။ 2 ဂေ ဒီမွှတ် အန် တဝ်း၊ “မှဝ် န့ ပါယ် ပီ ဝဲန် ဂေ ဒီဘဲ မဲ ဟိတ် ဒါ တာင် အီ ကွယ် ဒေါ မွိုန်။း ဂေ တူ ဘာယ် ဒဲ ဂေ အာတ့် ဟူမ် ဂေ ဘူမ်၊ တဲး န့ ပီ ပီ မှာန့် ဟိတ် အေ။ အာတီ အာဝ် မွှိုမ်။”

3 ဇဝ် ယေဆူ ဝီ တဝ်း၊ “ဆေ န့ မုး ဘေ၊ မှဝ် န့ ပါယ် ပီ ဝဲန် ဘေ ဒါရာ ဇဝ်ဖြာ ကူပ် ဒူပ် ဘေ ဟိတ် ဘေ။း ဘော အာတီ အာဝ် မွှိုမ်။ 4 ခုဝ်၊ ဇဝ်ဖြာ ဟဲ့ တဝ်း၊ ‘တဲး ဘေ ရုဝ်ဆေ ဂုန့် မာ ဘေ။’ အန် ဘော တဝ်း၊ ‘အာဆေ ဒိူင် ဂုန့် မာ အန်၊ အန် လုဝ် ယမ်။’ 5 ဘေ ယီ တူ မာနုဝ် ပါယ် တီ။ ဆေ န့ မိုဝ်း ဒူအီ အူ ဝီ တဝ်း ဒီ ဂုန့် မာ အန်၊ ‘ပီ လုဝ် ဒွါ အုဝ် ဒီ ဘာယ်၊ အုဝ် အာဝ် ဟူ မိုဝ်း ဒီ ဒွါ။ အုဝ် ဟဲ့ ဟွတ့် လှူ ဒီ ဇဝ်ဖြာ၊’ အန် တူ ရုဝ်ဆေ ဂုန့် မာ အန်။ 6 ဘေ ယီ တဝ်း၊ ပီ ဘူင် အန် ဟဲ့ မှာန် ဟဲ့ မုး။ ပါယ် တီ ဘေ နပ် ဒီ ဝဲန် ဂြုဝ်း ဇဝ်ဖြာ၊ ယီ ဒူပ် ဟိတ် ဘေ။ 7 ဘေ မုး ဒူအီ ညိုင်ရာင် ဘွတ်။ အာအီဆာယ ဟဲ့ ကာလာင် ဂြုဝ်း မှာန် ဒေါ တဝ်း အန် လွင် ဘေ၊

8 ‘မီ မူတ့် ဂေ တဝ်း၊ ဂေ ရုဝ်ဆေ အုဝ်။ ခဲင် နဝ်း၊ ဂေ ယီ တူ နမ်လှုဝ်း အုဝ်။ 9 ဂေ ကြိုပ် အုဝ် ပီယေန့်။ ပီ မာနုဝ် ဂေ၊ န့ တူ မုး ဒါရာ အုဝ်။ န့ မုး ဒါရာ ပီ ဘူင် ဂေ ဒူအီ။’”

10 ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ ဒီ ဒါ တာင် တွိုန်၊ အန် ဝီ ဒဲ့ ဂေ ဒူအီ ကိူန်၊ တဲး ဂေ ထူမ် ဂြုဝ်း အန်။ အန် ဝီ တဝ်း၊ “ဘေ ထူမ်၊ တဲး န့ ဘော လိုဝ်း ဒီ နဝ်း ဘေ။ 11 ပီ ဒီ ဟူမ် အီ လိုပ် ခဲင် ဒုဝ် ဘူင့်၊ န့ တူ ပဲ ဒီ ဘူင် တဲး ဒူအီ တူ ဘွတ်။ န့ ယီ မုး ပီ ကာလာင် အန်၊ အီ လေး ခဲင် နဝ်း အန်၊ ဇိုဝ် တီ တဲး ဒူအီ မိုဝ်း မှာပ်၊ ဘဲန် ဒူအီ တူ ဘွတ်။”

12 ဇဝ် ယေဆူ ဟဲ့ ဟွတ့် တဝ်း ပါယ် တီ၊ ဂေ ဒီဘဲ အန် ဝီ တး ဒူင် ကွယ် အန်၊ ဝီ တဝ်း၊ “မဲ ဟဲ့ ယိုဝ်၊ ဂေ ဒူအီ ခဲင် ဖိုင် ဖာရီဆဲ၊ ဂေ တူ အိုင် ဂြုဝ်း မဲ တီ။း”

13 ဇဝ် ယေဆူ ဝီ တဝ်း၊ “ဆေ န့ မိုဝ်း ဒူအီ အီ တူ မာနုဝ် ဆီချာ လွင် ဇဝ်ဖြာ၊ ဇဝ်ဖြာ ဒီ ဝဲန် ဂြုဝ်း ဒူအီ တီ၊ တဲး န့ ပီ ဒူအီ အီ ရိုတ့် ဝဲန် ဒဝ် ပီ တူ ဆမ် အန်၊ တဲး ဘော ဒဝ် ဘော ရျီး အန် လေး၊ တဲး န့ စှိုမ်။ 14 ဘေ တူ လုဝ် ထူမ် ဂြုဝ်း ဂေ ဒူအီ ခဲင် ဖိုင် ဖာရီဆဲ တွိုန်။ ဂေ ပီ ဒူအီ ငါယ် အပ် အီ ထေဝ် ဒီ ယဲတ့် အီ ဟဝ်။ ဆေ ဒူအီ ငါယ် အပ် တဝ်း ဒီ ယဲတ့် ဒူအီ ငါယ် အပ် ပေါ အူ ဝီ၊ ဂါယ် ဘော အာ ဝီ ဒီ စုဝ်း ခဲင် ကာဒဝ်။”

15 အာပေတာရူ ဝီ တဝ်း၊ “တဲး မဲ ကာလာင် ဒီ ယေ လွင် ဒါင် အူဖာမာ တီ။”

16 ဇဝ် ယေဆူ ဝီ ဒီမွှတ် ဂေ တဝ်း၊ “မှဝ် န့ ပါယ် ပီ တူ မိုဝ်း ဘေ အာငျာန်။း 17 မှဝ် န့ ပါယ် န့ တူ လိုဝ်း ဒီ ဘေ လွင် ဂြုဝ်း အုဝ် တွိုန်။း မာဆေ အီ လိုပ် ခဲင် ဝတ့်၊ န့ ဝီ လေး ခဲင် ဝတ့်။ 18 န့ ယီ မုး ဂြုဝ်း အီ လေး ခဲင် မူတ့် အီ၊ န့ ဘော လေး ခဲင် နဝ်း။ မျုဝ် အီ လေး ခဲင် နဝ်း တီ၊ န့ တဲး ဒူအီ တူ ဘွတ်။ 19 ဆေ ဒူအီ ဇေန့်ဇာ နာ တူ မွှိုမ်၊ ဆေ ဂေ ဆီ ငဝ်း ဝဲန် အီ ဟဝ်၊ လုတ့် အီဘိုန့် အီ၊ ဘူင် မွှိုမ် ကာအိး၊ ပြာ ကြုဝ် အီ၊ ဘဲန် ဆက်ဆေ အီ ကာလုဝ်၊ ကာလာင် ဂြုဝ်း တူ မွှိုမ် လွင် အီ၊ 20 ပီ ဘူင် ဂေ ဇိုဝ် တီ၊ န့ လေး ခဲင် နဝ်း အီ၊ တဲး ဒူအီ တူ ဘွတ်။ ဆေ ဒူအီ ယီ တူ ဘာယ် ဒဲ အန် အာတ့် ဟူမ် အန် ဘူမ်၊ န့ တူ တဲး အန် ဘဲန် ဒူအီ အာဝ် ဘွတ်။” ခဲ့ တီ ဇဝ် ယေဆူ ဝီ ကာလာင် ဒီ ဒီဘဲ အန်။

လွင် အီဘိုန့် အီ ညှိုမ် ဆီချာ ဇဝ် ယေဆူ

21 ဝါယ် အန် တီ ဇဝ် ယေဆူ လေး ဒူင် ကွယ် အန် တွိုန်၊ ဝီ ဟာဝ် ဇမ် ကာတတ် မိူင် ထူရုဝ် ဂါယ် မိူင် ဆီဒူန်။ 22 န့ ယီ မိုဝ်း အီဘိုန့် အူ ဝီ၊ အန် မုး ဒူအီ အာမျုဝ် ကာနန့် အီ ကွယ် ကာတတ် ဒူင် တး ဇဝ် ယေဆူ။ အန် ဝီ တး ဒူင် ကွယ် ဇဝ် ယေဆူ ဝီ တဝ်း ဒီ အန်၊ “မဲ ဇဝ်၊ မဲ မုး လှုက်လှာန် အာဒါဝိတ် တွိုန်၊ တဲး မဲ ကာဝေ အုဝ်။ ဂွန် အီဘိုန့် အုဝ် မိုဝ်း ကာနမ် ခဲင် ဒုဝ် အန်။ ကာနမ် တီ ဒွါ ဒုက် ဘဲန် မျုဝ် ဘဲန် မျုဝ် ဒီ အန်။”

23 ဇဝ် ယေဆူ တူ ဝျီ့ ဂြုဝ်း အန် တီ။ ပန် တီ ဒီဘဲ အန် ဝီ တး ဒီ အန် တဝ်း၊ “တဲး မဲ ကာလာင်၊ တဲး အန် ဝေန့်။ ယုဝ် အန် ဒူပ် အေ၊ ဒီ ဘော ဒဲ့ မဲ ဆေဆေ။”

24 ဇဝ် ယေဆူ ဝီ တဝ်း၊ “ဇဝ်ဖြာ ဟဲ့ တိုယ် အုဝ် တဲး အုဝ် စွယ် မီ ဂေ ဒူအီ အီဆာရေလ။ ဂေ ပီ မာဘူ အီ ဘျုဝ်း။”

25 အီဘိုန့် တွိုန် ယီ တး၊ ခြိုပ်ခြဝ် ဒီ အာတ့် ဇဝ် ယေဆူ။ အန် တဝ်း၊ “မဲ ဇဝ်၊ စွယ် အုဝ်။”

26 ဇဝ် ယေဆူ ဝီ တဝ်း ဒီ အန်၊ “ပီ ဒီ လုဝ် ဒွါ ဂွန် ဟူမ်၊ အာဝ် ကာအာပ် ဒွါ မာဆုဝ် ဟူမ်။ ပါယ် တီ ဘော အုဝ် အာဝ် ကာအာပ် စွယ် ဒူအီ အီ တူ မုး အာမျုဝ် အီဆာရေလ။”

27 အီဘိုန့် တွိုန် ဝီ တဝ်း၊ “ဂြုဝ်း ပီ ကာလာင် မဲ ဇဝ် တီ ဟဲ့ မှာန်။ မာလဲ၊ မာဆုဝ် ယီ ပွိုန် ဘ်ု ဒီ လျီ့ ဟူမ် ဘူမ် ဘြတ် ဒါ ကာညာ အန်။”

28 အန် ဟဲ့ ဟွတ့် ကာလာင် ဂြုဝ်း တီ၊ ဇဝ် ယေဆူ ဝီ တဝ်း၊ “အိုယ် ဂိုန့်၊ မဲ ဟဲ့ ညှိုမ် ဆီချာ။ န့ ဒီ ဘဲန် ခဲ့ ပီ မှာန့် မဲ ဒီ အုဝ် တီ။” ဆိန့် ဒေါ ကာလာင် ဇဝ် ယေဆူ ဂြုဝ်း တီ၊ ဂွန် အီဘိုန့် အန် တွိုန် ဟဲ့ ကဲန် အူ ဇေန့်။

လွင် ဇဝ် ယေဆူ ဟျီင် ဒူအီ ဖွုန် ဟြဲန့် ဝီ

29 ဝါယ် အန် တီ ဇဝ် ယေဆူ လေး ဒူင် ကွယ် အန် တွိုန်။ ဘော အန် ဘော ဒီဘဲ အန် ဝီ ဟာဝ် ဇမ် ဒီ ခူပ် အိုမ် ဒိုင် ဂါလီလေ။ ဟဲ့ ဟွတ့်၊ အန် ဝီ ဟုဝ့် တုတ့် ဒဲင် နွန်။ 30 န့ ဝီ မိုဝ်း ဒူအီ ကိူန် ကာဆဝ်၊ ဂေ ဝီ တး ဒူင် ကွယ် အန်၊ ဝီ တိုယ် ဂေ ဒူအီ ဆဝ် ဘော ဒူအီ ပ့လဝ် ယမ်၊ ဒူအီ ငါယ် အပ်၊ ဒူအီ စှေ၊ ဒူအီ တူ ပွိုန် ကာလာင် ဂြုဝ်း ဘော ဂေ ဒူအီ မိုဝ်း ဆဝ် ဘဲန် မျုဝ် ဘဲန် မျုဝ်။ ဂေ တး တိုယ် ဒူအီ ဇိုဝ် တီ၊ တဲး ဂေ ဇမ် ဒီ အာတ့် ဇဝ် ယေဆူ။ အန် မိူဝ် တဲး ဂေ ကဲန် ဒွန် အီ။ 31 ဂေ ဒူအီ ကိူန် ယီ ယိုဝ် ဂေ ဒူအီ တူ ပွိုန် ကာလာင် ဂြုဝ်း၊ ဂေ ဝီ ကာလာင် ဆီချာ။ ဂေ ဒူအီ စှေ ဝီ ဆီချာ၊ ဂေ ဒူအီ ပ့လဝ် ယမ် ဝီ ပွိုန် ဟာဝ်၊ ဂေ ဒူအီ အီ ငါယ် အပ် ဝီ ပွိုန် ယိုဝ်။ ခဲ့ ကွယ် ဂေ အီ ယိုဝ် လွင် အန် တီ၊ ဂေ ဝီ အာမ် ကာဆဝ်၊ ဝီ အိူပ် ဇဝ်ဖြာ အီ မုး ဇဝ်ဖြာ ပီ ကြိုပ် ဂေ ဒူအီ အီဆာရေလ။

32 ပန် တီ ဇဝ် ယေဆူ ဝီ ဒဲ့ ဒီဘဲ အန် တဲး ဂေ တး ကာတတ် အန်။ အန် ဝီ တဝ်း ဒီ ဂေ၊ “အုဝ် ကာဝေ ဂေ ဒူအီ အီ ကွယ် ဒီ နီ။ ဂေ ဟဲ့ ဒူပ် အုဝ် အာဒါ အူယ် ဆီငဲ။ ဂေ ယီ တူ မိုဝ်း ဒီ ဟူမ် မာဆေ။ အုဝ် တူ ဆီ တဲး ဂေ ဝေန့် ကာင် ဂေ ဒေါ ကာပြာန့် ဂေ ပီ ဒီ ဟူမ်။ ယုဝ် ဂေ ဒီလှး ကေး ဒေါ ဟာဝ် ဂေ ဒူပ် န့တေန့်။”

33 ဂေ ဒီဘဲ အန် ဝီ တဝ်း၊ “ဒူင် ကွယ် အေ နီ ဟဲ့ ကာတူင့် မိူင်။ ခဲင် ပြဲ ကာဟဝ်း နီ၊ မှဝ် အေ ဒီ ပါယ် ဒီ စိုဝ်း ပီ ဒီ ဟူမ် ခဲ့ ပီ လုဝ် အေ၊ တဲး ဂေ ဒူအီ ကိူန် ဟူမ် ဖဲ။း” 34 ဇဝ် ယေဆူ ဝီ ဒီမွှတ် တဝ်း၊ “ခါမုန် နှာင် ဘူင့် ဘေ မိုဝ်း။း” ဂေ ဝီ တဝ်း၊ “ဘူ ဘူင့်။ ဘော မာဂါ ဒီတဲတ် မင် ဒုဝ် ဟဲ့ မိုဝ်း။” 35 ပန် တီ ဇဝ် ယေဆူ စ်ု ဂေ ဒူအီ ကိူန် တဲး ဂေ တုတ့် ဒဲင် ကာဒါယ်။

36 အန် ဘော ဝီ ဒိုဝ်း ခါမုန် ဘူ ဘူင့် ဘော မာဂါ တွိုန်၊ ဝီ ဒါင် ဂုင် ဂေဇူ ဒီ ဇဝ်ဖြာ၊ ဝီ ကာဘက် ခါမုန် ဂေ မာဂါ။ ဟဲ့ ဟွတ့်၊ အန် ဝီ ဒွါ ဒီ ဂေ ဒီဘဲ အန်၊ တဲး ဂေ ဝီ ဒွါ တူတ့် ဒီ ဒူအီ ကိူန်။ 37 ဂေ ဘောကာဂ့လျီတ် ဝီ ပွိုန် ဒီ ဟူမ် ဖဲ။ ဟဲ့ ဟွတ့် ဟူမ်၊ ဂေ ဒီဘဲ ဇဝ် ယေဆူ ဝီ ကာဇု ကာလူယ် ဟူမ် ဂေ၊ ကော နုဝ့် ဘူ ခွန်။ 38 န့ ဘော မိုဝ်း အီမာယ် ဖွုန် ဟြဲန့် အီ ဟူမ် ဖဲ။ တူ တိး အီဘိုန့် ဂေ ဂွန်။ 39 ပန် တီ ဇဝ် ယေဆူ စ်ု ဂေ ဒူအီ ကိူန် ဝေန့် ကာင် ဂေ။ ဟဲ့ ဟွတ့်၊ အန် ဝီ လိုပ် ခဲင် ရိုဝ်၊ ဝီ ပဝ့် ဟာဝ် တဲး အန် ဇမ် ကာတတ် မိူင် မာဂါဒါန်။