မ်ထ 14

လွင် ဒါ ဆာရာ အာယောဟာန် ဟဲ့ ယမ်

1 ဝါယ် အန် တီ န့ မုး ခုန်ဒီခမ် အာဟေရူတ် တွိုန်။ အန် မုး ဒါ ကာညာ အီ အိုပ် ဖွုန် မိူင်။ အန် ဘော နပ် ဘဲန် မျုဝ် ဘဲန် မျုဝ် ပီ ကာလာင် ဂေ ဒူအီ လွင် ဇဝ် ယေဆူ။ 2 အန် ဝီ တဝ်း ဒီ ဒဲစေန့် အန်၊ “ဒါ ဆာရာ အာယောဟာန် အီ စိုပ် ဒူအီ ခဲင် အိုမ် တွိုန်၊ အန် ဟဲ့ ဟွတ့် ယမ်။ အုဝ် ယီ ထာင် အာယေဆူ တီ၊ အန် မုး ဒါ ဆာရာ အာယောဟာန် တွိုန်၊ အီ ဟဲ့ ဝီ ယိတ့် ဝီ အိမ်။ ခုဝ်၊ အာယေဆူ တီ၊ အန် မိုဝ်း ပွုန် အီ တဲး အန် ဘူင် နာ မွှိုမ် အာမ် ကာဆဝ် ဘဲန် မျုဝ် ဘဲန် မျုဝ်။”

3 အာဟေရူတ် ဟဲ့ ကာလာင် ဂြုဝ်း တီ ကူပ် လှုဝ်း အန် ပီ ဒွိုမ် ဘူင် အန် ဒီ အာယောဟာန် တွိုန်။ အာဟေရူတ် ဟဲ့ ဒွိုမ် စ်ု အီ မှေတ့် ပက် အာယောဟာန်၊ ဝီ ခြွင့် အန် ခဲင် ကာပိုမ်။ အန် ဟဲ့ ဘူင် ပါယ် တီ ကူပ် ဂြုဝ်း ပီ ဒွိုမ် ကာလာင် အာယောဟာန် ဒီ အာဟေရူတ် လွင် နာင် ဟေရုဝ်ဒီ တွိုန်။ နာင် ဟေရုဝ်ဒီ ဟဲ့ ဒွိုမ် မုး အီဘိုန့် ဝါ အာဟေရူတ် အီ စိူဝ် အာဖီလိပ်။ အာဟေရူတ် ယီ ဝီ ဖာတ် နာင် တီ၊ တဲး အန် ဘဲန် အီဘိုန့် အန်။ 4 ခုဝ် အန် တီ အာယောဟာန် ဟဲ့ ဝီ ကာလာင် ဒီ အာဟေရူတ်၊ “ပီ ဘူင် မဲ၊ န့ တူ ဒူပ် ဒါရာ။ အာဝ် ပွိုန် ဖာတ် အီဘိုန့် ဝါ မဲ၊ တဲး အန် ဝီ ဘဲန် အီဘိုန့် မဲ။” 5 ကူပ် န့ ပါယ် တီ၊ အာဟေရူတ် ဆီ ငဝ်း အာယောဟာန်။ အန် ယီ တူ ယ ဘူင်။ အန် ယုဝ် ဂေ ဒူအီ ကိူန်။ ဂေ ထာင်၊ အာယောဟာန် မုး ဒူအီ အီ ဘျာန် ဂြုဝ်း ဇဝ်ဖြာ။

6 ဒေါ ကွယ် အာယောဟာန် ခဲင် ကာပိုမ် တွိုန်၊ န့ ဇမ် ဆီငဲ ဘူင် ဂေ ဘ့လွယ် လှုဝ်း ဆီငဲ ဂွိုတ် အာဟေရူတ်။ ဒေါ အန် တီ န့ မုး ဂွန် အီဘိုန့် နာင် ဟေရုဝ်ဒီ တွိုန်။ အန် တး လိုပ် ဘ့လွယ် တီ ဘော ဂါ ဒီ အာတ့် ခဲတ့် ဒွန် အီ။ န့ ဘော လဝ့် နဝ်း အာဟေရူတ်။

7 ခုဝ်၊ အန် ဒိူင် တဝ်း ဒီ ဂွန် တွိုန်၊ “တဲး မဲ မှာန့် ခဲ့ ပီ ဆီ ပွိုန် မဲ။ ဆေ အုဝ် တူ ဒွါ ပီ မှာန့် မဲ၊ တဲး ကာဒါယ် ညွှတ် အုဝ်။” 8 ဝါယ် အန် တီ မာ အန် ဝီ ကာလာင် ဒီ ဂွန် အီဘိုန့် တွိုန် ပီ လုဝ် မှာန့် အန်။ ဟဲ့ ဟွတ့် အန် ဝီ ဟာဝ် ဒီ အာဟေရူတ် တဝ်း၊ “တဲး မဲ ဒိုဝ်း ဂိန့် ဒါ ဆာရာ အာယောဟာန်၊ အီ စိုပ် ဒူအီ ခဲင် အိုမ် တွိုန်။ တဲး မဲ ဘ့လေး ဒဲင် ဖာန်၊ ဒွါ ဒီ အုဝ်။” 9 အန် ဟဲ့ ဟွတ့် ကာလာင် ဂြုဝ်း တီ၊ အာဟေရူတ် ဘော က့လိုဝ်။ ကူပ် ဒိူင် အန် ဒီ အာတ့် ခဲတ့် အန်၊ အန် ယီ ဒွါ အာမိင်၊ တဲး ဂေ ဘူင် ပီ အိုင် ဂွန် အီဘိုန့် တီ။ 10 အန် ဘော စ်ု ဂေ ဟာဝ် ခဲင် ကာပိုမ်၊ ဒဲပ် ဂိန့် အာယောဟာန် တွိုန်။ 11 ဟဲ့ ဟွတ့်၊ ဂေ ဘ့လေး ဂိန့် အာယောဟာန် ဒဲင် ဖာန်၊ ဝီ ဒွါ ဒီ ဂွန် အီဘိုန့် တွိုန်။ ဂွန် တွိုန် ဝီ ဒွါ ဂိန့် တီ ဒီ မာ အန်။ 12 ဂေ ဒီဘဲ အာယောဟာန် ယီ တး ဒိပ် ဒုဝ် ဘူင့် အန်။ ဟဲ့ ဟွတ့်၊ ဂေ ဝီ ဟာဝ် ဒူင် ကွယ် ဇဝ် ယေဆူ၊ ဝီ ခဲ ဒီ အန် လွင် အန် တီ။

လွင် ဇဝ် ယေဆူ ဟျီင် ဒူအီ ဖန် ဟြဲန့် ဝီ တဲး ဂေ ဟူမ် ဖဲ

13 ဇဝ် ယေဆူ ဟဲ့ ဟွတ့် နပ် လွင် ဒါ ဆာရာ အာယောဟာန် တွိုန်၊ အန် ဝီ လိုပ် ခဲင် ရိုဝ်၊ ဝီ ဟာဝ် ပေါ အူ ပ့လုဝ့် ဒူင် တူ မိုဝ်း ဒူအီ။ ဂေ ဒူအီ ကိူန် ယီ နပ် လွင် အန် တီ၊ ဂေ ဝီ လေး ခဲင် မိူင် ဂေ၊ ဝီ ဟာဝ် ဒီ ပ့လဝ်၊ ဒူပ် ဇဝ် ယေဆူ၊ တဲး ဂေ ဝီ ဇမ် ဒူင် ကွယ် အန်။ 14 ဒေါ လေး ဇဝ် ယေဆူ ခဲင် ရိုဝ်၊ အန် ဝီ ယိုဝ် ဂေ ဒူအီ ကိူန် ဘော ဝီ ကာဝေ ဂေ။ ခုဝ်၊ အန် ဝီ ပီကဲန် ဒူအီ ဆဝ် အီ ဟဲ့ တး ဒူပ် အန်။

15 ဘာ ဒီ အပ်၊ ဂေ ဒီဘဲ အန် ဝီ တး တဝ်း ဒီ အန်၊ “ဒီ နီ မုး ဒူင် တူ မိုဝ်း မာဆေ။ အာဝ် လှေန့် ပြဲ ဒီ အပ်။ တဲး မဲ စ်ု ဂေ ဟာဝ် ခဲင် ရဝ် အီ ကွယ် ကာတတ် ဒီ နီ၊ တဲး ဂေ ပွိုန် ဒီ ဟာဝ် စိုဝ်း ပီ ဒီ ဟူမ် ဂေ။”

16 ဇဝ် ယေဆူ ဝီ တဝ်း၊ “ဂေ တူ လုဝ် လေး ဒူင် ကွယ် အေ နီ။ တဲး ဘေ ဒွါ ပီ ဒီ ဟူမ် ဒီ ဂေ။” 17 ဂေ ဝီ တဝ်း၊ “ယေ မိုဝ်း ခဲ့ ခါမုန် ဖန် ဘူင့် ဘော မာဂါ အာ ဒုဝ်။” 18 ဇဝ် ယေဆူ တဝ်း၊ “တဲး ဘေ ဒိုဝ်း ပီ ဒီ ဟူမ် တီ၊ ဒွါ ဒီ အုဝ်။”

19 ဟဲ့ ဟွတ့်၊ အန် ဝီ စ်ု ဒူအီ ကိူန် ဂေ တီ၊ တဲး ဂေ တုတ့် ဒဲင် ပေတ့်။ ပန် တီ အန် ဝီ ဒိုဝ်း ခါမုန် ဖန် ဘူင့် ဘော မာဂါ အာ ဒုဝ် တွိုန်၊ ဝီ ဆာကိုဝ်း ယွတ် ဂါင်ဟြာဝ်၊ ဝီ ကာလာင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ဝီ ကာဘက် ခါမုန်၊ ဝီ ဒွါ ဒီ ဒီဘဲ အန်၊ တဲး ဂေ ဝီ ကာဆာင် ဒွါ ဒီ ဒူအီ ကိူန် ဂေ တွိုန်။ 20 ပါယ် တီ၊ ဂေ ဘောကာဂ့လျီတ် ပွိုန် ဒီ ဟူမ် ဖဲ။ ဂေ ဒီဘဲ အန် ဝီ ဂဲပ် ကာဇု ကာလူယ် ဟူမ် ခဲင် ကာတဲပ်၊ ကော ပွိုန် ဂိုဝ် ဒီ အာ ကာတဲပ်။ 21 ဂေ ဒူအီ အီ ဟူမ် ရိုမ် မိုဝ်း အီမာယ် ကာဘက် ဖန် ဟြဲန့် ဝီ၊ အာဝ် ဘာ့ အီဘိုန့် ဂေ ဂွန်။

လွင် ဇဝ် ယေဆူ ဟာဝ် ဒဲင် အိုမ်

22 ဂေ ဒူအီ ကိူန် ဟဲ့ ဟွတ့် ဟူမ် ဖဲ၊ ဇဝ် ယေဆူ ဝီ စ်ု ဒီဘဲ အန် လိုပ် ခဲင် ရိုဝ် အူ ဇေန့်၊ တဲး ဂေ ပဝ့် ဟာဝ် ဘ့လာက် နာ တ။ အန် တဲး ဂေ ယဲတ့် ဒီ အာတ့်။ ဒေါ ဟာဝ် ဂေ၊ အန် တဝ်း ဒီ စ်ု ဘော ဒူအီ ကိူန် ဂေ တွိုန် ဝိဝ် ဒူင် ကွယ် ဂေ။ 23 ဂေ ဟဲ့ ဟွတ့် ဝိဝ်၊ အန် ဘော ဝီ ဟုဝ့် ဒဲင် နွန်၊ တဲး အန် ပွိုန် ဒီ ကွယ် အန် အူ ဝီ၊ ဆာခိုဝ် ဒီ ဇဝ်ဖြာ။ အန် ဘော ကွယ် ဒူင် တီ ဒေါ ဟဲ့ အပ် ပြဲ။ 24 ရိုဝ် ပီ ပဝ့် ဂေ ဒီဘဲ အန်၊ န့ ဟဲ့ ကွယ် ကာတဲ အိုမ်။ ခုန် ဒီယုး ရိုဝ် ကူပ် လုဝ် ဟာဝ် ဂေ နာ ကွယ် ခုန်။

25 ဆိန့်ဝး စေဝ်၊ ပြဲ ညှမ် ဘ့လာင်၊ ဇဝ် ယေဆူ ဝီ ဟာဝ် ဇမ် ဒူင် ကွယ် ဂေ။ အန် ဘော ဟာဝ် ဒဲင် အိုမ်။ 26 ဂေ ဒီဘဲ အန် ဘော ယိုဝ် ဇဝ် ယေဆူ ဒေါ တး အန် ဟာဝ် ဒဲင် အိုမ်၊ ဂေ ဘော ယုဝ် ကာဆဝ်။ ဂေ ဝီ တဝ်း၊ “န့ မုး ကာပြဝ်။” ဂေ ဘော ဒတ် တာင် ကူပ် ယုဝ် ဂေ။

27 ဇဝ် ယေဆူ တဝ်း ဒီ ဂေ အူ ဇေန့်၊ “ကွဲ့ ယုဝ်။ န့ မုး အုဝ်။ တဲး ဘေ ဒါခိုယ်။”

28 အာပေတာရူ ယီ တဝ်း၊ “မဲ ဇဝ်၊ ဆေ ဟဲ့ မုး မဲ မိူဝ်၊ တဲး မဲ ဒဲ့ အုဝ် တး ဒီ မဲ၊ တဲး ဘော အုဝ် ဟာဝ် ဒဲင် အိုမ်။”

29 ဇဝ် ယေဆူ တဝ်း ဒီ အန်၊ “တး။” ပန် တီ အာပေတာရူ ဘော လေး ခဲင် ရိုဝ်၊ ဝီ ဟာဝ် ဒဲင် အိုမ်၊ ဟာဝ် ဒီ ဇဝ် ယေဆူ။ 30 အန် ယီ ယိုဝ် ခုန် ဘုတ်။ န့ တဲး အန် ယုဝ်။ ဒေါ အန် တီ အန် ကြဲ ဒီ စေတ့် ခဲင် အိုမ်။ အန် ဝီ ဒတ် တဝ်း၊ “မဲ ဇဝ်၊ ချွတ် အုဝ်။”

31 ဇဝ် ယေဆူ ဝီ ပါ ဒဲ အန် အူ ဇေန့်၊ ဝီ တဝ်း၊ “မဲ မုး ဒူအီ အီ ညှိုမ် အီ စဲက်၊ မှဝ် န့ ပါယ် ပီ ဘဲန် နဝ်း ကာလိင် ကာလဲ ဒီ မဲ။း”

32 ဝါယ် အန် တီ ဂါယ် ဝီ လိုပ် ခဲင် ရိုဝ်။ ခုန် ဘော ဝီ ယေန်။ 33 ဂေ အီ ကွယ် ခဲင် ရိုဝ်၊ ဂေ ဝီ ကြိုပ် အန်။ ဂေ တဝ်း၊ “ဟဲ့ မုး ဟဲ့ မှာန်၊ မဲ မုး ဂွန် ဇဝ်ဖြာ။”

34 ဂေ ဟဲ့ ဟွတ့် ပဝ့် ရိုဝ်၊ ဂေ ဝီ ချ ဒီ မိူင် ကေနေဆာရေတ်။ 35 ဂေ ဒူအီ အီ ကွယ် ခဲင် မိူင် တီ ဘော နပ်၊ ဟဲ့ မုး ဇဝ် ယေဆူ အီ ဟဲ့ တး၊ ဂေ ဝီ စ်ု ဒွန် အီ တဲး ဂေ ဝီ ကာလာင် ဒီ အီ ဟဝ်၊ တဲး ဂေ ဒူအီ ဘော မိူင် ကော နပ်။ ဂေ ဝီ တး တိုယ် ဒူအီ ဆဝ် အီ ကွယ် ကာတဲ ဂေ၊ တဲး ဂေ တး ဇမ် ဒူင် ကွယ် ဇဝ် ယေဆူ။ 36 ဂေ မှာန့် အန် ခ့ဝါင် တဲး ဒူအီ ဆဝ် ပါ ခြိုင် အန်။ ဟဲ့ ဟွတ့်၊ ဂေ ဒွန် အီ အီ ပါ ခြိုင် ဇဝ် ယေဆူ ဝီ ကဲန်။