မ်ဟ 149

မှုဝ် အီ အိူပ် ဇဝ်ဖြာ

1 တဲး အေ အိူပ် ဇဝ်ဖြာ။ တဲး အေ တဝ်း မှုဝ် ကာမာယ် အီ အိူပ် ဇဝ်ဖြာ။ တဲး အေ အိူပ် ပွုန် အန် ဇဝ် ကာတဲ ဂေ ဒူအီ ကိူန်။

2 တဲး ဂေ ဒူအီ အီဆာရေလ ဘော ဘျုဝ် ဒါခိုယ်။ ခုဝ်၊ ဇဝ်ဖြာ ဟဲ့ ဖာန် ဘ့လေး ဂေ။ တဲး ဂေ ဒူအီ အီ ကွယ် ဒီ နွန် ဇီအူန် မိုဝ်း နဝ်း ဒါခိုယ် ကူပ် မိုဝ်း ဂေ ခုန်ဒီခမ်။

3 တဲး ဂေ ဘော ဂါ ဘော အိူပ် ဇဝ်ဖြာ။ တဲး ဂေ က်ု ဂြိုင်၊ ဘး ဒိင်၊ တဝ်း မှုဝ် ဒီ ဇဝ်ဖြာ။

4 ခုဝ်၊ ပီ ဘူင် ဂေ ဒူအီ ပီ အိုပ် ဇဝ်ဖြာ ဟဲ့ လဝ့် နဝ်း အန်။ ဂေ အီ မိုဝ်း နဝ်း ဂူမ်၊ အန် ဇဝ် ဒီ ချွတ် ဂေ၊ တဲး ဂေ မိုဝ်း ဆာရေ။

5 တဲး ဂေ ဒူအီ အီ ဆီငါ ဘွတ် မိုဝ်း အာဖုင် ဒင်ခုဝ်၊ တဲး ဂေ ဘော ဒါခိုယ် ကာဆဝ် လွင် အန် တီ။ တဲး ဂေ တဝ်း မှုဝ် ဒါခိုယ် ဒေါ ကွယ် ဂေ ဒဲင် ကာစှူင့် အိတ် ဂေ။

6 တဲး ဂြုဝ်း အီ အိူပ် ဇဝ်ဖြာ အီ မိုဝ်း ပွုန် တာင် လေး ခဲင် မူတ့် ဂေ ဆေဆေ။ တဲး ဂေ ဘော ဂူင့် မာပွါ့ လာင် အီ မိုဝ်း ဘ့လာ အာ ဘ့လာက် ခဲင် ဒဲ ဂေ။

7 တဲး ဂေ ပွိုန် ဒီ ဝီ ဘူင် ဝျီ့ ဒီ ဒူအီ အာမျုဝ် ဟဝ်။ တဲး ဂေ ပွိုန် ဒီ ဒမ် မှာပ် ဒီ ဒူအီ အာမျုဝ် ဟဝ်။

8 တဲး ဂေ ပွိုန် ဒီ ပက် ခုန်ဒီခမ် ဒူအီ အာမျုဝ် ဟဝ်။ တဲး ဂေ ဘော ပွိုန် ဒီ စှိုပ် ဝန် ဟိန် ဒီ အာမူ အာမာတ် ဒူအီ အာမျုဝ် ဟဝ်။

9 တဲး ဂေ ဝီ ပွိုန် ဒီ ဒမ် မှာပ် ဒီ ဒူအီ တီ၊ တဲး န့ ပီ ပဲ့ ဟဲ့ ဒဲမ် အုန် ဇဝ်ဖြာ။ ပါယ် တီ၊ ဂေ ဒူအီ အီ ဆီငါ ဘွတ် ဟဲ့ မိုဝ်း အာဖုင် ဒင်ခုဝ် ပီ ဒွါ ဇဝ်ဖြာ ဒီ ဂေ။ တဲး အေ အိူပ် ဇဝ်ဖြာ။