မ်ဟ 148

လွင် ဒွန် မျုဝ် အီ ကွယ် ဒဲင် ကာဒါယ် ဘော ခဲင် ဂါင်ဟြာဝ် လုဝ် အိူပ် ဇဝ်ဖြာ

1 တဲး အေ အိူပ် ဇဝ်ဖြာ။ ဘေ အီ ကွယ် ခဲင် ဂါင်ဟြာဝ်၊ တဲး ဘေ အိူပ် ဇဝ်ဖြာ။ ဘေ အီ ကွယ် နာ ဒဲင်၊ တဲး ဘေ အိူပ် ဇဝ်ဖြာ။

2 ဘေ အာမူ အာမာတ် ဇဝ်ဖြာ ဒွန် ကာဒင်၊ တဲး ဘေ အိူပ် ဇဝ်ဖြာ။ ဘေ အီ ကွယ် ခဲင် ဂါင်ဟြာဝ်၊ တဲး ဘေ အိူပ် အန် ဇဝ်။

3 ဘော ဆီငဲ ဘော မာဂျီန်၊ တဲး ဘာယ် အိူပ် ဇဝ်ဖြာ။ ဘော ဘေ ဆီမန့် အီ ဘ့လာင် မာဘြိဝ်၊ တဲး ဘေ အိူပ် အန် ဇဝ်။

4 ဘော ဂါင်ဟြာဝ် အီ ကွယ် နာ ဒဲင်၊ တဲး မဲ အိူပ် ဇဝ်ဖြာ။ ဘော အိုမ် အီ ကွယ် ဒဲင် ဘ့လေန့်၊ တဲး မဲ အိူပ် အန် ဇဝ်။

5 ခဲ့ ကွယ် ဇိုဝ် တီ ဒွန် မျုဝ်၊ တဲး ဘေ ဘောကာဂ့လျီတ် အိူပ် ဇဝ်ဖြာ။ ခုဝ်၊ န့ မုး အန် ဇဝ် အီ ဟဲ့ ဒွါ အာမိင်၊ တဲး န့ မိုဝ်း တူတ့် ဒွန် မျုဝ်။

6 အန် ဇဝ် ဟဲ့ ဘ့လေး ဂေ၊ တဲး ဂေ ကွယ် ဆေဆေ။ ခဲ့ ပီ ဒမ် အန် တူ ဟြာယ် ဒေါ မှဝ်။

7 ဘေ အီ ကွယ် ဒဲင် ကာဒါယ်၊ တဲး ဘော ဘေ အိူပ် ဇဝ်ဖြာ။ ဘော ဘေ မာကြာယ် အီ ကွယ် ခဲင် အိုမ် နမ်မုက်ဆာရာ ဘော ကာဒမ် အိုမ် အီ လိုက် ကာဆဝ်၊ တဲး ဘေ အိူပ် တူတ့် ဇဝ်ဖြာ။

8 ဘော ပ့လ မ့ပ့လေတ့် ဂေ ဘျြီ၊ ဘော အိုမ် ဒါတ် အီ စုဝ်း ဘော န့အု၊ ဘော ခုန် အီ ထူမ် ဘူင် ဒူပ် ပီ ကာလာင် အန် ဇဝ်၊ တဲး ဘေ အိူပ် တူတ့် အန် ဇဝ်။

9 ဘော ဘေ နွန် တျီ့ နွန် တာင်၊ ဘော ဘေ ဟေ အီ မိုဝ်း ဘ့လေ ဘော ဟေ အာရိတ် အီ ကွယ် ခဲင် ပြဲ၊

10 ဘော ဒုဝ် ဆတ်ဒါဝါ အီ ကွယ် ခဲင် ပြဲ ဘော ဒုဝ် အီ ကွယ် ခဲင် ဒူင် နာ အီ တျီ့ အီ တာင်၊ ဘော ဒုဝ် အီ နပ် ဒီ ဘိုန့်၊ ဘော မာဆိမ် ဒွန် မျုဝ်၊ တဲး ဘေ အိူပ် တူတ့် ဇဝ်ဖြာ။

11 ခဲ့ ကွယ် ခုန်ဒီခမ် ဘောကာဂ့လျီတ်၊ ဘော ဒူအီ ဘော ရဝ် ဘော မိူင်၊ ဘော ဒါ ကာညာ ဂေ အာမူ အာမာတ် ဒွန် အီ၊

12 ဘော ကာညူမ် ဂေ ဒီဘျာ၊ ဘော ဒူအီ တာင် ဂေ ဂွန်၊ တဲး ဘေ အိူပ် တူတ့် ဇဝ်ဖြာ။

13 တဲး အာမျုဝ် တီ ဒွန် မျုဝ်၊ အိူပ် ဇဝ်ဖြာ။ ခုဝ်၊ န့ မိုဝ်း မီ အန် ဇဝ် အူ ကာဒင် တီ အီ မိုဝ်း ပွုန် လွှိုမ် တူတ့်။ အာဖုင် ဒင်ခုဝ် အန် ဇဝ် တီ ဘော အိုပ် ခဲင် ဂါင်ဟြာဝ် ဘော ဒဲင် ကာဒါယ်။

14 အန် ဇဝ် ဟဲ့ ဒွါ ပ့လူမ် ဂေ ဟဲန့် ဒီ ဒူအီ ပီ အိုပ် အန်။ ဂေ ဒူအီ အီ ဆီငါ ဘွတ်၊ ဂေ အီ မုး ဒူအီ ပီ ရွက့် အန်၊ အန် တဲး ဂေ အိူပ် အန်။ တဲး အေ အိူပ် ဇဝ်ဖြာ။