မ်ဟ 24

လွင် ခုန်ဒီခမ် တာင် ဒီ တး

အာဒါဝိတ် ဟဲ့ ဒဲမ် မှုဝ် နီ။

1 ပဲ့ ဟဲ့ ဘူင် ဇဝ်ဖြာ ဘော ကာဒါယ် ဘော မျုဝ် အီ ကွယ် ဒဲင် ကာဒါယ် နီ ဟဲ့ မုး တူတ့် ကြုဝ် ဇဝ်ဖြာ။ ဘော ဂေ ဒူအီ ဘဲန် မျုဝ် ဘဲန် မျုဝ် အီ ကွယ် ဒဲင် ကာဒါယ် ဟဲ့ မုး တူတ့် ကြုဝ် အန်။

2 ခုဝ်၊ ဇဝ်ဖြာ ဟဲ့ ဘ့လေး အုန် ကာဒါယ်၊ တဲး အန် ကွယ် ဒဲင် အိုမ် နမ်မုက်ဆာရာ၊ တဲး ဒင် အန် ကွယ် ခဲင် အိုမ် အီ ကွယ် နာ ခြိုမ်။

3 အာဆေ ဒီ ပွိုန် ဒီ ဟုဝ့် ဒီ နွန် ဘွတ် အီ မုး ဒူင် ကွယ် ဇဝ်ဖြာ။း အာဆေ ဒီ ပွိုန် ဒီ လိုပ် ဒူင် ဘွတ် အီ မုး ကာင် အန်။း

4 န့ ဘော မုး ဂေ အီ ဆီငါ ဘွတ်၊ အီ မိုဝ်း နဝ်း လုယ်၊ ဂေ အီ တူ ကြိုပ် အာရိုပ်၊ အီ တူ နပ် ဒီ ကာလုဝ်၊ ဂေ ဒီ ပွိုန် ဒီ လိုပ် ဒူင် ကွယ် ဇဝ်ဖြာ။

5 ဇဝ်ဖြာ ဒီ ဘော မွင့်ကာရာ ဒွါ ဒီ ဂေ ဒူအီ ဇိုဝ် တီ။ အန် ဇဝ် ဒီ ဘော ချွတ် ဂေ ဘော တဝ်း၊ ဂေ အာဝ် ဟူ မိုဝ်း မှာပ်။

6 ဂေ ဘော မုး ဒူအီ အီ ဆီ ညှိုမ် ဇဝ်ဖြာ၊ ဂေ ဒီ ဘော ကြိုပ် ဇဝ်ဖြာ ပီ ကြိုပ် အာကူပ်။

7 တဲး ဘေ ဝိုဝ်း မာလုဝ်း ဘြိမ်၊ အီ ကွယ် ဆိန့် ဒေါ မွိုန်။ ဝိုဝ်း၊ တဲး န့ ဝဝ်း၊ တဲး န့ တာင်၊ တဲး ခုန်ဒီခမ် အီ မိုဝ်း အာဖုင် ဒင်ခုဝ် တာင် ပွိုန် ဒီ လိုပ်။

8 ခုန်ဒီခမ် တီ၊ အန် မုး အာဆေ။း အန် မုး အန် ဇဝ် အီ မိုဝ်း အာဖုင် ဒင်ခုဝ် တာင် ကာဆဝ်။ အန် ဘော မုး အန် ဇဝ် အီ မိုဝ်း ပွုန် တာင်၊ အီ နပ် ဒီ ပဲ ရန်ဆူ အီ ဒီ ကာဂုဝ်း ဒီ အန်။

9 တဲး ဘေ ဝိုဝ်း မာလုဝ်း ဘြိမ်၊ အီ ကွယ် ဆိန့် ဒေါ မွိုန်။ ဝိုဝ်း၊ တဲး န့ ဝဝ်း၊ တဲး န့ တာင်၊ တဲး ခုန်ဒီခမ် အီ မိုဝ်း အာဖုင် ဒင်ခုဝ် တာင် ပွိုန် ဒီ လိုပ်။

10 ခုန်ဒီခမ် တီ၊ အန် မုး အာဆေ။း အန် မုး ဇဝ်ဖြာ အီ အိုပ် တူတ့် ဒွန် မျုဝ်။ အန် မုး ခုန်ဒီခမ် အီ မိုဝ်း အာဖုင် ဒင်ခုဝ် တာင်။