မ်ဟ 25

ပီ ဆာခိုဝ် တဲး ဇဝ်ဖြာ ယဲတ့်

အာဒါဝိတ် ဟဲ့ ဒဲမ် မှုဝ် နီ။

1 အိုယ် မဲ ဇဝ်ဖြာ၊ အုဝ် ဆာခိုဝ် ဒီ မဲ။

2 အုဝ် ဘိုင် မဲ ဇဝ်ဖြာ။ ကွဲ့ တဲး အုဝ် လုဝ် ဆာယ် အီ ဟဝ်၊ ကွဲ့ တဲး ဂေ ရန်ဆူ အုဝ် ပဲ အုဝ်။

3 ဂေ အီ နှဝ့် န့ဒဝ့် မဲ ဇဝ်ဖြာ၊ ဂေ တူ လုဝ် ဆာယ် ဒေါ မှဝ်။ န့ ယီ မုး ဂေ အီ တူ မိုဝ်း နဝ်း ဆိူဝ်၊ ဂေ အီ ဘူင် နာ တူ မွှိုမ် အီ တူ မိုဝ်း ဒီခုဝ်၊ ဂေ ဒီ လုဝ် ဆာယ် အီ။

4 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် မာနုဝ် အုဝ်၊ တဲး အုဝ် နပ် ဒီ ဘူင် ပီ အိုင် မဲ။ တဲး အုဝ် နပ် ဒီ ဒူပ် န့တေန့် ပီ ဘျ မဲ ဒီ အုဝ်။

5 မဲ ဇဝ် ယဲတ့် အုဝ် ဘော မာနုဝ် တဲး အုဝ် နပ် နာ မုး နာ မှာန်။ ခုဝ်၊ မဲ ဇဝ်ဖြာ ဘော မုး ဇဝ်ဖြာ အီ ချွတ် အုဝ်။ အုဝ် ဘော ညှိုမ် ဘိုင် မဲ ဇဝ် ဆေဆေ။

6 မဲ ဇဝ်ဖြာ၊ တဲး မဲ ဇဝ် ဝီ လှုဝ်း၊ အူ ဆိန့် ဒေါ မွိုန် မဲ မိုဝ်း နဝ်း ရွက့် ကာဝေ အီ ဆေဆေ။

7 ကွဲ့ တဲး မဲ ဇဝ် လှုဝ်း မှာပ် အုဝ် ဘော ပဲ့ ဟဲ့ ကာလိုပ် အုဝ် ဆိန့် ဒေါ နှိုမ် အုဝ်။ ပီ ဘူင် မဲ ဇဝ် ဒီ အုဝ်၊ တဲး န့ ကာဒါန် နဝ်း ရွက့် ကာဝေ မဲ ဒီ အုဝ်။ န့ မုး မဲ ဇဝ်ဖြာ အီ ဟဲ့ ဘွတ်၊ ဟဲ့ မွှိုမ်။

8 ကူပ် မိုဝ်း ဇဝ်ဖြာ နဝ်း ဘွတ် နဝ်း မွှိုမ်၊ အန် ဇဝ် ဘော ဘူင် နာ ဆိူဝ် နာ မှာန်။ ခုဝ်၊ အန် ဇဝ် ဘော မာနုဝ် ဂေ ဒူအီ မိုဝ်း မှာပ်၊ တဲး ဂေ ဒူပ် အန်။

9 ဇဝ်ဖြာ ဘော ယဲတ့် ဂေ အီ မိုဝ်း နဝ်း တျီမ်၊ တဲး ဂေ ဘူင် နာ မှာန်။ အန် ဘော မာနုဝ် ဂေ၊ တဲး ဂေ နပ် ပီ အိုင် အန်။

10 ဂေ အီ ဘူင် ဒူပ် တူတ့် ဒွန် မျုဝ် ပီ စ်ု ဇဝ်ဖြာ ဂေ ဘူင်၊ ဂေ အီ ဘူင် ဒူပ် ပီ လာယ် ကာဆဲန့် ဇဝ်ဖြာ ဘော ဂေ၊ ဂေ ဒီ ဘော နပ် ဆီချာ လွင် နဝ်း ဇဝ်ဖြာ အီ ရွက့်၊ အီ မှာန် ဆေဆေ။

11 အိုယ် မဲ ဇဝ်ဖြာ၊ မှာပ် အုဝ် ဟဲ့ ကိူန် ကာဆဝ်။ ခုဝ်၊ အုဝ် မှာန့် မဲ ဇဝ်ဖြာ၊ တဲး မဲ ဂဝ်း ဝဲန် မှာပ် အုဝ် ကူပ် မိုဝ်း မဲ နဝ်း ရွက့် ကာဝေ အီ။

12 အာဆေ ရုဝ်ဆေ ဇဝ်ဖြာ၊ ဇဝ်ဖြာ ဒီ မာနုဝ် အန်၊ တဲး အန် နပ် န့တေန့် အီ မွှိုမ် ဟာဝ်၊ မွှိုမ် ဒူပ်။

13 ဂေ ဒူအီ ဇိုဝ် တီ၊ ဂေ ဒီ ဘော ပွိုန် ဒီ ကွယ် ဆီချာ၊ မိုဝ်း ပီ ဒီ လုဝ် ဂေ။ ဘော လှုက်လှာန် ဂေ ဒီ ဘော ကွယ် ဒါခိုယ် ခဲင် မိူင် ဂေ။

14 ဂေ အီ ရုဝ်ဆေ ဇဝ်ဖြာ၊ ဂေ ဘော ပီ ဂိုက် အန်။ ဇဝ်ဖြာ ဒီ ဘော ဘူင် ခဲ့ ဒွါ အန် ကာဒိက် ဆတ်ဇာ ဒီ ဂေ။

15 အုဝ် ဘော လှုဝ်း ဇဝ်ဖြာ ဆေဆေ။ ခုဝ်၊ န့ မုး မီ အန် ဇဝ် အီ တဲး အုဝ် လွတ် အာဖေ အာရေ။

16 အုဝ် မှာန့် မဲ ဇဝ်ဖြာ၊ တဲး မဲ ယွတ် အုဝ်၊ တဲး မဲ ကာဝေ အုဝ်။ ခုဝ်၊ ဟဲ့ ဂိတ် အုဝ် အူ ဝီ။ နဝ်း အုဝ် မိူဝ် ဟဲ့ ဒီတဲတ်၊ ဟဲ့ ဒီလှး ကာဆဝ်။

17 န့ ဟဲ့ ဒုက် တိူက် ဒီ နဝ်း အုဝ်။ အုဝ် မှာန့်၊ တဲး မဲ ဇဝ် ဂဝ်း ဝဲန် အီ ဒုက် ဒီ နဝ်း အုဝ် တီ။

18 တဲး မဲ ဇဝ် ယွတ် အီ ဒုက် ကာဆဝ် ဒီ နဝ်း အုဝ်၊ တဲး မဲ ဂဝ်း ဝဲန် တူတ့် ဘော မှာပ် အုဝ် ဒွန် မျုဝ်။

19 တဲး မဲ ဇဝ် ယွတ် ခဲ့ ကိူန် ဂေ ရန်ဆူ အုဝ်၊ ခဲ့ ဇွင့် ကာဆဝ် ဂေ ဒီ အုဝ်။

20 အုဝ် ဘိုင် မဲ ဇဝ်ဖြာ၊ မှာန့်၊ တဲး မဲ ဇဝ် ဘ်ု ရိတ် အာဆာက် အုဝ်၊ ကွဲ့ တဲး အုဝ် စှိုမ်။

21 တဲး နဝ်း ဆိူဝ် နဝ်း မှာန် မဲ ဇဝ် ဘ်ု အာဆာက် အုဝ်။ ခုဝ်၊ အုဝ် နှဝ့် န့ဒဝ့် မဲ ဇဝ်။ မဲ ဇဝ် ဒီ တဲး အုဝ် လေး ခဲင် မှာပ်။

22 မဲ ဇဝ်ဖြာ၊ အုဝ် မှာန့်၊ တဲး မဲ ချွတ် ဂေ ဒူအီ အီဆာရေလ၊ တဲး န့ ပီ အီ ထုတ် လေး ဒူအီ ပီ မှေတ့် ရန်ဆူ ဂေ။ တဲး ဂေ ပွုန် တူတ့် ဒုက် ဒွန် မျုဝ်။