မ်ဟ 23

လွင် ဇဝ်ဖြာ ပီ ဒါ အီ ဟျီင် မာဘူ

အာဒါဝိတ် ဟဲ့ ဒဲမ် မှုဝ် နီ။

1 ဇဝ်ဖြာ ပီ ဒါ အီ ဟျီင် မာဘူ။ အုဝ် ပီ မာဘူ အန် ဇဝ်။ အန် ဇဝ် ယီ ယွတ် မဲန် ဆီချာ အုဝ်။ အုဝ် အာဝ် ဟူ မိုဝ်း ပီ ဒီ လုဝ် အုဝ်။

2 အန် ဇဝ် တဲး အုဝ် ကွယ် ဟူမ် ပေတ့် န့စမ်။ အန် ဇဝ် ယဲတ့် အုဝ် ကွယ် ဒီ ဘ့လဲင် ခူပ် အိုမ် ဂျီတ်။

3 အန် ဇဝ် ဘော တဲး ဟဲန့် ဒီ နဝ်း အုဝ်။ အန် ဇဝ် ယဲတ့် အုဝ် ဒူပ် န့တေန့် ဒါရာ ဇဝ်ဖြာ ကူပ် မိုဝ်း အန် နဝ်း ရွက့် ကာဝေ။

4 ဆေ အုဝ် ဘော လုဝ် ဒူပ် ဒီလဲ့ မွှိုမ် ယုဝ်၊^a အာဝ် ဟူ မိုဝ်း ဒီ လုဝ် ယုဝ် မာဆေ။ ဟဲ့ မိုဝ်း မဲ ဇဝ် ကွယ် ရိုမ် ဒူပ် အုဝ်။ န့ကြွုန် မဲ ဂါယ် ကန်ဒါင် မဲ ဇဝ် တဲး အုဝ် မိုဝ်း နဝ်း ကြွိုမ်၊ နဝ်း တာင်။

5 မဲ ဇဝ် တဲး အုဝ် ဟူမ် ဒါခိုယ် ဒီ အာတ့် ရန်ဆူ အုဝ်။ မဲ ဇဝ် မိူဝ် ဟဲ့ ရွုး အုဝ် ဘော ဖဝ်း နာမန် ဒီ ဂိန့် အုဝ်၊ တဲး အုဝ် ခ ဂျာမ်ဆာ။ ခဲ့ ပီ မွင့်ကာရာ မဲ ဇဝ်၊ ကော ဟဲ့ ဝီ ကာလွှိုမ်။

6 အုဝ် ဟဲ့ နပ် ဆီချာ၊ မဲ ဇဝ် မိုဝ်း နဝ်း မွှိုမ်၊ နဝ်း ရွက့် ကာဝေ အုဝ် ဒွန် မှိုဝ် ဒွန် ညှာ ဘော စုဝ် အုဝ်။ အုဝ် ဒီ ကွယ် ဒီ ကာင် ဘွတ် မဲ ဇဝ်ဖြာ ဆေဆေ။