မ်ဟ 22

လွင် အီ ဇမ် ဒုက် ဘော လွင် အိူပ် ဇဝ်ဖြာ

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဒူပ် မဲင် အီ စိူဝ် မာဇ လေး အာတ့် ဘ့လာင် ပြဲ။

1 အိုယ် မဲ ဇဝ်ဖြာ၊ မှဝ် န့ ပါယ် ပီ ဝဲန် မဲ ဒီ အုဝ်။း မှဝ် န့ ပါယ် ပီ တူ ဆီ စွယ် မဲ ဒီ အုဝ်၊ တူ ဆီ ထူမ် ဂြုဝ်း ပီ ငှုန် အုဝ်။း

2 အိုယ် မဲ ဇဝ်ဖြာ ပီ ကြိုပ် အုဝ်၊ ဒေါ ကာတဲ ဆီငဲ အုဝ် ဘော ဒဲ့ မဲ ဇဝ်၊ မဲ ယီ တူ ဝျီ့ ဂြုဝ်း အုဝ်။ ခဲင် မှိုဝ် အုဝ် ပီ ဝီ ဒဲ့ မဲ ဇဝ်၊ န့ ယီ တူ တဲး နဝ်း အုဝ် ယေန်။

3 မဲ ဇဝ်ဖြာ ဘော မုး ဇဝ်ဖြာ အီ ဆီငါ ဘွတ်။ မဲ ဘော မုး ဇဝ်ဖြာ ပီ အိူပ် ဂေ ဒူအီ အီဆာရေလ။

4 ဂုန့် ဒါ ယေ ဟဲ့ ဘိုင် မဲ ဇဝ်ဖြာ။ မဲ ဇဝ်ဖြာ ဘော ချွတ် ဂေ။

5 ဂေ ဟဲ့ ဆာခိုဝ် ဒဲ့ မဲ ဇဝ်၊ မဲ ဇဝ် မိူဝ် စွယ် တဲး ဂေ လွတ်။ ဂေ ဘိုင် မဲ ဇဝ်၊ ဂေ မိူဝ် တူ ကာလုတ့် နဝ်း။

6 န့ ယီ မုး အုဝ်၊ အုဝ် အာဝ် ဟူ ပီ ဒူအီ၊ အုဝ် ဟဲ့ ပီ ဝ ရျီ။ ဂေ ဒူအီ အေး အုဝ်၊ တူ ရုဝ်ဆေ အုဝ်။

7 ခဲ့ ကွယ် ဂေ အီ ယိုဝ် အုဝ်၊ ဂေ ဘော ကာညး နဲန အုဝ်၊ လုက်တာယ် အုဝ်။

8 ဂေ ကာမွုန် တဝ်း၊ “အန် ဟဲ့ ဘိုင် ဇဝ်ဖြာ၊ တဲး ဇဝ်ဖြာ စွယ် အန်၊ တဲး အန် လွတ်။ အန် ဟဲ့ ဘူင် ဒူပ် ပီ အိုင် ဇဝ်ဖြာ၊ တဲး ဇဝ်ဖြာ ချွတ် အန်။”

9 မာလဲ၊ န့ မုး မဲ ဇဝ်ဖြာ အီ တဲး အုဝ် ဂွိုတ်။ မဲ ဇဝ်ဖြာ ဟဲ့ တဲး အုဝ် ကွယ် ဆီချာ ဒေါ ပူ အုဝ်။

10 အုဝ် ဟဲ့ ဘိုင် မဲ ဇဝ်ဖြာ ဆိန့် ဂွိုတ် အုဝ်။ မဲ ဇဝ်ဖြာ ဟဲ့ မုး ဇဝ်ဖြာ ပီ ကြိုပ် အုဝ်၊ ဆိန့် ကွယ် အုဝ် ခဲင် ဝတ့် မာ အုဝ်။

11 အုဝ် မှာန့်၊ တဲး မဲ ဇဝ် ကွယ် ရိုမ် ဒူပ် အုဝ်၊ အုဝ် ဒီ လုဝ် ခမ် ဒုက် တာင်။ န့ မိူဝ် တူ မိုဝ်း အာဆေ အီ ပွိုန် စွယ် အုဝ်။

12 ဂေ ရန်ဆူ အုဝ် ဘော ပီ မက် ဒီဆုဝ် အီ ဟဲ့ ကွယ် ရူပ် အုဝ်။ မက် ဒီဆုဝ် အာမျုဝ် အီ ဟဲန့် ကာဆဝ် အီ တး မိူင် ဘာဆန်၊ ဂေ တး ကွယ် ခူပ် အုဝ်။

13 ဂေ ဘော ရျီင် ကာဆဝ် ပီ မာခြင်ဆီ အီ ဟဲ့ ဆီ ကဝ့် ယမ် အုဝ်။

14 အုဝ် အာဝ် ဟူ မိုဝ်း ပ့လူမ် မာဆေ။ န့ ဟဲ့ ဟြာယ် ပီ အီ လှုဝ် အိုမ် ခဲင် ကာဟာတ့်။ ခဲ့ ကွယ် ကာအာင် အုဝ် ဘောကာဂ့လျီတ်၊ နှဲန် ဟဲ့ ဟွတ့် လာယ် လုတ် တူတ့်။ နဝ်း အုဝ် ဟဲ့ ဒီတဲတ်။ န့ ဘော ပီ ဘ့လမ် အီ ဟဲ့ လာတ့် ဘဲန် အိုမ်။

15 ဟဲန့် အုဝ် ဟဲ့ ဟြာယ်။ န့ ဘော ပီ ဒူန့် ကာလုဝ့် ကာဒါယ် ကာလာတ့်။ ဆီဒ အုဝ် ဘော ဒိုက် ဒီ နှန် အုဝ်။ န့ ဘော ပီ မဲ ဇဝ် ဟဲ့ ဘ့လေး ဝဲန် အုဝ် ခဲင် ကာပုး၊ တဲး အုဝ် ယမ်။

16 ဂေ ဒူအီ ဟာယ် အီ ပီ မာဆုဝ် ပြဲ ဟဲ့ တး ကွယ် ရူပ် အုဝ်။ ဂေ ဆတ် ဒဲ အုဝ် ဂေ ပ့လဝ် အုဝ်။

17 ကာအာင် အုဝ် ဘော လိုဝ်း ဘော ပွိုန် ယိုဝ် ဒွန် ပ့လုဝ့်။ ဂေ ဘော ကာဖြူမ် ဒီ ယွတ် ဒီ ကာညး အုဝ်။

18 ဂေ ဘော ဒိုဝ်း ခြိုင် ပီ တာ အုဝ်၊ ကာဆာင် ဒီ ဂေ။ ဂေ ဘော ကာဒုဝ် တဲး ဂေ နပ် အာဆေ ဒီ ပွိုန် ဆီတုဝ် အုဝ်။

19 န့ ယီ မုး မဲ ဇဝ်ဖြာ၊ တဲး မဲ ကွယ် ရိုမ် ဒူပ် အုဝ်။ မဲ ဇဝ် အီ နပ် ဒီ ဒွါ ပ့လူမ် ဒီ အုဝ်၊ တဲး မဲ တး ခြန် ခြန်၊ တး စွယ် အုဝ်။

20 အုဝ် မှာန့် မဲ ဇဝ် ချွတ် အုဝ်၊ ကွဲ့ တဲး အုဝ် ယမ် ဒီ မာပွါ့ လာင်။ ကွဲ့ တဲး မာဆုဝ် ဂေ နီ ပွိုန် ဒီ ကဝ့် ယမ် အုဝ်။

21 အုဝ် မှာန့်၊ တဲး မဲ ချွတ် အုဝ်၊ တဲး အုဝ် လွတ် ဒီ မူတ့် မာခြင်ဆီ၊ တဲး အုဝ် လွတ် ဒီ မက် ဒီဆုဝ် အီ ကွယ် ခဲင် ပြဲ။

22 အုဝ် ဒီ ကာလာင် လွင် မဲ ဇဝ်ဖြာ ဒီ ဘီနွင် ဝေါဝဲ အုဝ် ဒွန် အီ။ အုဝ် ဒီ အိူပ် မဲ ဇဝ်ဖြာ ကာတဲ ဂေ ဒူအီ ကိူန်၊ အီ တး ကြိုပ် မဲ ဇဝ်။

23 အိုယ် ဘေ ဒူအီ အီ ရုဝ်ဆေ ဇဝ်ဖြာ၊ တဲး ဘေ အိူပ် အန် ဇဝ်။ ဘေ ဒူအီ ခြိုဝ် အာကူပ်၊ တဲး ဘေ မျုက် အန် ဇဝ်။ ဘေ ဒူအီ အီဆာရေလ၊ တဲး ဘေ အာမ် ပီ ပါယ် အန် ဇဝ်။

24 ခုဝ်၊ ဇဝ်ဖြာ တူ ကာအိး ဒူအီ ဂိန်။ အန် တူ ပိဝ် ဒုက် ပီ ခမ် ဂေ။ အန် ဘော ထူမ် ပီ ဆာခိုဝ် ဂေ။

25 အုဝ် ဒီ ဝီ အိူပ် မဲ ဇဝ် ကာတဲ ဂေ ဒူအီ ကိူန်။ ပဲ့ ဟဲ့ ဒွါ အုဝ် ကာဒိက် ဆတ်ဇာ ဒီ မဲ ဇဝ်၊ အုဝ် ဒီ ဘော ဘူင် ဒူပ်၊ တဲး ဘော ဂေ အီ ရုဝ်ဆေ မဲ ဇဝ် ယိုဝ်။

26 ဂေ ဒူအီ အီ ကာဒုး ဒုက်၊ ဂေ ဒီ ဝီ ပွိုန် ဒီ ဟူမ် ဖဲ။ ဂေ အီ ဆီ ညှိုမ် ဇဝ်ဖြာ၊ ဂေ ဒီ ပွိုန် ဒီ အိူပ် အန်။ တဲး ဇဝ်ဖြာ မွင့်ကာရာ ဒွါ နာ မွှိုမ် ဒီ ဂေ ဆေဆေ။

27 ဂေ အာမျုဝ် ဒူအီ အီ ကွယ် ဒဲင် ကာဒါယ် ဒွန် နာ ဒွန် ပ့လုဝ့်၊ ဂေ ဘောကာဂ့လျီတ် ဒီ ဝီ လှုဝ်း ဇဝ်ဖြာ။ ခဲ့ ကွယ် ဒူအီ ဘောကာဂ့လျီတ် ဒွန် ဇိုဝ် ဒွန် ခြိုဝ်၊ ဂေ ဒီ ဝီ ကြိုပ် ဇဝ်ဖြာ။

28 န့ မုး ဇဝ်ဖြာ အီ အိုပ် တူတ့် မာန် မိူင် ဘောကာဂ့လျီတ်။ အန် အိုပ် ဘော ဒူအီ ဒွန် ဇိုဝ် ဒွန် ခြိုဝ်။

29 ဂေ ဒူအီ အီ ပီခိုက် ဂေ၊ ဂေ ဒီ လုဝ် ဂူမ် ကြိုပ် ဇဝ်ဖြာ။ အာမျုဝ် ဒူအီ အီ နပ် ဒီ ယမ်၊ ဂေ ဒွန် အီ ဒီ လုဝ် ခြိုပ်ခြဝ်၊ ကြိုပ် ဇဝ်ဖြာ။

30 ဘော လှုက်လှာန် အေ အီ ဒီ ဂွိုတ် ကာမာယ်၊ ဂေ ဒီ ဘူင် ပီ အိုင် ဇဝ်ဖြာ။ ဂေ ပီ ဒီ ဝီ ကာလာင် လွင် ဇဝ်ဖြာ ဒီ လှုက်လှာန် ဂေ ဘဲန် ဇာတ် ဘဲန် ဇာတ်။

31 ဂေ ဒီ ဘော ကာလာင် ဒီ ဂေ အီ ညှမ် ဂွိုတ် တဝ်း၊ “ဇဝ်ဖြာ အီ ပွိုန် ချွတ် ဒူအီ။”