မ်ဟ 21

လွင် အိူပ် ဇဝ်ဖြာ ဟဲ့ ပဲ ရန်ဆူ

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် တိး။

1 အိုယ် မဲ ဇဝ်ဖြာ၊ ခုန်ဒီခမ် ဟဲ့ ဒါခိုယ် ကူပ် မိုဝ်း မဲ ဇဝ်ဖြာ ပွုန် တာင်။ မဲ ဇဝ် ဟဲ့ စွယ် အန်၊ တဲး အန် ဘော ခူယ် ကာဆဝ် ကူပ် ဟဲ့ ပဲ အန် ရန်ဆူ အန်။

2 မဲ ဇဝ်ဖြာ ဟဲ့ ဒွါ ခဲ့ ပီ ဆီ ပွိုန် အန်။ မဲ မိူဝ် ဟဲ့ ထူမ် ဂြုဝ်း ပီ ဆာခိုဝ် ပီ မှာန့် အန်။

3 မဲ ဇဝ်ဖြာ ဘော မွင့်ကာရာ ဒွါ အီ ဘွတ် အီ မွှိုမ် ဒီ အန်၊ ဟဲ့ တဲး အန် စှိုပ် မင်ဂိုမ် ခြိဝ် ဘွတ် ဒီ ဂိန့် အန်။

4 အန် ဟဲ့ ဆာခိုဝ် မှာန့် ကွဲ့ တဲး အန် ယမ်။ မဲ ဇဝ် ဘော ဘ်ု ရိတ် အာဆာက် အန်၊ တဲး အာဆာက် အန် တူင့်၊ ဘော ကွယ် ဇမ် ကတ် အန်။

5 မဲ ဇဝ်ဖြာ ဟဲ့ စွယ် တဲး အန် မိုဝ်း ပွုန်၊ မိုဝ်း အာဖုင် ဒင်ခုဝ် တာင်။ မဲ ဟဲ့ တဲး အန် မိုဝ်း ဆာရေ ဘွတ်။

6 မဲ ဇဝ်ဖြာ ဟဲ့ မွင့်ကာရာ ဒွါ အီ ဘွတ် ကာဆဝ် အီ ကွယ် ဆေဆေ ဒီ အန်။ မဲ ဟဲ့ တဲး အန် ကွယ် ရိုမ် ဒူပ် မဲ၊ တဲး နဝ်း အန် ဒါခိုယ်။

7 မဲ ဇဝ်ဖြာ ဟဲ့ တာင် လွှိုမ် တူတ့်။ မဲ မိုဝ်း နဝ်း ရွက့် ကာဝေ ဆေဆေ။ ခုဝ် အန် တီ ခုန်ဒီခမ် ညှိုမ် ဘိုင် မဲ ဇဝ်ဖြာ။ မဲ တူ တဲး မိူင် အန် ကာပျာတ့်၊ တဲး အန် ပွိုန် ဒီ အိုပ် ဆီချာ။

8 မဲ ဇဝ် ဒီ ဘော မှေတ့် ရန်ဆူ မဲ ဒွန် အီ။ မဲ ဇဝ် ဒီ ဘော ပက် ဂေ အီ ဇွင့် မဲ ဘောကာဂ့လျီတ်။

9 မဲ ဇဝ် ဒီ ဘော ရူ ကာဆဝ် ဒီ ဂေ။ ဆေ မဲ ယိုဝ် ဂေ၊ မဲ ဒီ ဘူင် တဲး ဂေ ပီ ငဝ် အီ ကုး တာင်။ မဲ ဒီ ဘော တဲး ဂေ စှိုမ်၊ တဲး န့ ပီ ငဝ် ကာဆိုမ် ဟူမ် တူတ့် ဂေ။

10 ဘော လှုက်လှာန် ဂေ၊ မဲ ဒီ ဝဲန်၊ ကွဲ့ တဲး ဂေ ဆီ မိုဝ်း ဒဲင် ကာဒါယ် နီ။ မဲ ဇဝ် ဒီ ဘော ပျာတ့် ခြိုဝ် ဂေ၊ ကွဲ့ ဟူ တဲး ဂေ ကွယ် ရိုမ် ဒူပ် ဒူအီ။

11 ဂေ ပီ ဘော ဝီ ခြာမ် ဒီ ဘူင် နာ တူ မွှိုမ်၊ ခြာမ် ဒီ ဝီ ကာဂုဝ်း ဒီ မဲ ဇဝ်၊ ဂေ ယီ တူ ပွိုန် ဘူင် မာဆေ၊ တူ ပဲ ဒေါ မှဝ်။

12 မဲ ဇဝ် ဒီ ဝီ ဘူင် တဲး ဂေ တဝ်။ မဲ ဒီ ဘော ဒိုဝ်း အ ဆီကူ နာ ဂေ၊ တဲး ဂေ ဟာဝ်။

13 အိုယ် မဲ ဇဝ်ဖြာ အီ မိုဝ်း ပွုန် တာင် ကာဆဝ်၊ ယေ အိူပ် မျုက် မဲ။ ယေ ဒီ တဝ်း မှုဝ် အီ အိူပ် ပွုန် မဲ ဇဝ်ဖြာ အီ တာင် ကာဆဝ်။