မ်ဟ 6

ပီ ဆာခိုဝ် တဲး ဇဝ်ဖြာ စွယ် ဒေါ ဇမ် ဒုက်

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဘး ဒိင်၊ ဒူပ် မဲင် အီ စိူဝ် ဆေမီနိတ်။

1 အိုယ် မဲ ဇဝ်ဖြာ၊ ဆေ မဲ ဇဝ် ဘော ဟဲ့ ရူ ကာဆဝ် ဒီ အုဝ်၊ ကွဲ့ တဲး မဲ ဇဝ် ဒမ် ကာဆဝ် မှာပ် ဒီ အုဝ်။ ဆေ မဲ ဇဝ် ဘော ဟဲ့ စာဝ် ဒီ အုဝ်၊ ကွဲ့ မာနုဝ် ကာဆဝ် အုဝ်။

2 အုဝ် မှာန့်၊ တဲး မဲ ဇဝ် ကာဝေ အုဝ် ကူပ် ဟဲ့ ဒီလှး ကာဆဝ် အုဝ်၊ အာဝ် ဟူ မိုဝ်း ပ့လူမ်။ အုဝ် မှာန့်၊ မဲ ဇဝ် ဝီ ကာဝေ၊ ဝီ စွယ် အုဝ်၊ တဲး အုဝ် ဝီ ပ့လူမ် ခ၊ ကွဲ့ ဟူ တဲး အုဝ် ဆဝ် ဘော ဒုဝ်။

3 အိုယ် မဲ ဇဝ်၊ နဝ်း ဖွိုမ် အုဝ် ဟဲ့ ဒုက် ကာဆဝ်။ အုဝ် ဒီ လုဝ် ခမ် လှေန့် ခဲ့ မှဝ်။း

4 အုဝ် မှာန့်၊ တဲး မဲ ဇဝ် စွယ် အုဝ်၊ တဲး အုဝ် လွတ်၊ တဲး မဲ ချွတ် အုဝ် ကူပ် မိုဝ်း မဲ ဇဝ် နဝ်း ရွက့် ကာဝေ အီ ဆေဆေ။

5 ခုဝ်၊ ဆေ ဟဲ့ ဟွတ့် ယမ်၊ အာဝ် ဟူ ပွိုန် ဝီ လှုဝ်း မဲ ဇဝ်ဖြာ။ အာဆေ ကွယ် ခဲင် မိူင် မာရာန၊ အာဝ် ဟူ ပွိုန် အိူပ် မဲ။

6 အုဝ် ဟဲ့ ဒီလှး ဒီ ငှုန်။ အုဝ် ဘော ယာမ် ဒွင် ခိူန်၊ တဲး အိုမ် ငါယ် အုဝ် ဘော လှဲ ဒဲင် မွှန် အုဝ် ဒဲင် ကာစှူင့် အိတ် အုဝ်။

7 ငါယ် အုဝ် မိူဝ် ဟဲ့ လိုဝ် ကူပ် ဟဲ့ ဒုက် ကာဆဝ် ဒီ နဝ်း အုဝ်။ န့ ဘော ဘဲန် ငါယ် မုဝ်၊ ငါယ် ကာပျွယ် ကူပ် ကိူန် ရန်ဆူ အုဝ်။

8 ဘေ ဒူအီ အီ ဘူင် မိူက်၊ တဲး ဘေ တဝ် တ အုဝ်။ ခုဝ်၊ ဇဝ်ဖြာ ဟဲ့ ထူမ်၊ ဟဲ့ ယိုဝ် ဒေါ ယာမ် အုဝ်။

9 ဇဝ်ဖြာ ဘော ထူမ် ဘော ဒွါ ပီ ဆာခိုဝ် ပီ မှာန့် အုဝ်။

10 ခဲ့ ကွယ် ရန်ဆူ အုဝ် ဘောကာဂ့လျီတ်၊ ဂေ ဒီ ဘော ယုဝ် ကာဆဝ် ဘော ဆာယ် အီ။ ဂေ ဒီ ကာဝှ်ု ကာဝျှီန် ဘော ကာဘ့လျီ့ ဝေန့် အူ ဇေန့်၊ တဲး ဂေ စှိုမ် ဆာရေ။