မ်ဟ 5

ပီ ဆာခိုဝ် တဲး ဇဝ်ဖြာ ရဲ အာဖေ အာရေ

အာဒါဝိတ် ဟဲ့ ဒဲမ် မှုဝ် နီ။ တဲး ဒါ အီ ယဲတ့် ဂေ အီ တဝ်း မှုဝ် နပ်၊ လုဝ် ဘုတ် ဝဝ်။

1 အိုယ် မဲ ဇဝ်ဖြာ၊ အုဝ် မှာန့်၊ တဲး မဲ ဇဝ် ထူမ် ဂြုဝ်း ပီ ဆာခိုဝ် အုဝ်၊ တဲး မဲ ဇဝ် ယိုဝ် ဘော ပီ ငှုန် အုဝ်။

2 မဲ မုး ဇဝ်ဖြာ ပီ ကြိုပ် အုဝ် ဘော ဒါ ကာညာ အီ အိုပ် အုဝ်။ တဲး မဲ ဇဝ် ထူမ် ပီ မှာန့် အုဝ် နီ၊ တဲး မဲ ဇဝ် စွယ် အုဝ်။

3 ဆိန့်ဝး စေဝ် မဲ ဇဝ် ဘော ယိုဝ် ဂြုဝ်း အုဝ်။ ဆိန့် ဆိန့်ဝး စေဝ် အုဝ် ဆာခိုဝ် ဒီ မဲ ဇဝ် ဘော ဘ်ု မဲ ဝျီ့ ဂြုဝ်း အုဝ်။

4 မဲ ဇဝ်ဖြာ၊ မဲ တူ အိုင် အီ တူ မွှိုမ်။ မဲ မိူဝ် တူ ခမ် နာ စီစိဝ်။

5 မဲ ဇဝ် ဘော ဇွင့် ဂေ အီ ဘူင် မိူက် ဒွန် အီ။ မဲ ဘော ကြာန် ဒီ ယွတ် ဂေ ဒူအီ အီ ပီခိုက် ဂေ။

6 အာဆေ ကာလာင် ဂြုဝ်း တူ မှာန်၊ မဲ ဇဝ် ဒီ တဲး ဂေ စှိုမ်။ မဲ ဇဝ် ဘော ကာအိး ဂေ အီ ငဝ်း ယမ် အာဆာက် အီ ဘော ဂေ အီ ဆီမာ ကာလုဝ်။

7 ကူပ် ဟဲ့ ရွက့် ကာဝေ ကိူန် မဲ ဇဝ် ဒီ အုဝ်၊ အုဝ် ဘော ပွိုန် ဒီ လိုပ် ဒူင် ကွယ် မဲ။ အုဝ် ဘော ပွိုန် ဒီ ကြိုပ် ဆာခိုဝ် ဘော ရုဝ်ဆေ မဲ ခဲင် ဟုဝ် မဲ အီ ဘွတ် ကာဆဝ်။

8 မဲ ဇဝ်ဖြာ၊ အုဝ် မှာန့်၊ တဲး အုဝ် ပွိုန် ဒီ ဘူင် နာ မှာန် ပီ အိုင် မဲ။ ဂေ ရန်ဆူ အုဝ် ဟဲ့ ဟြေတ့် အုဝ်။ ခုဝ်၊ အုဝ် မှာန့်၊ တဲး မဲ ဇဝ် ယဲတ့် အုဝ်၊ တဲး န့ ငှိုယ် ဒီ အုဝ်၊ တဲး အုဝ် ပွိုန် ဒီ ဒူပ် ဆီချာ မဲ။

9 ဂေ ရန်ဆူ အုဝ် ဘော ကာလာင် ဂြုဝ်း တူ မှာန်။ နဝ်း ဂေ ဘော ဆီ ဘူင် တဲး န့ လိုဝ် ဘဲန် မျုဝ် ဘဲန် မျုဝ်။ ဂြုဝ်း အီ လေး ခဲင် မူတ့် ဂေ တဲး န့ ဆဝ် ဒီ နဝ်း အီ။ န့ ဘော ပီ အာယ် မာဟန့်။

10 မဲ ဇဝ်ဖြာ၊ မှာန့် တဲး မဲ တဲး ဂေ ဝီ ခမ် မှာပ် ပီ ဘူင် ဂေ၊ တဲး ဂေ ဝီ စှိုမ် ကူပ် ပီ ကာဖာ ဂေ။ တဲး မဲ ဇဝ် ဆုတ့် တဝ် ဂေ ကူပ် ဟဲ့ ဆီ ကာခဲန့် ဂေ ဒီ မဲ ဘော ကူပ် ဟဲ့ ဘူင် ဂေ မှာပ် ကိူန်။

11 န့ ယီ မုး ဂေ အီ ဘိုင် ဆီချာ မဲ ဇဝ်၊ တဲး မဲ တဲး ဂေ ဘျုဝ် ဒါခိုယ်။ တဲး ဂေ ဘော တဝ်း မှုဝ် ဒါခိုယ် ကူပ် ဟဲ့ ရဲ ဟဲ့ ဂွင့် မဲ ဇဝ် ဒီ ဂေ။ ဂေ အီ ရွက့် မဲ ဇဝ်၊ ဂေ ဒီ ဘော ဘဲန် နဝ်း ဘျုဝ် ဒါခိုယ်။

12 မဲ ဇဝ်ဖြာ ဒီ မွင့်ကာရာ ဒွါ ဒီ ဂေ အီ မိုဝ်း နဝ်း ဆိူဝ် နဝ်း မှာန်။ မဲ ဇဝ် ဒီ ဘော အိုင် ဂေ ဘော ဘူင် နာ မွှိုမ် ဒီ ဂေ၊ တဲး န့ ပီ ဂေ မိုဝ်း မင် ဂွင့် အီ ရဲ ဂေ။