မ်ဟ 7

လွင် ဇဝ်ဖြာ ဆုင်ဖျာတ် နာ မှာန် ဆေဆေ

အာဒါဝိတ် ဟဲ့ တဝ်း မှုဝ် နီ ဒီ ဇဝ်ဖြာ လွင် အာကူဆာ အီ မုး ခြိုဝ် အာဘေန်ယာမ်။

1 အိုယ် မဲ ဇဝ်ဖြာ၊ မဲ မုး ဇဝ်ဖြာ ပီ ကြိုပ် အုဝ်။ အုဝ် ဒီ ဘိုင် မဲ ဇဝ်၊ တဲး အုဝ် လွတ် ဂေ အီ ခုင်ခြး အုဝ်။

2 ဆေ အာဝ် မိုဝ်း အီ စွယ် အုဝ်၊ ဂေ ဒီ ဘော ဘူင် ဒီ အုဝ် ပီ မာခြင်ဆီ အီ ကဝ့် ယမ် အီ ဘော ဒိူတ် လာက် ဟာဝ် ဒူင် တူ ယိုဝ် အီ ဟဝ်၊ တဲး အန် ပွိုန် ဒီ ဟူမ် ယင် အုဝ်။

3 အိုယ် မဲ ဇဝ်ဖြာ ပီ ကြိုပ် အုဝ်၊ ဆေ အုဝ် ဘော ဟဲ့ ဘူင် လုတ့် ဒီ အီ၊ ဆေ အုဝ် ဘော ဟဲ့ မိုဝ်း မှာပ်၊

4 ဆေ အုဝ် ဘော ဟဲ့ ဘူင် အီ တူ မွှိုမ် ဒီ ဂိုက် အီ ကာလဝ့် ဒီ အုဝ်၊ ဆေ အုဝ် ဟဲ့ ဖာတ် ကြုဝ်ကြာမ် ဒီ ရန်ဆူ အုဝ်၊

5 တဲး ဂေ ခုင်ခြး ခြပ် အုဝ်၊ တဲး ဂေ ညဲတ့် ယမ် အုဝ် ဒဲင် ကာဒါယ်၊ တဲး အုဝ် ကွယ် ခဲင် ကာပုး၊ ကွဲ့ တဲး အုဝ် မိုဝ်း ဆာရေ။

6 အုဝ် မှာန့်၊ တဲး မဲ ဇဝ် ရူ ဒီ ရန်ဆူ အုဝ် အီ မိူက် ကာဆဝ် ဒီ အုဝ်။ တဲး မဲ ဇဝ် ဆုင်ဖျာတ် မှာန် ဒီ ဂေ။ အုဝ် မှာန့်၊ တဲး မဲ ဇဝ် စွယ် အုဝ်။

7 တဲး ဒူအီ ဒွန် မျုဝ် တး ကာဇု ရူပ် မဲ ဇဝ်။ တဲး မဲ ဇဝ် ပီ ဝီ အိုပ် ဂေ ဘောကာဂ့လျီတ်။

8 တဲး မဲ ဇဝ်ဖြာ ဆုင်ဖျာတ် အာမူ ဒူအီ ဘောကာဂ့လျီတ်။ အုဝ် မှာန့်၊ တဲး မဲ ဇဝ် ကာဝေ အုဝ် ဘော ဆုင်ဖျာတ် အာမူ အုဝ် ဒူပ် နဝ်း ဆိူဝ် နဝ်း ဘွတ် အုဝ်။

9 မဲ ဇဝ်ဖြာ ဘော မုး အီ ဆုင်ဖျာတ် နာ မှာန် ဆေဆေ။ မဲ ဇဝ် ဘော ယွတ် ဆီချာ၊ တဲး မဲ နပ် တူတ့် ပီ ပါယ် ခဲင် နဝ်း ဖွိုမ် ပီ ကာဖာ ဂေ ဒူအီ။ ပီ ဘူင် ဂေ နာ တူ မွှိုမ်၊ မဲ ဇဝ်ဖြာ၊ တဲး မဲ တဲး ဂေ စူ။ ဂေ အီ ယီ ဘူင် နာ ဘွတ်၊ တဲး မဲ တဲး ဂေ ကွယ် ဆီချာ။

10 ဇဝ်ဖြာ ဘော မုး အီ ရဲ အီ ဂွင့် အုဝ်။ အန် ဘော ချွတ် ဂေ အီ ထူမ် ဂြုဝ်း အန်။

11 ဇဝ်ဖြာ ဘော ဆုင်ဖျာတ် နာ မှာန် ဆေဆေ။ ဒွန် ဆီငဲ အန် ဘော ကာအိး ဂေ ဒူအီ မိူက်။

12 ဆေ ဂေ ဒူအီ တူ ကာပ့လုတ် နဝ်း ဂေ၊ အန် ဇဝ် ဒီ ဘော လာ့ အုန် မာပွါ့ လာင် အန်၊ တဲး အန် ပွိုန် ဒီ ဒဲပ်။ အန် ဇဝ် ဒီ ဘော ဝိတ့် အုန် အ အန်၊ တဲး အန် ပွိုန် ဒီ ဘန့်။

13 အန် ဇဝ် ဟဲ့ ရဲန် အုန် ခြိုင် ကာဂုဝ်း အီ တဲး အီ ယမ်။ အန် ဇဝ် ဘော ရဲန် ဘော ဘ့လာ အ အီ မိုဝ်း ငဝ်။

14 ဂေ ဒူအီ မိူက် ဟဲ့ ပီ ယာ တူ အး။ အာကျာမ် အာငျာန် အီ တူ မွှိုမ် ဂေ တီ၊ န့ ပီ အီဘိုန့် ဟဲ့ ဒဲ ဆန်ထေ။ အီ ဒီ ဂွိုတ် တီ၊ ဝီ မုး တူတ့် အီ ကာလုဝ် အီ တူ မှာန်။

15 ဂေ ဘော ဂိုဝ်း ကာဒဝ် တဲး အီ ဟဝ် စုဝ်း နာ ခဲင်။ န့ ယီ မုး ဒုဝ် ဘြိမ် ဂေ၊ အီ ဝီ စုဝ်း ခဲင် ကာဒဝ် ပီ ဂိုဝ်း ဂေ တီ။

16 ပီ ဇေန့်ဇာ ဂေ အီ တူ မွှိုမ်၊ ဂေ ဘော ဝီ လုဝ် ခမ် ပါယ် တီ။ ခဲ့ ပီ ဘူင် ဂေ အီ ဟာယ် ကာဆဝ်၊ ဂေ ဘော ဝီ လုဝ် ခမ် ခဲ့ တီ။

17 အီ မုး အုဝ်၊ အုဝ် ယီ အိူပ် ဇဝ်ဖြာ ကူပ် ဟဲ့ ဘူင် အန် နာ မုး နာ မှာန်။ အုဝ် ဒီ တဝ်း မှုဝ် အီ အိူပ် ဇဝ်ဖြာ။ အန် မုး ဇဝ်ဖြာ အီ တာင် လွှိုမ် တူတ့်။