လွင် ခုန်ဒီခမ် ပီ ရဝ်း ဇဝ်ဖြာ
2
1 ဂေ ဒူအီ ဒဲင် ကာဒါယ်၊ ဂေ ဆီနန် ဆီနိူင်။ ဂေ ဘော ခြာမ် ဒီ ဘူင် အီ တူ မိုဝ်း ဒီခုဝ်။2 ဘော ခုန်ဒီခမ် ဘော ဂေ ဒါ ကာညာ အီ အိုပ် မိူင်၊ ဂေ ခြာမ် ဒီ ကာခဲန့် ဒီ ဇဝ်ဖြာ။ ဂေ ဘော ဆီ ကာခဲန့် ဘော ဒီ ဒူအီ ပီ ရဝ်း ပီ တိုယ် ဇဝ်ဖြာ။
3 ဂေ ဘော တဝ်း၊ “တဲး အေ ဝဲန် အန် ဇဝ်၊ ကွဲ့ တဲး အန် အိုပ် အေ၊ တဲး န့ ပီ အေ ဂဝ်း ဝဲန် ဝန် ပီ ပက် အန် ဒီ အေ။”
4 ဇဝ်ဖြာ ယီ ကွယ် ခဲင် ဂါင်ဟြာဝ်။ အန် ဘော အေဝ် ကာညး ပီ ပါယ် ဂေ။
5 ဟဲ့ ဟွတ့်၊ ဇဝ်ဖြာ ဘော ဝီ ရူ ကာဆဝ် ဒီ ဂေ။ ဘော အေး ဂေ တဲး ဂေ ယုဝ် ကာဆဝ်။ အန် ဘော တဝ်း ဒီ ဂေ၊
6 “အုဝ် ဟဲ့ တိုယ် ခုန်ဒီခမ် ပီ ရဝ်း အုဝ်၊ တဲး အန် ကွယ် ဒီ နွန် ဇီအူန်a အီ မုး နွန် ဘွတ်၊ ဒူင် ကွယ် ဇဝ်ဖြာ။”
7 ခုန်ဒီခမ် တီ ယီ တဝ်း၊ အုဝ် ဒီ ကာလာင် ပီ တဝ်း ဇဝ်ဖြာ ဒီ အုဝ်။ အန် ဇဝ် ဟဲ့ တဝ်း၊ “မဲ မုး ဂွန် အုဝ်။ အာတိုဝ် နီ၊ အုဝ် ဟဲ့ ဘဲန် ဂုန့် မဲ။
8 တဲး မဲ မှာန့် ဒီ အုဝ်၊ အုဝ် ဒီ ဒွါ ဒူအီ ဒွန် မျုဝ်၊ တဲး ဂေ ဘဲန် ပီ ခါဂုန် မဲ။ ခဲ့ ကွယ် အာမျုဝ် ဒဲင် ကာဒါယ် နီ အုဝ် ဒီ တဲး မဲ အိုပ် တူတ့်။
9 မဲ ဒီ ဘော အိုပ် ဂေ၊ တဲး န့ ပီ မဲ မး ဂေ တာ လျီး ဟိန်၊ တဲး ဂေ စှိုမ် တူတ့်။ တဲး ဂေ ပီ ကာလုဝ့် ကာဒါယ် အီ ကာလာတ့် လိုဝ်။”
10 ခုဝ် အန် တီ ဘေ ခုန်ဒီခမ်၊ တဲး ဘေ မိုဝ်း အာငျာန်။ ဘော ဘေ ဒါ ကာညာ အီ အိုပ် ကာဒါယ်၊ တဲး ဘေ ထူမ် ဂြုဝ်း ပီ ဒမ် အုဝ် ဆာဒိက် တီ။
11 တဲး ဘေ ဘူင် ပီ အိုင် ဇဝ်ဖြာ ဘော ရုဝ်ဆေ အန်။ တဲး ဘေ ယုဝ် ဇဝ်ဖြာ၊ ဘော ဂူမ် အန်။
12 ဆေ ဘေ တူ ဘူင် ပါယ် တီ၊ ယုဝ် အန် ဇဝ် ဒီ ရူ ကာဆဝ် ဒီ ဘေ၊ ယုဝ် အန် တဲး အာဆာက် ဘေ စှိုမ် ဒေါ ညှမ် ကတ် ဘေ။ အီ မုး ဂေ အီ ဘိုင် ဆီချာ ဇဝ်ဖြာ၊ ဂေ ဒီ ဘော ပွိုန် ဒီ ကွယ် ဘျုဝ် ဒါခိုယ် ဒွန် အီ။