Imbaau isi bolevita
35
NYEEK pot lado na Moises zun ze nliiŋnorze, ze kwaŋ krik Jordoŋ pjaan na Jeriko, NYEEK jak Moises: 2 Jakun bowk Israel bo kaphul bolevita imbaau antom bo zoo ze yolo, na isaal ze kwaŋ boko isi ŋnsaam boko oi pferna. 3 Bo pka imbaau iminzhi antom pho ze yolo, isaal inhoi ze kwaŋ boko yo pho isi ŋnsaam boko kfernŋi. 4 Ze kwaŋ imbaau ndei phul bolevita ptep zomur osi kmbaau amphya na uri o pka ŋmetru 450. 5 Zojir onhani pho ze kmbaau nde pjaau ŋmetru 900 ze pmair onuu, zojir zeu osaak nde pjaau ŋmetru 900 zojir phyour onuu nde pjaau ŋmetru 900 ze duzu osaak nde sa ka pjaau ŋmetru 900 ŋnjir ŋminzŋi ŋho pho zun zyafnin na kmbaau knhoki ze psoof. 6 Zimbaau ndei phul bolevita imbaau 6 ze yolo yo pho imbaau isi ptaayo, ze ña fiŋ asinz ze kpaaŋ aylum pzi phya ptaayo ze yolo nde phul baka imbaau 42. 7 Hunkran imbaau uzuuz isi ndei phul bolevita yo pho imbaau 48, Kana ña na ksaal lo ze kwaŋ. 8 Kana kiiñ ophul bolevita imbaau ze mi ifinohi, ze mi imbaau isi phij boko omi. Baña bonkauki imbaau insumhi nde pseh baka imbaau insumhi; baña bonkauki imbaau intiik nde pseh baka imbaau intiik.Imbaau 6 isi ptaayo
Oiimna 4.41-43; 1-3; Joswe 20.1-9
9 NYEEK pot lado na Moises, jak lo. Antom a jak bowk Israel: 10 Zoyaar nde haño krik Jordoŋ phya osaak osi Kanaan, 11 nde datun imbaau yoi pho imbaau isi ptaayo, zun ña hiluni pziidar ze azili ya fiŋ ña nin pka ŋnzaafu pfiŋ lo. 12 Imbaau iminzyun yo pho zun nde ze beti, awk aliin anjewi botun pko ze ñiinz afiŋunk asinz aki kez Pham pdolo olado zurun uzoñnor usi bopugi. 13 Nde phul imbaau 6 isi ptaayo. 14 Imbaau 3 zojirun krik Jordoŋ imbaau 3 zosaak osi Kanaan. 15 Imbaau 6 iminzyun yo pho zun nde ze beti, ze si bowk Israel, na nya anhoi ze psoof nde uz. Hunkranda, ze ña zili antom fiŋ asinz ahilun pzi phya ze yolo.
Ña nfiŋi asinz aka pfiŋo
Oiimna 19.4-13
16 Ze ña pat asinz na feru anka kint kezi ña minzun oko nnfiŋ, aka pfiŋo. 17 Ze ña bup plaak ze kñene, pnhilumpi pfiŋ, ka tap ña na polo anka kint kezi, ña minzun oko nnfiŋ, aka pfiŋo. 18 Ze ña bup punu ze kñene, pnhilumpi pfiŋ ña, zapat asinz na polo anka kint kezi, ña minzun oko nnfiŋ aka pfiŋo. 19 Ña anhoi awk aliin ña anfiŋohi sotok jik na ña nfiŋi, a ka pfiŋa. 20 Ze ña huk asinz na oreu, o azu kwaz ptapa na un oloŋo an akint akez, 21 o zonkont ubido ka koblo oluku an kakint kezi, ña minzun ka pkez zonkont a oko nnfiŋ. Nmbotun pko na pñak jik na lo a ka pfiŋa.
Ŋun ŋnsi imbaau isi ptaayo oipka
22 Ohilun pho ñazi ka ubido na asinz, huk lo zomusfnez, o alis unu, ko ya tap lo, ni pka ŋnzaafu ubido na lo, 23 o azi iina, ka ahutun plaak ka pjet duzu lo, ka kezi, azi o nmbir lo, ka azi hil jeu pdo khuzin. 24 Ze minzmi, uzoñnor usi bopugi ka pdo ña nfiŋi olado na nmbotun pko psi pñaak ze mi ŋiimna ŋminzŋi omi. 25 Boka pbaap ñiinz anfiŋunk asinz ze kñen nmbotun pko psi pñaak bokakun lo ze kmbaau ksi ptaayo zun ze si ahilun ziidari, apduko za an nyeek bopenen Uzi kint akez, ankirounk na mnsitidos miimna. 26 Ze ñiinz anfiŋunk bi pun ze kmbaau ksi ptaayo zun ahilunk zidari, 27 ze nmbotun pko psi pñaak jik na lo fiŋ lo azo pka pjwa injaka nnfiŋ. 28 Ñiinz anfiŋunk aka pduko ze kmbaau ksi ptaayo an nyeek bopenen Uzi kez. Antom olña minzun kakun osaak lo. 29 ŋun ŋndaaŋi ŋo pho ŋiimna ŋnsi ifah ze iiñ nde onzañi ze ŋnjir uzuuz ŋnsi ndei phona.
30 Ña nfiŋi asinz, apfiŋo injaka nnfiŋ, men o ko pka baña 2 o bompeki 2, bonzuupki khuzin adoki. Ña azi hilun pfiŋo zonkont ña aloŋ anzuupi khuzin adoki. 31 Nde ika digzan ña ganz nde zonkont phila ña nfiŋi, anhiri pkez. Aka pfiŋo, azi ka phutno antom abur. 32 Ze ña zii, phya kmbaau ksi ptaayo, nde ika digzan uluk antom a kak zosaak lo ze nyeek bopenen Uzi azo kezi. 33 Nde ika zopun osaak nde ooni, zonkont phas pñaak a ksok osaak. Osaak ozo pjouro zonkont pñaak pnhasopi ze olo ze mbaza pñaak ña anhasunk polo. 34 Hunkranda, nde ika zopun osaak osi nde ooni zun nji sai oon uz, zonkont nji NYEEK, nji o ze psoof bowk Israel.