Ŋun bokoatita kaŋi pdo
4
NYEEK lado na Moises na Aroŋ jak boko: 2 "Nde finun bowk Koati ze psoof bolevita, finun baka ze mi bo omi ze iku phwkpliin boko. 3 Bonjaawoki bonkauki ŋnlur 30 ampjau ze 50, ña aneeji pseh kfah lo zutihun uminzwi zoku uzoñnor onhimnani. 4 Undaawi oun utihun bowk Koati zoku uzoñnor, ze ŋun ŋiimuŋi. 5 Zo nazro bopugi zunaam uzoñnor, Aroŋ na bowk bo pbi punun knoŋt zun ze iimna, bo pler ukau usi phuuz na kolo. 6 Bo pler wa na injand infulhi, apzu knoŋt kfulamul uz duzu wolo, antom bo zu wolo ilaankun. 7 "Boler inoŋnt ifulamul zomes osi opoŋ NYEEK; bo pzu iraat duzu olo, na yun iseunin insensu one yun ikñeelhi un onliili, inkopu isi praan na itisel; o sa o pho uz opoŋ onhoi pho duzu omes oloŋ. 8 Antom botar knoŋt kjeenkle duzu ŋolo, boler ŋolo na injand infulhi, bo pler wa antom bo zu wolo ilaankun. 9 "Bo pjek knoŋt kfulamul, plern okandel, iseunin olo na imiti olo na ŋnsya ŋnsi mnsitidos mnsi utihun. 10 Bo pñig wa ze kleri ksi injand infulhi, bo zu wolo ilaankun antom ulapno. 11 "Bo pler knoŋt kfulamul duzu pkak" psi mhuru, boler wolo na knjand knfulki antom bozu ilaankun ze kjok wolo. 12 Bo pjek izij itihunin uzuuz isi boktihuninhi zun ze iimna nde pzu ŋa ze knoŋt kjina, nde ler ŋolo na injand infulhi, antom nde zu ŋolo ilaankun. 13 Bo punun ofoou ze pkak psi bronsi, ze duzu pkak bo ptar knoŋt ksi mmuuz nfulamul. 14 Duzu ukau bo pzu yun itihunin uzuuz inlempnhi pkak: ijool, igarfu isi oyemz ŋmpah na ŋnsya ŋi kngurnŋi pñaak. Ze duzu wolo nde ptar injand infulhi antom nde zu ilaankun zolo. 15 "Zoyaar Aroŋ na bowk antoom pler zun ze iimna na yun zolo uzuuz, bowk Koati opbi pjek ŋun ŋminzŋi psona; ka ŋun ŋiimuŋi bozo pdapro ŋa, antom bo ki kez: ŋun ŋminzŋi ŋo ŋnsi oku uzoñnor bowk Koati kai phyana. 16 Eleasar awk Aroŋ nmpenen Uzi, a oun pka onkont mnsitidos; okandel na nsensu, na un onhaloi ode oknhuloi onzañi, na mnsitidos pkirn baña; apka onkont zun ze iimna na ŋun ŋhoŋi pñign wolo."17 NYEEK jak Moises: na Aroŋ: 18 "Nde ika hutun phwkpliin bokoatita ka ptoom ze psoof bolevita. 19 Uni nde kaun pdo boko antom bo duko na phila, bo ki kez, zoyaar boko an ñog ze ŋun ŋiimuŋi: Aroŋ na bowk bo pneej zun ze iimna, antom bo hul boko kana ña na utihun lo na kfah lo. 20 Ka bokoatita bozo pneej antom pten ŋun ŋiimna, antom bo ki kez.
Kfah ksi Bojersonita
21 NYEEK pot lado na Moises: 22 "Finun bowk Gersoŋ ze mi bo omi ze phwkpliin boko ze iiñ boko, 23 Ujaau bonkaukunk ŋnlur 30 ampjau ze 50, boukun pneej zutihun antom pseh kfah zoku uzoñnor. 24 Utihun bi oun usi bogersonita ze phwkpliin boko usi boi ptihun zoku uzoñnor na pkuŋo ŋunu. 25 Bo pkuŋo inoŋnt zoku uzoñnor, kleri olo o ksi knjand knfulki knhoki duzu olo, inoŋnt zoneeji oku uzoñnor, 26 inoŋnt isi unaam na inoŋnt oneeji unaam uminzwi; bosa ka phya na ital olo uz na yun olo itihunin uzuuz. 27 Aroŋ na bowk bo okun pzoŋ utihun uzuuz usi bogersonita, pjaaŋ boko ŋun bo kaŋi pkuŋo. 28 Utihun undaawi oun utihun bogersonita ze phwkpliin boko, zoku uzoñnor; utihun boko o pho zeu Itamar, awk Aroŋ, nmpenen Uzi.
Bomerarita
29 Zonkont bowk Merari uz, finun baka ze mi bo omi ze iiñ boko ze phwkpliin boko. 30 Ujaau bonkaukunk ŋnlur 30 ampjau ze bonkaukunk ŋnlur 50 finun ña akneeji antom pdo utihun zoku uzoñnor. 31 "Utihun boko zoku uzoñnor o pho pkuŋo itaagwa isi Oku uzoñnor, na yun olo na isap na izim olo. 32 Injaka isap uz pfoyo uzaanz na izim olo, iluzi olo na ikuuri, na itala, na ŋun ŋñignŋi olo uzuuz. Bo pdo ŋntihun uzuuz ŋnliitroŋi na un ominzun. Nde pdu ktiim ksi kana ñiinz nde soond lo ŋun akaŋi pjek. 33 Undaawi oun utihun usi phwkpliin Merari kai zoku uzoñnor, zeu prim Itamar, awk Aroŋ nmpenen Uzi".
Ofinu bolevita
34 Moises na Aroŋ na boyeek uzoñnor bopugi bofin bowk bokoatita, ze mi phwkpliin boko omi, na mez boliin boko, 35 Boiinz uzuuz bosi ŋnlur 30 ampjau ze ŋnlur 50 boneejki zutihun uminzwi antom ptihun, zoku uzoñnor. 36 Bonfinoki ze mi phwkpliin boko omi bo o nkunt 2.750. 37 Bondaaki bo okun baña bonfinoki ze phwkpliin bokoatita bokntihunki zoku uzoñnor. Bonfinoki ze mi NYEEK jakmunk Moises na Aroŋ.
Ofinu bowk Jersoŋ
38 Bogersonita fino ze mi bo omi ze phwkpliin boko, iku boliin boko. 39 Bonkauki ŋnlur 30 phya duzu ampjau ze ŋnlur 50 baña uzuuz boneejki zutihun uminzun zoku uzoñnor, 40 bonfinoki uzuuz ze phwkpliin boko, ze mi iku boliin boko omi bo o 2.750. 41 Baña bonfinoki ze phwkpliin bowk Gersoŋ, ze baña uzuuz bokntihunki zoku uzoñnor, bosi Moises na Aroŋ finki ze mi NYEEK jakmi.
Ofinu bowk Merari
42 Baña bondaaki bo okun bonfinoki ze phwkpliin Merari, ze mi bo omi ze pliin boko ze iku boliin boko, 43 Bonkaaki ŋnlur 30 phya duzu ampjau ŋnlur 50, boneejki ze pdo utihun zoku uzoñnor, 44 Bonfinoki ze phwkpliin boko bo o nkunt 3.200. 45 Bonfinoki ze phwkpliin Merari bosi Moises na Aroŋ finki ze mi NYEEK jakmunk Moises.
Ŋnumeru bolevita
46 Bonfinoki uzuuz ze bolevita bosi Moises finki na Aroŋ bohuli boisraelita, ze mi phwkpliin boko omi ze mi iku boliin boko omi, 47 Bosi ŋnlur 30 phya na duzu ampjau ŋnlur 50, boneejki zutihun pseh ifah boko psona ŋun ŋnsi oku uzoñnor. 48 Bonfinoki ze boko uzuuz bo o 8.580. 49 Hunkran bofinoki ze mi NYEEK jakmunk Moises, Kana ña zutihun lo ze kfah lo; ze mi NYEEK jakmunk Moises.