Ŋnumeru na utihun bolevita
3
Bondaaki bo okun iiñ Aroŋ na Moises, zonu NYEEK ladoi na Moises zonkuŋ Sinai. 2 Itiim indai oun isi bowk Aroŋ: Nadab nnseke, Abiu, Eleasar na Itamar. 3 Itiim indai oun isi bowk Aroŋ, bopenen Uzi bonkirouki ba iimnani antom pdol utihun injaka bopenen Uzi. 4 Ka Nadab na Abiu bokez zurun NYEEK, kero boya na uroo bani pho uhimna NYEEK biri, zolaal Sinai; ka bozi buk bopoz; Eleasar na Itamar botihun injaka bopenen Uzi zurun Aroŋ aliin boko.5 NYEEK jak Moises: 6 "Ñognan kiiñ Levi, uzu kolo zurun Aroŋ, nmpenen Uzi, antom ktihunar lo, 7 antom bo do ifah boko na lo na bopugi uzuuz, zurun oku uzoñnor, antom botihun zoku. 8 Bo pbaap ŋun ŋhoŋi zoku uzoñnor bo pdo kfah boko ze bowk Israel antom bo do utihun boko zoku uzoñnor. 9 Hunkran woun phul Aroŋ bolevita na bowk uzuuz; bopuno ze psoof bowk Israel atom bokiro bo o bosi boko. 10 ka wo pzu Aroŋ na bowk bodo utihun boko usi penen Uzi, ña ampazi ñog pdo utihun uminzun a ka pfiŋo."
11 NYEEK jak Moises: 12 "Nji jek bolevita ze psoof bowk Israel antom bo o ze kfah boseke bohaz bosi Israel; ka bolevita o pho bosinin. 13 Zonkont boseke uzuuz bo o bosinin; ptep zonu Nji fiŋunk boseke uzuuz zosaak Ejitu, Nji diitun boseke uzuuz ze Israel bo o bosinin, ptep ze ña njina ampjau ze ŋnsaam; ŋo pho ŋnsinin. Nji, oun NYEEK."
14 NYEEK lado na Moises zolaal Sinai, jak lo: 15 "Finun bolevita, ze phwkpliin boko ze mi iku boliin boko omi, ze iiñ boko; pisun kana ñiinz ptep ze pli 1 phya na duzu." 16 Hunkran Moises dodun onkont boko, ze mi NYEEK jakmunk lo. 17 Itiim bowk Levi yo Gersoŋ, Koati na Merari. 18 Itiim bowk Gersoŋ yo Libni na Simei ze phwkpliin boko. 19 Bowk Koati ze phwkpliin boko o Anraŋ, Isar, Ebroŋ na Uzyel. 20 Bowk Merari o Mali na Musi. Ze iiñ bolevita bondaaki bo okun boliin phwkpliin bonkauki itiim.
21 Kiiñ Gersoŋ kho ksi bolibnita na kiiñ bosimeita; iiñ iminzi yo isi bogersonita ze phwkpliin boko.. 22 ofinu boiinz bonkauki pli 1 phya na duzu ze bonfinouki bo o nkunt 7.500. 23 Iiñ bogersonita ze phwkpliin boko ka pzu nku boko ze kfez oku uzoñnor, ze phyour onu. 24 Nmbuli phwkpliin bogersonita a pho Elyasaf, a o awk Lael. 25 Utihun bowk Gersoŋ zoku uzoñnor, o usi pler oku pñig olo na knoŋt zoneeji olo, 26 inoŋnt isi unaam, knoŋt ksi oneeji unaam knfoyoki oku na pkak, injaka itala na utihun unkoulani na oku.
27 Kiiñ Koati ka bowkoliin boramita, boizarita, boebronita, na bouzyelita bominzki bo okun phwkpliin bokoatita. 28 Boiinz bonfinouki bosi olur 1 o bompeki olur 1 bo o nkunt 8.600 bokoatita bokaukun onkont zun ze iimna. 29 Kiiñ Koati ze phwkpliin boko ka pzu nku boko zojir zeu oku. 30 Nmbuli kiiñ bokoatita ze phwkpliin boko o pho Elizafaŋ, awk Uzyel. 31 Utihun boko bo pho plap ukau, pbaap omes, okandel, ikak, yun ikntihuninhi zun ze iimna, isi boktihuninhi, na knoŋt na ŋun uzuuz ŋnsi utihun uminzwi. 32 Nyeek bohuli bosi bolevita a pho Eleasar, awk Aroŋ, nmpenen Uzi; akaun onkont baña bonkauki utihun pbaap zun ze iimna.
33 Kiiñ Merari ka bowkoliin bomalita na bomusita bañauki bo okun baña bosi iiñ bomerarita ze phwkpliin boko. 34 Boiinz bonfinoki uzuuz bosi pli 1 phya na duzu, bo o nkunt 6.200. 35 Nmbuli nnsi kiiñ Merari ze phwkpliin boko a pho Suryel, awk Abyail; bo pzoñnor zojir duzu oku. 36 Utihun bomerarita o usi pbaap itaagwa ihanki oku na ilaanki olo, isap iluzi olo, na yun olo uzuuz inkoulani na utihun uminzwi. 37 isap uz isi unaam ze kwaŋ, pfoyo unaam oku na iluzi olo na ikuuri olo na ital olo.
38 Baña bonkauki pzoñnor zurun oku, zojir pmair onuu, zurun oku uzoñnor, zojir pmair, bo pho Moises na Aroŋ, na bowk, bokaukunk pdo wojun zun ze iimna, antom pdo utihun boko zonkont bowk Israel; ña ani pho nlevita ñog ze olo aka pfiŋo. 39 Ofinu boiinz uzuuz bosi iiñ bolevita bonkauki pli 1 pempen bosi Moises na Aroŋ finki ze boko ze phwkpliin boko, ze mi NYEEK jakmi, bo o okunt 22.000.
Mburi bopoz boseke
40 NYEEK jak Moises: "Finun bopoz boseke boiinz uzuuz ze Israel, kana ña ze ktiim lo, ankai pli 1 phya na duzu. 41 Diitnan bolevita bonhoki pduko ze kfah kana bopoz boisraelita. Dolun un ominzun uz na ŋnssam ŋnsi bolevita ŋhoŋi pduko ze kfah kana onsaam oseke ze ŋnsaam ŋnsi boisraelita. Nji njoun NYEEK." 42 Hunkran Moises finun bopoz boseke bosi bopugi Israel, injaka ze mi NYEEK jakmunk lo. 43 ŋnsi bopoz boseke boiinz bosi Israel bompisoki, bonkauki pli 1 phya na duzu bo o nkunt 22.273
44 NYEEK jak Moises: 45 "Diitnan bolevita bonhoki pduko ze kfah kana bopoz boisraelita. Dolun un ominzun uz na ŋnssam ŋnsi bolevita ŋhoŋi pduko ze kfah kana onsaam oseke ze ŋnsaam ŋnsi boisraelita. Nji njoun NYEEK. 46 Ze mi ofinu osi bowk boisraelita boseke peŋunk psum ampe ŋnsi bolevita, 273 bonduklokunk ka pganzo. 47 wo pjek ze kana weene, ijaawi 5 isi praata, ze mi kjaawi omi zun ze iimna, wo pjek ya 20 kana kjaawi. 48 wo phul Aroŋ na bowk onsaam osi boisraelita ganznounk." 49 Hunkran Moises jekdun onsaam ongazni boseke bonduklokunk zonkont bolevita. 50 Moises seh onsaam ze iñen bowk boseke bosi Israel, bo o 1.365 isi siklu isi kjaawi, ze mi kjaawi zun ze iimna omi. 51 Ka Moises hul Aroŋ na bowk onsaam bongazokunk ze mi NYEEK hulmunk lo prim, injaka mi NYEEK jakmunk Moises.