Pjinjiinzun oku uzoñnor
5
NYEEK lado na Moises jak lo: 2 "Zuun bowk Israel bopunun ze zun uzoñnor baña bonkaaki iziñr ijeenkle, bosi pñaak kpumpi boko zoleef na bonzopki uzuuz zonkont bo dapro kliks un onkezi; 3 nde punan baka zunaam uzoñnor; at o ñiinz o ñaaz, zonkont bo ki kzopun unaam uzoñnor, zun nji oonzi." 4 Ka bowk Israel do ze mi NYEEK jakmunk Moises punun boko zunaam uzoñnor.Uluk usi un ontuuntoi
5 NYEEK pot lado na Moises jaklo: 6 Jakun bowk Israel: "Ze ñiinz o ñaaz do pjwa ploŋ ze ŋun ŋnsi boiinz ai ka jetna, pzu NYEEK kjoozi, ña aminzun do un ontuuntoi. 7 Aka pjeñlo ze pjwa adopi, aluk ŋun akaŋi pluk uzuuz ŋnsi un ontuuntoi, apbundar uyaas uñenzan, aphul ŋun uzuuz ze ña adolunk un ontuuntoi. 8 Ze ña aminzi kezi azi ka awk aliin sotok anhoi pseh uluk lo, ze minzmi ña antuuntoi ze NYEEK, uluk o pho usi nmpenen Uzi. Ze uluk uminzwi, bosa ka phul nmpenen Uzi ompalalu uz onhoi pdoon wojun usi pjour pjwa ña minzun dopi. 9 Ŋun uzuuz ŋhaloŋi ŋnsi ŋun ŋnjiinzŋi ŋnsi bowk Israel, biinŋi hul nmpenen Uzi ŋo pho ŋnsi lo. 10 Ka ŋun ŋiimnaŋi kana oloŋ ze ŋolo o pho osi lo; un ña huli nmpenen Uzi o pho osi lo."
Bohaz boani phazun
11 NYEEK pot lado na Moises jak lo: 12 Ladoon na bowk Israel antom ujak boko: ze ahar ña amphazun ze lo sol ya ŋal ñiinz aloŋ, 13 ze ñiinz aloŋ piinz na lo, ka un ominzi meno ze kil ahina, ka ahar menun lo un ominzi, ka ñaaz aminzun zopi, ka ozi ka ña anhoi kmatr pzuup un ñaaz aminzun doli, ka ña azi bup ñaaz aminzun ze kmpiinz na ñiinz aloŋ, 14 ze ñiinz siink kñendi zonkont ahar, ze mi azopmi, o a zopi, 15 Ñiinz aminzun ka phya na ahar zurun nmpenen Uzi, a sa pot o pbina un lo onhaloi uz zonkont ahar; osi ŋnlitru 2 ŋnsi ifor isi sevada, ka azo phas mnsitidos ze ifor sevada, ka azo pzu nsensu duzu sevada, zonkont o un onhaloi osi kñendi, un onhaloi a osi mnlelnin, antom pjwa pun ze knfasi.
16 Nmpenen Uzi opñogun ñaaz zurun pkak psi Uzi, pzulo zurun NYEEK. 17 Nmpenen Uzi opjek mnzup miimna pzu molo ze knjuju; apjek mbool mhomi zozee oku uzoñnor pzu molo ze mnzup. 18 Apjaaŋ ñaaz zurun NYEEK, aplel a weene; apzu ze kñen lo un onhaloi osi mnlelnin osi un ode, osi kñendi. Mnzup mhai mnkami khuzin, mo pho ze kñen Nmpenen Uzi. 19 Nmpenen Uzi apzu ñaaz abisro: apjaka: ze ña azi piinz na wi, uzi dol ahinu un ontuuntoi, nin uzi zop ba um o zunima, mnzup mhai ubisromink mo zo pdolu khuzin. 20 Ka, usa dol ahinu khuzin, zopun oleef nu, piinz na ñiinz aloŋ ani pho ahinu, 21 nmpenen Uzi ka pzu ñaaz abisro, ubisro usi khuzin apjaka, NYEEK opzuu khuzin ze psoof bopugi nu, NYEEK opzu isou nu ihaŋ ofooza, antom iboou, pzu pu nu phur antom psum; 22 Mnzup mndaami mnsi khuzin mo pneej zoleef nu, mo pzu pu nu phur, pzu isou nu ihaŋ ofooza, iboou. Ñaaz opja: Hunkranda! Hunkranda!
23 Nmpenen Uzi o pis khuzin kminzki zoliuri antom afah kolo na mnzup mhai. 24 Nmpenen Uzi opzu ñaaz adaan mnzup miimna, zoyaar lo antom pdaan molo mo pdola khuzin zoleef lo. 25 Nmpenen Uzi opjek un onhaloi osi ifor isi pñend ze kñen ñaaz, aphiind un onhaloi zurun NYEEK; aphya na un onhaloi ze pkak. 26 Apbiñ kñen kloŋ ksi un onhaloi osi ifor na un onhaloi osi mnlelnin, nmpenen Uzi optura duzu pkak antom ahul ñaaz mnzup mhai adaan. 27 Ze ñaaz zopi, azi hazun ze ahina, zoyaar nmpenen Uzi zu lo pdaan mnzup mnsi khuzin, mnzup mizmi mo pneej ze yaa, pzu lo omindo oyeek; pzu lo phur zoleef antom psum, azo philun pbuk, apduko pho ña nnsi khuzin ze psoof bopugi lo. 28 Ze ñaaz ampzop, ze a o ñaaz anjiinzi, apduko na mburi antom ol hilnun pbuk bopoz.
29 Ondai oun oiimna osi kñendi, zoyaar ñaaz amaroi sol ya zop na ñiinz aloŋ; 30 zosiinkr ñiinz kñendi zonkont aliinzo a ahar. Nmpenen Uzi o pzwa zurun NYEEK, apzwa a do wojun uminzwi uzuuz. Ñaaz opzwo zurun NYEEK; nmpenen Uzi opzu oiimna ominzun duzu lo. 31 Ñiinz azo pka pjwa, ka ze ahar opka pjwa apka omindo zonkont pjwa lo."