Oiimna ña anhimnani
6
NYEEK jak Moises 2 alado na bowk Israel, a jak boko: "Ze ñiinz o ñaaz jeu pdo ubisro antom pho anhimnani, antom adiitno a o nnsi NYEEK, 3 Azo pdaan pkem nin un oloŋ onsaunti, azo pseh unagri ka azo pdaan pkem pnhikpi. Azo pdaan un oloŋ ompuni ze mhuba, ka azo pdaan mhuba mhalu nin mnkaimi. 4 Ze nkil uzuuz anhimnani azo pde un oloŋ ompuni ze pzep mhuba, nin mbuk nin ifitr. 5 "Ze a um o zeu oiimna, oyel lo ozo ptiho an akint atoom ŋnu ŋnsi anhimnani zeu NYEEK, apjinjiinzno, aphutun oyel ween lo antom ohaal.6 Ŋnu uzuuz ŋnsi aiimnaŋi ze NYEEK azo pñog ze kliks. 7 Ŋanun ot oko aliin o aniin, kezun o amaka ñiinz o ñaaz, azi hilun pzopun oleef lo zonkont boko, zokezr boko; zonkont phimnano psi Uzi o duzu ween lo. 8 ze ŋnu uzuuz ŋnsi phimnan lo a phimnano ze NYEEK.
9 Ze o ze kwaŋ lo kez mnkartat, antom zopun oyel lo onhimnani, aka ptih oyel lo apka ŋnu 7 kero ka o toom pjinjiinzno zonu pjinjiinzno. 10 Zonu ojaandun, apbina ŋwale 2 ŋmpozŋi ŋnsi pgof phul nmpenen Uzi zoneeji oku uzoñnor. 11 Nmpenen Uzi ophul owale 1 injaka un onhaloi osi pjour pjwa, oloŋo osi wojun unturowi; antom ahilun pjouro pjwa lo, ze mi adapromunk kliks. Hunkran zonu ominzun, aka pjinjiinzun ween lo. 12 Aka pdiitun ŋnu ŋnsi aiimnanoŋi ze NYEEK, aphya na un onhaloi osi un ontuuntoi, a pbi na ompalalu oiinz onkai olur 1; ze ŋnu ŋnsi adiitnoŋi zotepi; ze ŋnu ŋnzipŋi uzuuz, ze mi phimna lo zopi. 13 Uni oun oiimna osi ña anhimnani: zoyaar lo antoom ŋnu lo ŋnsi aiimnaŋi, boka phyana yaa ze plumun oku uzoñnor. 14 Aphul NYEEK un lo onhaloi, ompalalu oiinz osi olur 1 onhani pka ktap, osi wojun unturowi, ompalalu ohaz onkai olur 1 osi un onhaloi osi pjwa,na opi okal osi olur 1 onhani pka ktap, osi un onhaloi osi phyooŋ, 15 asa pot ka phyana pntuuru opoŋ onhani pka iferment, na obulu osi ifor indeŋlhi inagohi na mnsitidos, na iwalans yani pka iferment uzuuz na un onhaloi osi mhagzin na ŋun ŋhaloŋi ŋnsi isepru na ŋun ŋhaloŋi ŋnsi praan. 16 Nmpenen Uzi o phya na ŋun ŋminzŋun zurun NYEEK, apdo wojun usi pjour pjwa, na un onhaloi osi wojun unturowi; 17 aphul ompalalu osi wojun usi phyooŋ usi NYEEK, na pntuuru psi opoŋ onhani pka iferment; nmpenen Uzi opsoond un onhaloi osi un ode na praan. 18 Ze plumun oku uzoñnor anhimnani aptih oyel aiimnanunk, a pseh a pzu zuroo unhwoi zeu wojun usi un onhaloi osi phyooŋ. 19 Zotoomr ña anhimnani ptih oyel weene, nmpenen Uzi opjek pkaba prei psi ompalalu, onhoi ojuŋi, na obulu onhani pka iferment onhoi ze pntuuru na kmbaru na iferment, apzu ŋa ze kñen ña anhimnani. 20
Nmpenen Uzi ophind ŋa injaka ŋun ŋhaloŋi psoondo zurun NYEEK; ŋun ŋminzŋi ŋnjiinzi duk o ŋnsi nmpenen Uzi, injaka ujuuns usi un onhaloi na pkaba, ŋho phindo uz. Zotoomi ŋun ŋminzŋi uzuuz ña anhimnani ahilun pdaan pkeme. 21 Ondai oun oiimna ña anhimnani andoli phuuz; na un onhaloi osi ai phul NYEEK osi phimnan lo, na un oloŋ onhaloi osi asiinki phul. Apdo ubisro usi a jakwi, ze mi ña anhimnani ai ka do.
Mnjona ze bowk Israel
22 NYEEK jak Moises: 23 Alado na Aroŋ na bowk, a jak boko: Hunkran ndeun pzu mnjona ze bowk Israel, antom nde jak boko jeink:
24 NYEEK opzu mnjona duzu nu antom pbaapu;
25 27 NYEEK opzu knfasi mnkil lo ze wi, apñago nu;
26 NYEEK opten nu na kfundar antom phulu phyooŋ.
27 Ze minzmi bo pdu ktiim ni duzu bowk Israel; hunkran njoun pzu boko mnjona.