Mnzup mnsi pjinjiinzun
19
NYEEK pot lado na Moises na Aroŋ: 2 "Uni oko plul psi oiimna osi NYEEK jaki ña biina: zuupun bowk Israel antom bo bina owai ohaz ojeenkle, onhani pka ktap ampo zwo zutihun. 3 Nde hulun na Eleasar nmpenen Uzi antom a punun owai ohaz ominzun zunaam uzoñnor antom ofiŋo zurun nmpenen Uzi. 4 Eleasar nmpenen Uzi apjek pñaak olo antom agur polo na pkoño zurun oku uzoñnor ŋhyaas 7. 5 Owai okal ominzun opturo zurun lo; na knjand, na oyemz, pñaak na oziip olo. 6 Nmpenen Uzi opjek pun mndera mnsi sedru, na isopu na bun ujeenkle ukndwobi karmesiŋ, mnjeenkle, aplis ŋa ze mezu uroo usi owai ohaz kturnounk. 7 Ka nmpenen Uzi ka pñou yun lo, apñou oleef lo na mnzup, antom aneej zunaam uzoñnor, nmpenen Uzi opduko na kzopi ampjau ze montna. Hunkran a hilnun pneej zuzoñnor, apduko na kzopi ampjau ze montna. 8 Ka ñiinz anturunk owai ohaz apñou yun lo na mnzup, na oleef lo uz; apduko na kzopi ampjau ze montna. 9 "Ñiinz anjiinzi aphul ofoou osi owai ohaz, apzwa zojirun unaam uzoñnor, zun ze njiinzi, uzoñnor bowk Israel opbaapa, antom bozu mnzup mnsi pjinjiinzun. Oko un onhaloi osi pjour pjwa. 10 Ñiinz anhulunk ofoou osi owai ohaz apñou yun lo, apduko na kzopi ampjau ze montna. Un ominzi o pho oiimn onzañi ze bowk Israel na boya bonhoki ze psoof boko.11 "Ña andaproi kliks ña nkezi apduko na kzopi ampka ŋnu 7. 12 Zonu oajzan na onu ojaandun a pjinjiinzno na mnzup mndaami a pduko pjinjiinz; ze ampjinzjiinzno zonu oajzan na onu ojaandun, azo pjiinz. 13 Ña ndaproi kliks ña nkezi ze ampjinjiinzno, azopun oku NYEEK; ña minzi ka pfiŋo ze Israel; zonkont mnzup pjinjiinzno mozi guro duzu lo, apduko na kzopi; kzopi lo um duko duzu yaa. 14 " Ondai oun oiimna ze ña kez zoku oloŋ: ña neej zoku ominzun na ña anhoi ze olo, boko uzuuz bo pduko na kzopi ampka ŋnu 7. 15 Imbaalu uzuuz na itisel yani plero, yo pduko na kzopi. 16 "Ze ña anhoi zuri andaproi ña nfiŋoi na keeje, o ankezi pkez psi Uzi, o dapro imoon, o zongune, apduko na kzopi ampka ŋnu 7. 17 "Zonkont ña nzopi, bo pjek ofoou osi oiit onturoi pjour pjwa, o pzwo ze mnuzup mnjiinzmi zojaaru. 18 Ñiinz anjiinzi opjek knah ksi isopu, pñoyun kolo ze mnzup, antom pgur molo zoku ominzun, duzu izij lo isi utihun, na baña bonhoki zolo; na baña bondaproki imoon, o ña nfiŋoi, o ña nkezi pkez psi Uzi, o ña ndaproi ongune. 19 Ña njiinzi apgur ña nzopi mnzup zonu oajzan, na onu ojaandun ña anhilunk zopi a ka pñou yun lo itiimo, antom añoo ze mnzup, ze montna apduko pjiinz.
20 Ña nzopi, antom azi jinjiinzno, a ka pfiŋo ze psoof uzoñnor bowk Isreal, zonkont azopun zun ze njiinzi ze si NYEEK: mnzup mnsi pjinjiinzun mozi guroo duzu lo; aduko na kzopi. 21 Un ominzi o pho oiimna onzañi ze boko; Ña angurunk lo mnzup mnsi pjinjiinzun apñou yun lo itiimo, ña angurunk mnzup mnsi pjinjiizun apduko na kzopi ampjau ze montna. 22 Un ña nzopi daproi, un ominzun opduko na kzopi uz. Ña andaproi ze un ominzun ña aminzun opduko na kzopi ampjau ze montna.