Utihun usi bopenen Uzi na bolevita
18
NYEEK jak Aroŋ: “Wi na bowku, na kiiñ ksi aliin nu, nde pkuŋo pjwa pnjaalpi na ku kiimna; wi na bowku nde pkuŋo pjwa pnjaalpi na utihun nde injaka bopenen Uzi. 2 Bina bowkoliin nu bolevita, bosi kiiñ Levi, antom bokoulor na wi, boziinknu utihun, wi na bowku nde pho zurun oku okmbaapi itaagwa isi phuuz. 3 Bolevita bo pho zeu nde antom pdol utihun, ka bozo pñog ze kwaŋ pkak, nin bozo pñog ze un oloŋ onhoi zun ze iimna, bo ki kbi kez, na nde uz. 4 Bo pho na wi, antom pdol utihun uzuuz zoku uzuñnor; nin ña mpazi azi hilun pñog ze kwaŋ nde. 5 "Wi na bowku nde pka onkont osi zun ze iimna na pkak, oreu Uzi ki kbi kjet duzu bowk Israel. 6 Nji, NYEEK, nji dat pzaro bolevita ze psoof bowk Israel; nji hul nde baka injaka un onhaloi antom bo hilun pka onkont na utihun usi oku uzoñnor, 7 ka wi na bowku, nde pho bopenen Uzi, antom pka onkont utihun usi pkak, na zun ze kfez knoŋt kyeek. Njo hul nde kñago ki antom nde tihun injaka bopenen Uzi. Ña ze nde, nya ñog ze kwaŋ zun ze iimna apkez.8 NYEEK pot jak Aroŋ: "Nji hulu ŋun ŋndiitnoŋi na ŋun nin ŋnsi ŋun ŋhaloŋi, na ŋun ŋiimuŋi uzuuz ŋnsi bowk Israel; nji hul baka ŋa injaka kfah nu na ksi bowku onzañi. 9 Ze ŋun ŋmpeŋi phimun ŋhani pturo uka pseh ŋndaaŋi: ŋun boko ŋhaloŋi uzuuz, na ŋun boko ŋhaloŋi uzuuz ŋnsi ŋun ŋnde, na ŋun boko uzuuz ŋhaloŋi ŋnsi pjour pjwa, na ŋun boko ŋhaloŋi uzuuz ŋnsi pjour un ontuuntoi, ŋnsi bo biinŋi bi phulin ŋho pho ŋun nu ŋiimuŋi na ŋnsi bowku ŋiimuŋi. 10 Wo pde ŋa zun ze njiinzi; boiinz uzuuz bo pde ŋa; ŋho pho ŋun ŋnjiizŋi ze wi. 11 "Ŋun uzuuz ŋhaloŋi ŋnsi bowk Israel hindŋi ŋho pho ŋnsinu: un onhaloi osi ŋun ŋmpeŋi pfiro na ŋun uzuuz ŋhaloŋi ŋhindoŋi ŋnsi bowk Israel; wi na bowku boiinz na bompili, nji hul nde ŋa onzañi; baña nu uzuuz bonjiinzki bohilun pde ŋun ŋminzŋi. 12 "Mnsitidos uzuuz mpemi pnuro, isepru, na isepru na iseke injarohi na trigu ŋnsi bo hulŋi NYEEK, nji hulu ŋa. 13 Mbuk mnseke mnsi mmul mhomi uzuuz zosaak, mnsi nde biinmi phul NYEEK, mo pho mnsinu; baña uzuuz bonhoki ze mez nu bonjiinzki bo hilun pde ma. 14 "Ŋun uzuuz ŋiimnaŋi ze Isreal ŋho pho ŋnsinu. 15 Bopoz boseke boiinz uzuuz ŋun uzuuz nkaŋi phila ŋnsi nde biinŋi hul NYEEK, boiinz na ŋnsaam bo pho bosinu. Ka wi wo pdigzan uluk na mnzimlin mnsi bopoz boseke boiinz o ŋnsaam ŋmbukoŋi urun; ŋani pjiinz wo pzimlan ŋa. 16 Onsaam oi pzimlan ze o ka pli ploŋ psi phila, wo pdikzan uluk usi mnzimlin, ze prez pnjaalpi psi onsaam ozak, ipesu 5 isi praata, injaka onsaam ozak osi zun ze iimna, o a kjaawo 20 ŋnsi jera. 17 "Ika digzan uluk usi mnzimlin owk oiit okal ombukoi urun, nin ompalalu, nin opi ohaz, zonkont ŋiimni. Wo pgur pñaak ŋolo duzu pkak, wo ptur mnir ŋolo injaka un onhaloi mikñeelmi un onliili osi NYEEK. 18 Oyemz ŋolo o pho osinu, na ujuuns injaka un onhaloi hindo bo pho usinu, na psou prei. 19 Ŋun uzuuz ŋnsi ŋun ŋhaloŋi ŋiimnaŋi, ŋnsi bowk Israel biinŋi phul NYEEK, nji hulu ŋa, na bowku boiinz na bompili, injaka kfah nu ksi ukaki onzañi; Oko phuuz psi ptila nji dopi na wi na kiiñ nu phuuz pminzpi pozi ka pkito." 20 NYEEK sa pot lado na Aroŋ: "Zosaak lo, uzo pka nin phij ploŋ zolo.Nji njoun phij nu ze psoof bowk Israel.
Kfah ksi bolevita
21 "Nji hul bolevita odismu uzuuz osi bowk Israel osi phij boko, injaka uluk usi utihun bokdobi, utihun zoku uzoñnor. 22 Ze mi phya na urun bowk Israel bozo pñoŋ ze kwaŋ oku uzoñnor, ze bodo jaunk, pjwa pa; bo pkez. 23 Ka bolevita bohokun pdol utihun bonkona boko zoku uzoñnor; bohokun pseh pkuŋ psi un onhoi ze olo; Un ominzi o pho oiimna onzañi ze iiñ nde. Bozo phij nin un oloŋ ze psoof bowk Israel. 24 Nji hul bolevita odismu uzuuz osi bowk Israel biini phul NYEEK injaka un onhaloi. Un ominzun kaun ka nji ja bozo phij nin un oloŋ ze psoof bowk Israel. 25 NYEEK lado na Moises jak lo. 26 Asa lado na bolevita a jak boko: "Zoyaar nde anseh ŋndismu ŋnsi bowk Israel, ŋnsi nji hulŋi nde injaka phij nde, ze ŋolo nde psoond un onhaloi osi NYEEK:onhoi odismu osi odismu. 27 Un onhaloi osi nde huli opzwo injaka trigu isi nde tuthi, injaka pkem mhuba uz mnsi nde poñmi. 28 Nde uz nde phul un onhaloi osi NYEEK osi ŋndismu ŋnsi ŋun uzuuz nde sehŋi bowk Israel. Nde pjek kfah khokunk ksi NYEEK, antom nde hul Aroŋ nmpenen Uzi. 29 Ŋun uzuuz ŋnsi nde huloŋi, nde punun ojir ompei pho na mnjona injaka un onhaloi nde hul NYEEK olo, injaka un onhimni. 30 " Zotoomr nde phulin ojir ompei pho na mnjona, nde hilun pduko na ondukloi ze trigu nde polhi zun ze poli na mhuba uz nde poñmi ŋo pho ŋnsi bolevita. 31 Nde na pzaro nde, nde hilun pde ŋa, zonkont oko uluk usi utihun nde zoku uzoñnor. 32 Ze nde hul ojir ompei pho na mnjona osi NYEEK, nde zo ptuunto, ka ndezo pzopun ŋun ŋhaloŋi ŋiimuŋi ŋnsi bowk Israel. Ze minzmi nde zo pkez.