Plaaŋra Aroŋ zeeñi
17
NYEEK jak Moises: 2 “Ladoon na bowk Israel antom bo hulo ilaaŋra 12, ploŋ psi nmbuli nnsi kiiñ kana mez ze phwkpliin boko Antom nde pis ktiim ña ze plaaŋra lo. 3 Ze plaaŋra psi Levi apis ktiim Aroŋ. Nyeek nnsi kiiñ ka pka plaaŋra ploŋ. 4 Zuun ilaaŋra iminzyun zoku uzoñnor zurun ukau usi phuuz zun njoi pjik na nde. 5 Plaaŋra psi ñiinz nji dati, po pzeñ. Hunkran njoun ptoom na kulum bowk Israel kulum ki nji ze psoof boko.” 6 Hunkran Moises ladoun na bowk Israel, ka jek ilaaŋra 12, ze mi boyeek iiñ boko omi. Plaaŋra psi Aroŋ phoonz ilaaŋra 12 indaayun. 7 Moises zu ilaaŋra iminzyun zurun NYEEK zoku osi phuuz.8 Konu luŋ jiinzi, Moises neej zoku osi kmatr, ka iin plaaŋra psi Aroŋ, pnsoondpi kiiñ ksi Levi, ptoji, ankint zeeñi, buk mbuk amendwiña. 9 Moises punun ilaaŋra iminzyun zurun NYEEK, ya na yolo zurun bowk Israel uzuuz. Ka bo iin un ominzun, kana ña kjek plaaŋra lo. 10 NYEEK jak Moises: “Botnan plaaŋra psi Aroŋ zurun ukau usi phuuz, antom pbano injaka mnjaaŋzin ze baña bombehki baña. Hunkran njoun ptoom na kulum ksi bo kulum ki nji, bo ki kbi kez.” 11 Moises do ze mi NYEEK jakmi lo a do. 12 Boisraelita jak Moises: “Ndo pkez! Ndo pmei! Ndo pmei uzuuz! 13 Ña añogi zoku oyeek osi NYEEK a pkez. Zoampho minzma ndo pkez uzuuz?”