Oñankni Kore, Dataŋ na Abiroŋ
16
Kore, awk Isar, awk Koati, awk Levi, koulor na Dataŋ na Abiroŋ bowk Elyabi, na Om awk Peleti, bosi kiiñ Rubeŋ, 2 Bonazo koulor antom huglar Moises na boiinz 250 bosi Israel, boyeek bonkaaki kfah na ulujl zurun uzoñnor bopugi, bondatokunk injaka bo dol olado. 3 Bonazo huglar Moises na Aroŋ, jak boko: "Nde zipzipni! Uzoñnor bopugi uki uzuuz boiimni, kana ña loŋ ze boko! NYEEK o ze psoof boko. Ezi kaa, nde ka deeŋ yeen duzu bopugi NYEEK?"4 Kero Moises te un ominzi, ajet limo zurun NYEEK. 5 Antom ka Moises jak Kore na knzoŋ lo: "Faan ze nfa NYEEK opsoond ña anhoi nnsi lo, na ña anhimni asi ai pñogun ze lo. 6 Wi Kore na knzoŋ nu uzuuz, hunkran ndeun pdo: Nde pjek yun iseunin insensu; 7 faan nde pzu uroo na nsensu ze yolo zurun NYEEK. Ñiinz NYEEK dati, a oun phimnan. Nde bowk Levi, nde zipzipni!" 8 Moises pot jak Kore: "Nde bowk Levi, nde siinkan: 9 Ka nde behin, nde ja nji tiiŋzi ze mi Uzi Israel datmunk nde ze psoof uzoñnor, antom nde hilun pñog ze lo, antom nde hilun pdo utihun zoku uzoñnor NYEEK, antom nde o zurun bopugi ptihunar boko? 10 Uzi ziinknun wi na bowkoliin nu bolevita. Krankanki ujeu pho nmpenen Uzi? 11 Wi, na knzoŋ nu uzuuz nde huglar NYEEK; noonzi o Aroŋ antom nde kulum lo? 12 Moises hilan pdu Dataŋ na Abiroŋ, bowk Elyab, ka bo jak lo ndozo pbi da. 13 Ka punun upununpink ndo zosaak oniiri okmbuki mntau na pnou, pfiŋ ndo zolaal ondai ozi liiŋi? Ka upot jeu pliho duzu ndo! 14 Zowadadi, uzi bina ndo zosaak oniiri okmbuki mntau na pnou, ka uzi hul ndo zun ze jaar nin izaanz mhuba ndo hij. Ka ujeu pdar boiinz injaka ndo? Ndozo phya!"
15 Moises deuz maakrin, jak NYEEK: “Ika digzan un onhaloi osi boko. Mbazi seh un oloŋ osi boko, nin ohuru; mbazi do baka un onhuzi.” 16 Ka Moises pot jak Kore : Wi na knzoŋ nu, faan nde pbi zurun NYEEK, wi na boko na Aroŋ. 17 Kana ña apjek nsensaryu, apzu insensu ze yolo. Kana ña ze boiinz 250 a pbi na insensaryu zurun NYEEK. Wi Aroŋ uz, kana ña a pbi na insensaryu lo." 18 Hunkran kana ña jekdun yun lo iseunin insensu lo, zu uroo ze yolo, ya naz na Moises na Aroŋ zoneeji zun uzoñnor. 19 Kore zoklan bopugi uzuuz ka bo huglar Moises na Aroŋ zoneeji oku uzoñnor ka ulujl NYEEK bi ze uzoñnor baña uzuuz.
Uzi nornorun boñankni
20 NYEEK jak Moises na Aroŋ: 21 "Nde loun bopugi bondaaki antom nhilun ptoom na boko ze krankanki." 22 Moises na Aroŋ juuz zozee jaa: "Aan Uzi, Uzi unhoi plik phila psi baña uzuuz! Ze ñiinz aloŋ juwi ukdeuzar uzoñnor bopugi uzuuz? 23 NYEEK jak Moises 24 alado na baña uzoñnor usi Israel uzuuz a jak boko: nde loon oku Kore, Dataŋ na Abiroŋ." 25 Moises nazo yaar Dataŋ na Abiroŋ; boyeek boisraelita ya ze kfez lo. 26 Ka a jak uzoñnor bopugi uzuuz: "Nde ñagonan nde loo oku boiinz bohuzin; nde ika dapro un oloŋ osi boko, nde ki kmei na boko ze pjwa boko." 27 Hunkran bonazodun ze kwaŋ nku Kore, Dataŋ na Abiroŋ; ka Dataŋ na Abiroŋ bo pun naz zoneeji nku boko, na bohar boko na bowk boko boyeek na bompozki. 28 Moises jaa: "Hunkran ndeun pme pja NYEEK hilun nji pdo ŋun ŋndaaŋi; Ŋozi pun ze ween ni. 29 Ze boiinz bondaaki kez injaka mnsi boiinz ai ka kez, ze khuzin kloŋ bi duzu boko injaka mnsi oagzoi phir na boiinz uzuuz, nde kme mbaza NYEEK hilun nji. 30 ze NYEEK dol un ohalu, ozee haulo antom boyuurmil ze mezu, yoor boko, na ŋun bokaŋi uzuuz, nde pme pja bondaaki beh NYEEK."
31 Kero ka toom plado olado ominzun ka ozee yuurmil zeu boko; 32 ozee haul mntuum olo yoor boko na itoh boko, na boiinz uzuuz bonhoki na Kore, na ŋun boko uzuuz. 33 Boko na ŋun bokaŋi bojet na phila ze mnkez. Ozee ler baka; bomei ze psoof uzoñnor. 34 Ze mi bokiikmunk, baña Israel uzuuz bonhoki ze kwaŋ boko bozii, ze kiik: "Ika ozee bi yor ndo uz!". 35 NYEEK hutun uroo ka utoom na boiinz 250 bonhulki insensu antom ituro.
36 NYEEK jak Moises: 37 "Zuupun Eleasar, awk Aroŋ nmpenen Uzi, ajek insensu na psoof ofoou, agar uroo unduklobunk un onloi, zonkont insensu iimni, 38 Nmpenen Uzi ka phai insensu iknhii ze yun iknseuninhi insensu isi boiinz bonjuukunk ze phila boko, na yun isehunin insensu nde lemp isiinki ibooli pkak, zonkont yun isehunin insensu ijiinzi zonkont nmpenen Uzi tihun na ya zurun NYEEK. Isiinki iminzhi ze pkak yo pho mnlelnin mnsi bopugi Israel." 39 Hunkran nmpenen Uzi akndwoi Eleasar jekdun insensaryu isi metal isi boiinz bonturokunk biinhi, bozu baña pnag ya antom plern pkak 40 ze mi NYEEK jakmunk ze mntuum Moises. Ominzi oun mnlelnin bowk Israel ja ña ani pho ze kiiñ Aroŋ azi hilun pñog psehun insensu zurun NYEEK, antom oki khir na alo injaka mi ohirmunk na Kore na baña lo.
Aroŋ Burburun Bopugi
41 Kero onu luŋ jiinzi, uzoñnor uzuuz usi bowk Israel kulum Moises na Aroŋ, jaa: "Nde fiŋ bopugi NYEEK." 42 Kero bopugi zoñnor huglar Moises na Aroŋ, bo huglo phya oku uzoñnor. Antom ka Knzun ler olo; ka ulujl NYEEK bi ze olo. 43 Moises na Aroŋ boya zurun oku uzoñnor. 44 NYEEK lado na Moises, jak lo: 45 "Nde punun ze psoof uzoñnor zonkont njo ptoom na baka zuyaas uloŋ!" Antom ka Moises na Aroŋ limo zozee. 46 Moises jak Aroŋ: "Jekun insensaryu nu, uzu uroo usi pkak ze yolo, antom usol osar uya zuzoñnor na insensu, antom udo boko wojun usi pjour boko pjwa; zonkont NYEEK deuzar baka maakrin; ka pmaak tep pbup boko. " 47 Hunkran Aroŋ jekdun insensu ze mi Moises jakmunk lo, aziidar psoof uzoñnor bopugi. Pmaak hil o tep pbup baka. Hunkran bozudun insensu tep ptur yolo, antom Uzi hilun pjour pjwa bopugi. 48 Ze minzmun pmaak bi toomi, ka Aroŋ naz ze psoof bonhilki na bonkezki. 49 Bonkezki ze pmaak pminzpun bo o nkunt 14.600 nin pfin bonkezkunk na Kore. 50 Kero pmaak toomi, Aroŋ kak zoneeji oku uzoñnor zun Moises oonzi.