Oiimna osi un onhaloi
15
“” 1 NYEEK jak Moises: 2 ladoon na bowk Israel, ujak boko: "Zoneejr nde zosaak njounk phul nde, nde zoo ze olo, 3 ze nde pdo NYEEK wojun usi un onhaloi onturoi, osi oiit, ompalalu, ukñeelwi un onliili usi NYEEK, ot o un onhaloi turoo, o wojun zonkont phuuz, o un onhaloi nde jaki nde phul na ijuuns nde, o ze ŋnah nde, 4 ña anhounk psoond un lo onhaloi zurun NYEEK asa pot o phul uz un onhaloi osi ŋun ŋnde, onhoi nkilu 2 ŋnsi ifor indeŋlhi nag na olitru 1 osi mnsitidos; 5 Asa pot o phul olitru 1 osi pkem injaka un onhaloi osi pkem, ze kana ompalalu okal ompozi ai phul injaka un onhaloi osi wojun unturowi. 6 Ze wo psoond ompalalu okal, ukbamun ŋun ŋhaloŋi ŋnsi ŋun ŋnde ŋnsi nkilu 4 ŋnsi ifor, inagohi na mnsitidos mnsi 1,3. 7 Osi un onhoaloi osi praan wo phul olitru 1,3 osi pkem. Wojun ukñeelwi un onliili zurun NYEEK. 8 Ze nde yana owai okal osi un onhaloi osi wojun unturowi, o wojun usi ubisro o wojun usi phyooŋ usi NYEEK, 9 uka phul owai okal pkoulan na un onhaloi osi ŋun ŋnde ŋnsi nkilu 6 ŋnsi ifor inagohi na ŋnlitru 2 ŋnsi mnsitidos. 10 Usa pot o phul ŋnlitru 2 ŋnsi pkem injaka un onhaloi onturoi osi bun ukndwobi aroma ukñeeli un onliili zurun NYEEK. 11 Hunkran oun pdolo na ŋwai nkal uzuuz ŋmpalalu nkal na ŋmpalalu nkal ŋmpozŋi na ŋmpi nkal. 12 Ze mi ŋnsaam oŋi ŋi nde hulŋi, hunkran ndeun phul kana osaam oloŋ. 13 Kana ña ambukoi ze Israel aka pdo un ominzi ze aphul un onhaloi onturoi osi bun ukndwobi aroma ukñeeli un onliili osi NYEEK. 14 Ze ña aloŋo o nya o ajon na nde, na bowk nde, ze aphul un onhaloi onturoi zuroo osi bun ukndwobi aroma ukñeeli un honliili osi NYEEK, aka pdo ze mi anka ka do. 15 Oiimna ominzun o pho osi nde na boya bonzooki na nde. Oko oiimna o onhoi pduko onzañi pho osi bowk boko. Zurun NYEEK oiimna o pho zoloŋ osi nde na osi boya. 16 Oiimna ominzun na kfah kminzkun o pho osi nde na boya bonzooki na nde.17 NYEEK pot lado na Moises, jak lo: 18 Alado na bowk Israel ajak boko: "Zoneejr nde zosaak njoi phul nde, 19 ze nde de mbuk mnsi osaak bukmi nde ka phul un onhaloi osi NYEEK. 20 Ze trigu iseke isi nde tuthi, nde ka phul obulu injaka un onhaloi; injaka ifor isi trigu iseke isi kit antom phul NYEEK. 21 Ze nkil ŋikmbiŋi, bowk nde opzañ ze phul un onhaloi osi NYEEK osi trigu iseke intutohi.
Wojun usi pdo pjwa ze kpaaŋ
22 Ze nde bi tuuntoo, ndezi do ŋiimna uzuuz ŋnsi NYEEK jakŋi Moises, 23 ŋun uzuuz ŋnsi NYEEK jakŋi Moises azu nde, nde lemp,ptep zonu NYEEK zuunk lo alemp ŋun ŋminzŋi na iiñ boko uzuuz, 24 ze bopugi do pjwa ze kpaaŋ, bopugi o phya na owai okal o onhoi pturo uzuuz injaka wojun ukñeeli un onliili osi NYEEK, na ŋun ŋhaloŋi uz ŋnsi isepru na pkeme. Bosa ka phya na opi okal uz antom boya do wojun usi pjouro pjwa. 25 Nmpenen Uzi opdo wojun usi pjour pjwa uzoñnor bowk Israel uzuuz, antom bo jouro pjwa boko, ze kpaaŋ, zonkont oko un ontuuntoi, ka bo bina un onhaloi, un onhaloi onturoi osi NYEEK, na un lo onhaloi osi pjwa zurun NYEEK, zonkont un adoli ontuuntoi ze kpaaŋ. 26 Uzoñnor bowk Israel uzuuz bosi Israel na boya bonhoki ze psoof boko, bo pjouro pjwa boko, zonkont bo do pjwa uzuuz ze kpaaŋ.
27 Ze ña aloŋ do pjwa ze kpaaŋ, aphul opi ohaz onkai olur 1 injaka un onhaloi osi pjour pjwa. 28 Nmpenen Uzi opdo wojun usi pjour pjwa zonkont ña antuuntounk, zoyaar ña aminzun anjuu ze kpaaŋ zurun NYEEK, apdo wojun usi pjour pjwa antom ajouro pjwa lo. 29 Oiimna ominzun o pho osi baña uzuuz ze ña ambukoi ze Israel na ña anhoi nya anzoori ze psoof boko ze ña anjwi ze kpaaŋ. 30 Ze ña baaj pdo pjwa, ŋanun at oko nmbukno osaak o nya, aptuunto zonkont a beh NYEEK. Ña aminzi aka pfiŋo. 31 ze mi abehmunk olado NYEEK, kit oiimna lo. Apuno ze psoof bopugi; pjwa lo opduko duzu ween lo."
Ñiinz ankiti oiimna zonu Phyooŋ
32 Kero Bowk Israel hil o zolaal, bo iin ñiinz aka zooñun imul zonu ksaaudu. 33 Baña bonhinunk lo aka zooñun imul ka bo bup lo yaan zun Moises oonzi na Aroŋ, zurun uzoñnor baña uzuuz. 34 ka bozu lo ze prez zonkont ozi hil o zuupo un akai pdo. 35 Ka NYEEK jak Moises: "Ñiinz aminzun ka pkez; baña uzoñnor uzuuz ka ptapa na ilaak zojirun unaam uzoñnor." 36 Hunkran baña zoñnorun, ya na lo zojirun unaam uzoñnor, tap lo na ilaak anka kint kezi, ze mi NYEEK jakmunk Moises.
Oiimna zonkont Pñig yunu
Oiimna 22:12
37 NYEEK jak Moises 38 Alado na bowk Israel, a jak boko: “Nde pñig yun nde itiimo ze ibaz yolo; nde pñig ibaz isi iiñ boko na umarkar ibaz na mmuuz nfulamul. 39 Iñigi iminzyun o pho zurun nde, kana uyaas nde iini yolo, nde hilun plel ŋiimna NYEEK uzuuz, antom nde zal ŋolo; nde ika zal ŋun ijuuns nde jeuŋi, nin ŋnsi ikil nde jeuŋi uz ka nde ka ŋupr ŋolo. 40 hunkran ndeun plel ŋiimna ni uzuuz, nde zal ŋolo; nde phimnano ze Uzi nde. 41 Nji njoun NYEEK, Uzi nde umpuni nde zosaak Ejitu antom philun pho Uzi nde. Nji njoun NYEEK, Uzi nde."