Boisraelita jeu Pkak Ejitu
14
Uzoñnor bopugi Israel uzuuz deeŋ irim hur anka onu jiinzi. 2 Bowk Israel uzuuz bokulum Moises na Aroŋ; na uzoñnor boko uzuuz antom jaa: "Oi pe pho na mnjona ndo kez ze Ejitu, o ndo sa kez uz zolaal ondai! 3 Ezi kaa, ka NYEEK bina ndo zosaak ondai, antom keej fiŋ ndo, antom bohar ndo na bowk ndo jeko injaka bojuuk? Ozi pe pho na mnjona antom ndo kak ze Ejitu?" 4 Bo sa tep pjakro: "Nja dat nyeek bogutun nja kak ze Ejitu."5 Moises na Aroŋ bolimo zurun uzoñnor bowk Israel uminzun uzuuz. 6 Ka Joswe, awk Nuŋ na Kaleb, awk Jefone, ze 2 bonhokunk na baña bonhyakunk pten osaak ze kmeno, bopas yun boko, 7 bolado na uzoñnor uzuuz usi bowk Israel jak boko: "Osaak ndo yaunk pten, onuro maakrin. 8 Ze NYEEK liindar nja a phya na nja zosaak oniiri okmbuki mntau na pnou, aphul nja osaak ominzun. 9 Nde ika o baña bokñankunki na NYEEK; nde ika kalo baña osaak ominzun, zonkont bo pho injaka ŋun ŋnde zurun nja. Bozi pot ka pluzi; NYEEK ona nja; nde ika kalo baka!"
10 Bopugi ja uzuuz botap baka na ilaak ambokint bokez; ka ulujl NYEEK bi ze psoof boko zurun bowk Israel zoku uzoñnor. 11 NYEEK jak Moises: "Ampjau zo kil oon bañauki oun pfuptan nin, ampjau zo kil oon bozo phaz ze nji, na ŋun ŋhatatŋi ŋnsi nji doŋi ze psoof boko? 12 Njo pfiŋ baka na pmaaka; Njo ptoom na baka. Njo pzuu nliin ŋnsaak ŋyeek nkaŋi philun pempen bopugi bondaaki.
Moises zoknar Bopugi
13 Moises jak NYEEK: Bojitu o pte ze philun nu upunun bopugi bondaaki ze psoof boko, 14 ka bo pja uz baña osaak ondai, bonteuki ja woun NYEEK, woun ze psoof bopugi, bo aka iinu mnkil na mnkil, NYEEK, ka knzun nu o duzu boko,uya zurun baka ze knzoŋ knzun ze pnak na knzoŋ knzun uroo zurim. 15 Zufiŋ bopugi bondaaki zuyaas uloŋ, baña bonteuki ktiim nu opja: 16 NYEEK biinkun phya na bopugi zosaak abisroi jaa; aphul baka; onkanun ka fiŋ boko zolaal. 17 "Hunkranda, NYEEK, nji ñaun nu ujaaŋ philun nu ze mi ujakmunk: 18 NYEEK akjon pdeuz ka mnjona lo magi, a kjour baña pjwa na un ontuuntoi, ka aza khin ña antuuntoi injaka ña anhoi ze kpaaŋ, akten ŋun ŋntuuntoŋi ŋnsi boliin bopoz kdoŋi ze bowk boko ankjau ze bonzuukzuk na bonaagal. 19 Jouran bopugi pjwa boko, ze mi kfundar nu magmi, injaka mi ujourmunk boko ptep ze Ejitu anjau zunzi."
Uzi nornorun bopugi
Oiimna 1:34-40
20 Ka NYEEK seemb lo : "Nji jour baka injaka mi uñaun mi. 21 ka ze mi omi owadadi ja nji hili, sa pot o owadadi ulujl NYEEK opbi psum osaak, 22 Nin ña loŋ ze boiinz bonhinki ulujl nin na ŋun ŋhatatŋi ŋi nji doŋi ze Ejitu na olaal, ze minzmi botelmanin ŋyaas 10 ka bozi te prim ni, 23 boko bozo pneej zosaak nji bisroi boliin boko jak boko njo phul baka osaak ominzun nin ña ze baña bonfuptankunk nji bozo pneej zosaak ominzun. 24 ka ntihun nin Kaleb, ze mi akamunk oyek oloŋo, azañ ze phyaanz na nji na ujuuns lo uzuuz, njo pzwa a neej zosaak ayaaunk pten ze kmenu; kiiñ lo o phij a. 25 Bomalekita na Bokananeu bo o zunjir. Faan nde phuglo, phya zolaal ze book krik kjeenkle."
26 Antom ka NYEEK lado na Moises na Aroŋ, jak boko: 27 Nji te kulum boisraelita kulum ki nji. Ampjau zokil oon njoun pzañ ze pmindo uzoñnor baña boknkulumki nji? 28 Zuupun baka uja NYEEK jaa: Nji bisro zonkont phila nin jaa, ze mi nji temi nde ulado, hunkran njoun pdo nde. 29 Nde pkez zolaal ondai uz, na bonkaukunk ŋnlur 20 pempen bonfinoki zujaau, na bonkulumki nji ze psoof nde; 30 nji deeŋ kñen bisro jaa, njo pzu nde, nde zoo zosaak ominzun, ka ndezo pneej zossak ominzun, Kaleb, awk Jefone, na Joswe awk Nuŋ boukun pneej. 31 Bowk nde, nde jakunk bo pho bojuuk, njo pneejun baka; bo pme osaak nde behunk, 32 ka nde, nde pkez zolaal ondai. 33 Bowk nde bo pho boyafna zolaal ondai ŋnlur 40, bo pkuŋo phaŋ phaz nde, an iliks nde puz zolaal ondai. 34 Ze mi boten osaak ze kmeno kamunk ŋnu 40 zosaak nji hilunk ophul nde, bo phyaanz oraakrak ŋnlur 40 zolaal injaka baña boani pme book zolaal; bo pka olur 1 kana onu, bo pmindo zonkont pjwa boko. Hunkran njoun pjukjukun nde un onhoi pbi ze nde zoyaar nde ambirin. 35 Nji NYEEK nji ladoun un ondai. Kana ña ze uzoñnor ze baña uzuuz bombidouki na nji apkez zosaak onkaink olaal. 36 Boiinz Moises hilunk boya ten osaak ze kmeno kero bokaki bozu baña uzoñnor uzuuz ka bokulum lo, antom kar osaak ominzun. 37 Boiinz bominzkun bo pkez zurun NYEEK na pmaak phuzin. 38 Ze bonhyaukunk pten osaak, Joswe awk Nuŋ na Kaleb awk Jefone, bonkona boko bodukokun na phila.
Bopugi Peo ze Horma
39 Kero Moises zuup olado ominzun zurun bowk Israel, bo hur maakrin. 40 Bo luŋ payo duzu onkuŋ, bo jaa: " Ndouki zunzi; ndo payo phya zun NYEEK jakzunk aphul ndo. Zowadadi ndo do pjwa. 41 Ka Moises yep boko: "Ezi kaa, ka nde kit ŋiimna NYEEK? Un ominzun kaun ka ndezo phya na urun zutihun nde. 42 Nde ika payo zonkont, NYEEK azi o na nde. Bobir nde opka kpe duzu nde, 43 zonkont bomalekita na bokananeu bonhoki zurun nde, bo pfiŋ de na yeeje; zonkont nde kulwan NYEEK, ka NYEEK, azo pho na nde." 44 Ze minzmi, bo pezun payo ptoomi onkuŋ, ka ukau usi phuuz psi NYEEK na moises bozi pun ze psoof unaam uzoñnor. 45 Bomalekita, bokananeu na bonzookunk zonkun bojet baka ogut, antom ka kpe duzu boko, anjau ze Horma.