Baña bonhyaki pten osaak ze kmeno
Oiimna 1:19-33
13
NYEEK lado na Moises jak lo: 2 "Hilun boiinz boya ten osaak Kanaan ze kmenu osi njoi bi phul bowk Israel. Nde pdat nmbuli 1 ze kana kiiña, uhil boko. 3 Hunkran zolaal Paraŋ, ze mi NYEEK jakmunk Moises, hunkran Moises hildun boiinz antom bo o boyeek bowk Israel. 4 Itiim indai oun isi boko: Nnsi kiiñ Rubeŋ, Samwa awk Jakur; 5 Nnsi kiiñ Simeoŋ, Safate, awk Hori; 6 Nnsi kiiñ Juda, Kaleb awk Jefone; 7 Nnsi kiiña Isakar, Jigeal, awk Jose; 8 Nnsi kiiñ Efraiŋ, Oseyas awk Nuŋ; 9 Nnsi kiiñ Benjamiŋ, Palti, awk Rafu; 10 Nnsi kiiñ Zebuloŋ, Gadyel, awk Sodi; 11 Nnsi kiiñ Jose, phyar kiiñ Manases, Gadi, awk Susi; 12 Nnsi kiiñ Daŋ, Amyel, awk Gemali; 13 Nnsi kiiñ Aser, Setur, awk Mikael; 14 Nnsi kiiñ Naftali, Nabi, awk Vofsi; 15 Nnsi kiiña Gadi, Gewel awk Maki. 16 Indai oun itiim baña Moises hilki pten osaak ze kmeno. Oseyas awk Nuŋ Moises dulo Joswe.17 Kero Moises hil boko phya pten osaak Kanaan ze kmeno a jak baka: "Nde payoon phya zojir Negebi, nde zip ze pmair zojir Kanaan, nde ya zurun onkuŋ. 18 Nde tenun mi osaak omi, bopugi bonzooki ze olo, ze bomagi o boñigzi, an men bosumi o botiiŋzi. 19 Nde ten osaak zonuro o ohuzi, ze bozoon ze kmbaau knkuundki o khani pkuund. 20 Nde tenun osaak uz men oniiri, ka men osa kaizi, ka men oka pgof o ozi kaa. Nde kaun kziu antom nde bina mbuk mun mnsi osaak. Ŋnu ŋminzŋun ŋho ŋnu ŋnsi isepru iseke na ŋnu mhuba mnseke.
21 Hunkran boiinz bominzkun soldun, ya ten osaak ze kmenu, ptep zolaal osi Ziŋ ampjau ze Reobi, zoneeji Hamati. 22 Boya ze Negebi zojir pmair onu ze Kanaan, bojau ze Ebroŋ, zun Aimaŋ, Sesai na Talmai, bowk Anaaki, hil zooza. Ebroŋ hil o lempo ŋnlur 7 kero Zoan, ze Ejitu ozo lempo. 23 Antom ka bojau zunjir usi Eskol bofal knah mhuba, kntanoki ze punu antom boiinz 2 hilun plap kolo. Bosa pot punun romans na nfigu. 24 Bo du zun ze minzun unjir usi Eskol, zonkont knah mhuba na ksi nfigu Israel fali dolo.
Bozuup Ŋun ŋndoloŋi
Oiimna 1:26-33
25 Kero boten osaak ze kmeno ŋnu 40, bokaki, 26 bojau zun Moises na Aroŋ oonzi na uzoñnor uzuuz usi Israel ze Kades zolaal osi Paraŋ, bozuup ŋun ŋndoloŋi zuyaas, bojaaŋ baka mbuk mhuba bo biinmi mnsi Kanaan. 27 Bo jak Moises: "Ndo ya zosaak ominzun osi uhili ndo; zowadadi, o osaak oniiri ka mntau na pnou; mbuk olo momi. 28 Ka baña bonhoki ze olo boka philun; imbaau boko magi ba liinsi. Ndo sa pot iin bowk Anaaki dolo. 29 Bomalekita sa pot o ze Negebi; zojir pmair; boeteu, bojebuseu na boamoreu bo o zonkuŋ; Bokananeu o ze pñog krik, ze kwaŋ kruuz Jordoŋ."
30 Kaleb zu baña bonhoki zurun Moises bojoou, antom jaa: "Nja ya na kziu nja seh osaak ominzun o osi nja, zonkont nja hilun pka kpe duzu baka antom pseh olo." 31 Ka boiinz bonhyaki dolo jaa: Nja zi hilun phya pgut na bopugi bominzkun zonkont bo pe nja pjafun. 32 Hunkran bo behrano osaak ominzun zurun bowk israel, bo jaa: osaak ndo yaunk pten ze kmenu, oko osaak onjai ka yor baña bonhoki ze olo; baña ndo iinki ze olo bo oko baña bonjafunki. 33 Ndo sa pot iin ze olo uz boiinz bonjafunki, bowk Anaaki; ndo iino ze baka injaka ngula; hunkran boktenun ndo.