Pkez Miryaŋ
20
Ze pli pseke, uzoñnor bowk Israel uzuuz bo jau zolaal osi Jiŋ, boya duko ze Kadis; ka Miryaŋ kez zolo, antom moyo zolo.Mnzup pun ze plaak
2 Mnzup mozi hil o antom bopugi daan; ka uzoñnor bopugi huglar Moises na Aroŋ. 3 Bopugi hunso na Moises, bo jaka: "o hil pe pho na mnjona ndo kez ze mi pzaro ndo jetmunk kez zurun NYEEK! 4 Ezi kaa, ka ubi na knzoŋ bopugi NYEEK zolaal ondai, antom ndo kez na ŋnsaam ndo? 5 Ezi kaa, ka upunun ndo ze Ejitu biin zun ze ndaazi zani pnuro, zun zani pka isepru, nin mhuba, nin mun mikndwomi figera na vidis, nin romaŋ, nin mnzup antom pdaan ?" 6 Ka Moises na Aroŋ pun zun bopugi oonzi, bo sol ya zoneeji oku uzoñnor, bo jet limoo; ka ulujl NYEEK bi duzu boko. 7 NYEEK jak Moises: 8 "Jekun oŋol, uzoñun bopugi, wi na Aroŋ amaku, antom ulado na ulaak zurun boko, antom uhul bopugi mnzup bo daan uzuuz na ŋnsaam boko." 9 Ka Moises jek plaaŋra zurun NYEEK, ze mi ajakmi lo.
10 Moises na Aroŋ bozoñun bopugi zurun ulaak, ka jak boko: "Nde siinkun, nde bokñankunki: ka ndo punun mnzup zulaak wi antom phul nde?" 11 Moises deeŋ kñen lo, kob ulaak ŋhyaas 2 na oŋol; ka mnzup pun sum maakrin. Ka uzoñnor bopugi daani, na ŋnsaam boko." 12 NYEEK jak Moises na Aroŋ: " Ze mi nde anunk phaz ze nji, antom nde jaaŋ kjiinzi ni zurun bowk Israel, ndezo phya na baka zosaak osi nji jaki boko njo phul baka." 13 Uni oko mnzup mnsi Meriba, one khunso, zun bowk Israel hunsno zunk na NYEEK. Ka ajaaŋ boko kjiinzi lo.
Moises ñaun antom azip ze Edoŋ
14 Kero ka bo o ze Kadis, Moises hil baña ze nliin nnsi Edoŋ antom bo jak lo: "Hunkran pzaro nu Israel jakdun: Ume onor ombili duzu ndo uzuuz. 15 Boliin ndo bojonan ya ze Ejitu; ka ndo zoo dolo ŋnlur ŋnsumŋi. Ka bojitu nornorun ndo maakrin, ndo na boliin ndo. 16 Kero ndo du NYEEK, ka te irim ndo, ka hilan ndo oiili lo, ka o punun ndo ze Ejitu. Ndouki ze kmbaau ksi Kadis, ze klil ksi osaak nu. 17 Hutnan ndo antom ndo zip zosaak nliin; ndozo pzip nin zun ze njaarozi, nin ŋnzaanz ŋnsi mhuba; ndozo pdaan nin mnzup mnsi ilik; Ndo psol zorwa oyeek; ndozo palo phya kñen krei na kñen kmai, an ndo kint ndo toom pzip zosaak nu." 18 Ka Edoŋ seemb jak lo: "Uzo pzip zosaak ni, nki kpun na keeje pbi pgut na wi. 19 Ka bowk Israel jak lo: "Ndo pzipn zorwa oyeek. Ze ndo o ŋnsaam ndo daan mnzup nde, ndo pluk ma. Hutnan ndo antom ndo zip na izima." 20 Ka Edoŋ jak boko: "Ndezo pzip." Ka pun na ofooza phya pjikna boko na bogutun bonsumki. 21 Hunkran Edoŋ yeeldun phutun boisraelita zip zosaak lo; boisraelita palo baka antom sol ze book uloŋo.
Pkez Aroŋ
22 Baña uzuuz bosi bowk Israel pun ze Kades, ka bo ya zonkuŋ osi Hor. 23 NYEEK lado na Moises na Aroŋ zonkuŋ osi Hor ze ilil osaak osi Edoŋ: 24 "Aroŋ o pkez; azo pneej zosaak nji huli bowk Israel, zonkont nde yeel pte un nji jaki ze zun ze kndwozi Meriba. 25 Jekun Aroŋ na awk lo Eleasar, antom bo payo zonkuŋ osi Hor, 26 antom upunu Aroŋ yun lo itiimo antom utiimun awk lo Eleasar; zonkont Aroŋ opkez za." 27 Ka Moises do ze mi NYEEK jakmunk lo; Ka bo payo zonkuŋ osi Hor zurun uzoñnor bopugi Israel uzuuz. 28 Moises punun Aroŋ yun lo itiimo antom tiimun awk lo Eleasar; antom ka Aroŋ kez ze ptoomi onkuŋ; ka Moises na Eleasar bo yeto zonkuŋ. 29 Kero uzoñnor bopugi bosi Israel me ja Aroŋ kezi, boko uzuuz bo hur ŋnu 30.