Boisraelita Ka Kpe ze Bokananeu
21
Kero nnkananeu, nliin nnsi Aradi, anhoi ze Negebi zeu osaak, te Israel ze bi ze book Atariŋ, ka ya gut na boko, bup boloŋo yaan pjuuk. 2 Boisraelita do phuuz na NYEEK jaa: "Ze uzu bopugi bondaaki ze iñen ndo, ndo psok imbaau boko uzuuz." 3 NYEEK te kñahni ksi Israel, hul boko bokananeu. Ka Boisraelita toom na boko uzuuz, na imbaau boko uzuuz. Hunkran zun ze minzun dwodun Horma.Opulo osi feru
4 Ka boisraelita pun zonkuŋ osi Hor ya ze book Krik Kjeenkle, antom philun pfoyo osaak osi Edoŋ; ze book bopubi duko na kjoozi. 5 Bopugi ladar Uzi na Moises un onjoozi: Bo yeproo: "Ezi kaa, ka upunun ndo ze Ejitu, antom ndo bi kez zolaal ondai, zun zani pka opoŋ na mnzup? Ndo nor pdoh opoŋ oanink pnuro!" 6 Ka NYEEK hutun ŋmpuulo ŋhwzin ze psoof bopugi; ka ŋndum boko; Bonsumki ze bopugi Israel kez zonkont unuunk ŋmpuulo. 7 Bopugi ya ze Moises antom jak lo: " Ndo jwi, ze mi ndo kulumunk NYEEK, na wi uz; ñaunan NYEEK antom apunun ndo ŋmpuulo ŋndaaŋi." Ka Moises buur na NYEEK zonkont bopugi. 8 NYEEK jak Moises: lempun opuulo osi feru, uzu olo ze pun pnhalpi, ña opuulo dumi ka adeeŋ kil ten opuulo onzwounk ze punu, azo pkez." 9 Hunkran Moises lempdun opuulo osi bronsi antom zu olo duzu pun pnhaalpi. Zopuulo dum ña, ze aten opuulo osi bronsi, akbur pkez.
Uyaas usi Boisraelita
10 Bowk Israel diimpo book, ya zoñnor Zoboti. 11 Bopun Zoboti, ya zoñnor ze Ije-Abariŋ, zonkuŋ onjaani na Moabi, zojir pmair onuu. 12 Ka bo pun zolo, ya zoñnor zunjir usi Seredi. 13 Ka bopun zolo ya zoñnor zojir krik Arnoŋ, knhoki, zolaal buplor na osaak boamoreu; zonkont Arnoŋ oko klil ksi Moabi na boamoreu. 14 Un ominzun kaun ka boja zoliuri osi ngut ŋnsi NYEEK, Uzi ja jeink: Nji hulu Vaebe, zojir Sufa, na ŋnjir; krik ksi Arnoŋ.
15 ampjau ze knjuŋjuŋ kruuz kmpozki knhyaki anjau zontaank osi Ar, knlewoki ze klil Moabi."
16 Zolo bo sol ya ze Beer; ze plik pminzpi NYEEK jakun Moises: "Zoñnan bopugi, antom nhul boko mnzup."
17 Zokil ominzun Israel yeh khiz kndaaki: "Mnzup plik, payoon antom usum! Nde, nde yehun zonkont molo!
18 Plik psi bohuli jipi, psi boyeek bopugi haulpi na ilaaŋra boko." Bopun zolaal ominzun, sol ya ze Matana.
19 Bozip ze Matana ya ze Naalyel antom zip phya Bamoti. 20 Ze Bamoti bo sol ya zunjir usi osaak Moabi, pñog zonkuŋ osi Pisga. Ze ña o ze ptoomi zun ze nhaalzi ze si okuŋ ahilun piin olaal.
Boka Kpe duzu Syoŋ na Og
(Oiimna 2.26—3.11)
21 Israel hilan baña ze kñen Syoŋ nliin boamoreu antom jaa: 22 "Hutnan ndo, ndo zip zosaak nu; ndo zo paant ze izaanz injaroi na isi mhuba; ndo zo pdaan mnzup ilik nde; ndo phyaanz zorwa oyeek osi nliin an ndokint ndo toom pzip zosaak nu." 23 Ka Syoŋ azi hutun Israel pzip zosaak lo; akoulan bogutun lo uzuuz, antom pun phya pjik na Israel zolaal, aya ze Jaas antom ya gut na Israel. 24 Ka boisraelita fiŋ boko na yeeje, seh osaak boko ptep ze Arnoŋ ampkint pjau ze Jaboki, phya zosaak Amoŋ, zonkont klil bowk Amoŋ ka kliinsi. 25 Hunkran boisrelita sehdun imbaau iminzyun uzuuz isi boamoreu, ka bo zoo ze yolo, injaka ze Esboŋ na ŋntaank yolo uzuuz. 26 Esboŋ hil o kmbaau Syoŋ, nliin boamoreu, anhili gut na nliin nnjona nnsi Moabi, seh osaak lo uzuuz ankint jau ze krik Arnoŋ. 27 Un ominzi kaun ka bopoeta a kja: "Nde biir ze Esboŋ, kmbaau ksi Syoŋ! antom klempo kliins.
28 Zonkont uroo pun ze Hesboŋ, na oyek uroo osi kmbaau Syoŋ, antom tur kmbaau ksi Ar ksi Moabi, na boyeek bonzookunk zun ze nhaalzi ze si Arnoŋ.
29 Ai nji ñago nu, Moabi! Umeei, nde bopugi Kemos; bo hul bowk boko boiinz injaka baña bomuloki zii, na bowk nde bompili injaka bojuuk ze kñen Seoŋ nliin boamoreu.
30 Ka ndo, ndo ka kpe duzu baka. Ndo toom na Esboŋ ankint jau ze Diboŋ. Ntoom na baka ankint jau ze Nofa ze nhyazi ankint jau ze Medeba."
Kpe duzu Og nliin Basan
Oiimna 3:1-11
31 Hunkran Israel zoodun zosaak boamoreu. 32 Antom ka Moises hil baña boya ten osaak okndwoi Jazer ze kmenu, bo seh ŋnsaak boko antom punun boamoreu bonhili zoo zolo. 33 Antom bo diimpo ze book phya Basaŋ; na Og, nliin Basaŋ, apun na bogutun lo uzuuz phya pgutun ze Edrei. 34 NYEEK jak Moises: "Ika kalo baka, zonkont nji zu baka ze kñen nu, na bopugi lo uzuuz, na osaak lo: osaak lo. Dol naa injaka mi udomunk Seoŋ, nliin boamoreu, anzoori ze Esboŋ." 35 Hunkran bofiŋdun Og na bowk, na baña lo uzuuz; nin ña azi buri. boseh osaak lo uzuuz.