Balaki hilan Pdu Balaoŋ
22
Antom ka bowk Israel pun zolo, boya zoñnor zun ze nliiŋnorze zosaak Moabi, zojirun krik Jordoŋ, ze pjaan na Jeriko. 2 Balaki, nnsi Moabi, awk Jipor, iin ŋun boisraelita doŋi boamoreu uzuuz; 3 Moabi kalo bopugi boisraelita maakrin, zonkont bo sumi; aduko ze yaanz na kjoozi zonkont bowk Israel. 4 Hunkran bomoabita jakdun boyeek bomidyanita: "Ze krankanki, baña bonsumkink bo plaj baña na ŋun uzuuz ŋhoŋi ze kwaŋ nja, injaka mi oiit okal kdohmunk otun ze ksaal." Zokil ominzun Balaki awk Zipor a hilun liho bomoabita. 5 Ka hilan baña ze Balaoŋ, awk Beor, anhoi zosaak lo ze Petor, pñog ze krik Eufrates, zosaak bowk bopugi lo, kabo du lo antom jak lo: "Bopugi boloŋ punkink ze Ejitu, bosum osaak, bo zookink zurun ni. 6 Biiri, nji ñaun nu ubi zu bopugi bondaaki khuzin, zonkont bo pein pka philun; Antom nten men njo philun pgut na boko atom pdook boko zosaak, zonkont nji me pja ña uzui mnjona, a pho na mnjona; ña uzui khuzin, a pduko na khuzin."7 Hunkran boyeek bomoabita na bosi bomidyanita yadun na osaam phya plukn pkooz, bojau zun Balaoŋ oonzi, bozuupa un Balaki jaki. 8 Balaoŋ jak baka: "Nde furun zi zurimbi njo pzuup nde un NYEEK jaki nji." hunkran bohuli bomoabita dukodun na Balaoŋ. 9 Uzi bi ze Balaoŋ yep lo: "Boiinz bonhokunk na wi binoon buka?" 10 Balaoŋ seemb Uzi: "Balaki, awk Jipor nliin bomoabita, ahilun boko ze nji antom bozuupin: 11 boja, bopugi boloŋo pun ze Ejitu bo sum osaak; biiri, antom uya zu boko khuzin; men njo philun pgut na boko antom pdook boko zosaak." 12 Ka Uzi jak Balaoŋ: ika ya na baka, ka ika zu khuzin duzu bopugi bominzkun; zonkont bo o bopugi bonkaaki mnjona. 13 Balaoŋ nazo ze nfa antom jak bohuli Balaki: "Nde kakun osaak nde, zonkont NYEEK azi digzan phutni nhya na nde." 14 Hunkran bohuli bomoabita nazodun sol ya ze Balaki, jak lo: "Balaoŋ yeel pbi na ndo."
15 Ka Balaki pot hil bohuli boloŋo bompeki psum ka baña pe pmolo boko ampenpen boseke ukun, 16 bo ya ze Balaoŋ antom jak lo: Hunkran Balaki, awk Jipor jakdun: Nji ñaun nu ika jon bi pkero ni," 17 zonkont njo pzuu pña pmagpi, njo pdo ŋun uzuuz ujaki nji; biiri, njo pñaun nu, antom ubi zuin bopugi bondaaki khuzin." 18 Balaoŋ seemb bohuli Balaki antom jak boko: "Ŋanun Balaki othulin ku lo knsumki praata na mhuru, mbazi hilun pdilm olado NYEEK, Uzi nin, antom ndol un ompozi o omagi; 19 nji ñaun nde, nde duko hankri zunzi zurimbi, antom nhilun pme, ze NYEEK ka un oloŋo osi ai pzuupin." 20 Zurim uminzun, NYEEK ya ze Balaoŋ, jak lo: "Ze boiinz bominzkun bi duu, nazoon uya na boko, ka dolun un nji jaki wi udo.
Oiili NYEEK na Ohuru Balaoŋ
21 Ka Balaoŋ nazo ze nfa lis, bamun ohuru lo ohaz, sol na bohuli bosi Moabi. 22 Uzi deuzi, ze me Balaoŋ solunk na boko; ka Oiili NYEEK naz ze book antom ptuunk lo aki kzip. Ka Balaoŋ dapo ohuru lo ohaz, antom diimpo ze book sol na botihun lo 2. 23 Ohuru ohaz ominzun iin Oiili NYEEK naz na keej ze kñene; hunkran ohuru palodun ze book, ya ze ksaal. Balaoŋ kob ohuru pkakun olo ze book. 24 Ka Oiili NYEEK ya naz ze book zun ze minzun, ze psoof ŋnzaanz ŋnsi mhuba, na ŋmur ze ŋnjir 2 uzuuz. 25 Kero ohuru ohaz ominzun iin oiili NYEEK, paant ñog ze kwaŋ omur, ankint miblan pzim Balaoŋ na omur. Hunkran Balaoŋ potun kob olo. 26 Antom ka Oiili NYEEK pot ya zurun, ya naz zun zaani pka mi woi palo zojir orei nin zojir omai. 27 Kero ohuru ohaz ominzun iin Oiili NYEEK, sa jet ŋup zeu Balaoŋ; ka Balaoŋ deuz antom kob ohuru na plaŋra lo. 28 Ka NYEEK haul ohuru lo ohazun mntuum, antom ka ohuru jak Balaoŋ: " Ye nji dolun wi onkai ukobin ŋhyaas 3? 29 Balaoŋ seemb ohuru: Zonkont ubehin. Ze nji hil bup keej ze kñene nji hil o pfiŋu!" 30 Antom ohuru yep Balaoŋ: "Ka mbazi o ohuru nu ukdapoi ze nkil ŋminzŋan, anjau hankri? Hunkran nji hagzodun pdolu?" Ka Balaoŋ seemb ohuru jak olo" Ah."
31 Antom ka NYEEK haul Balaoŋ kil; ka iin Oiili NYEEK konaz ze book, na keej ze kñene. Ka alimo juuz na mnkil zozee. 32 Oiili NYEEK yep lo yezi kaa, ka ukob ohuru nu ankint ka ŋyaas 3? Nji pun bi ptuunku book, zonkont wyaas woonbink bozi o na mnjona zurun ni, 33 ohuru iin ni ŋhyaas 3, palo ni, nji hil o pfiŋu, antom phutun ohuru na phila." 34 Ka Balaoŋ jak Oiili NYEEK: Nji juwi, mbazi hil me pja wo ze book antom pneeni pzip. Ze krankanki, wampjeu nhya uyaas undaawi, njo psol pkak mez." 35 Oiili NYEEK jak Balaoŋ: Solun na boiinz bondaaki, wo plado ze un nji jaki wi antom ulado." Hunkran Balaoŋ soldun na boiinz bominzkun bohuli bosi Balaki.
36 Kero Balaki te Balaoŋ ze bi, ka pun phya pjik na lo ze kmbaau ksi Arnoŋ, kmbaau knlilki na osaak okndwoi Moabi. 37 Balaki yep Balaoŋ: "Ka mbazi hilan pduu? Ezi kaa, ka uzi bi zuyaas useke? Uzi hikran ja nji hilun pzuu pña maakrin?" 38 Balaoŋ seemb Balaki:Njii zurun nu; ze krank nji hilun plado un oloŋo? Olado Uzi zui ze mntuum ni olnjoun plado." 39 Balaoŋ sol na Balaki ya ze kmbaau ksi kiryate-Husote. 40 Ka Balaki fiŋ ŋiit nkal na ŋmpalalu ŋhaz; antom hilan Balaki na bohuli bonhili o na lo. 41 Kero onu luŋ jiinzi, ka Balaki jek Balaoŋ, payo na lo ze ptoomi okuŋ osi Bamote-Baal; zolo ahilun pten bopugi Israel zojir oloŋo.