Balaoŋ zu bopugi mnjona wyas useke
23
Ka Balaoŋ jak Balaki: "Lempan ikak 7, ubamni ŋwai nkal 7 na ŋmpalalu nkal 7 zunzi." 2 Balaki do injaka mi Balaoŋ jakmunk lo; boko 2 bodo wojun owai okal na ompalalu okal duzu kana pkak. 3 Balaoŋ pot jak Balaki: Dukoon ze kwaŋ wojun nu unturowi, nji, njo psol; NYEEK hilun bi pjik na nji, un a jaaŋi nji njo pzuupu a. Ka Balaoŋ sol ya payo onkuŋ. 4 Kero Uzi jik na lo, Balaoŋ jak Uzi: "Nji lemp ikak 7 kana pkak nji do wojun owai okal na ompalalu okal." 5 Ka NYEEK zu olado ze mntuum Balaoŋ antom jak lo: Yan ze Balaki antom uzuup lo khili kndaaki." 6 Kero Balaoŋ kak ze Balaki a iin na ze kwaŋ wojun lo unturowi na bohuli uzuuz bosi bomoabita. 7 Ka Balaoŋ lado, olado ondai: Balaki nliin nnsi Moabi, zuin pbiin Sirya; ze nkuŋ ŋnsi pmair onuu, a hilan pduin antom jakin: biiri, a jakin ñagonan uladar bopugi Israel khuzin. Hunkranda, ladaran Bowk Jako khuzin.8 Njo pdo pjaan ampzu khuzin ze ña Uzi zui mnjona? Njo pdo pjaan amplado khuzin ze ña NYEEK ani pladar khuzin?
9 Ze duzu nkuŋ ilaak, nji iin Israel ze nkuŋ ŋmpozŋi nji iin Israel: Bo zoo bonkonaboko antom iin ja bo diit na bopugi boloŋo.
10 Noonzi fin iiñ Jako insumhi injaka pihi; ibundar pempen ŋyaas 4 ze iiñ Israel? Njo pkez, baña bonjaalki, otoomi ni o pho injaka osi lo.
“” 11 Balaki yep Balaoŋ: “ye udolink nji? Nji hilan pduu uzu khuzin ze bobir ni, ka uzu boko ze mnjona.” 12 Ka Balaoŋ seemb lo: "Mbazi ka plado ze un NYEEK zui ze mntuum ni antom nlado?
Balaoŋ zu mnjona ze Israel wyaas upugzan
13 Ka Balaki jak Balaoŋ: Nji ñaun nu" antom ubi na nji nja ya zojir oloŋo, zun woi piin bopugi; wo piin zojir ompei pñog ze boko uzo phin baka uzuuz; antom uhilun pzu khuzin boko zolo." 14 Balaki ya na Balaoŋ ze ksaal ksi Sofiŋ, ze ptoomi onkuŋ okndwoi Pisga; alemp ikak 7, antom do wojun na owai okal na ompalalu okal ze kana pkak. 15 Balaoŋ jak Balaki: “Dukoon zunzi ze kwaŋ ŋun nu ŋhaloŋi ŋnsi wojun unturowi, njo phya pjik na NYEEK duunun. ” 16 Kero ka NYEEK jik na Balaoŋ azu olado lo ze mntuum lo, jak lo: “Kakun ze Balaki, uzuup lo nkuni kndaaki.” 17 Hunkran akakdun zun Balaki oonzi, iin lo ka naz zun wojun unturowi, alo na bohuli bomoabita. Balaki yep lo: Oye “NYEEK jakun?” 18 Balaoŋ zuup olado ondai jaa: Balaki biiri, awk Jipor, antom usiink un njoi pja.
19 “Uzi bozi o injaka ñiinz aknjubi; bozi oko ñiinz, ŋnzaafu kzimlani. okil oon Uzi jakun bo pdo unu, ka bozi dola?
Banka ja bo pdo unu, ba kdola.
20 Nji seh nkuni antom pzu mnjona ze boko; njo pzu baka mnjona, mbazi hilun psokma.
21 Mbazi iin pjwa ze Israel, ka mbazi iin kjoozi ze Jako. NYEEK, Uzi lo o na yaa,
ka bopugi ka kiik ze NYEEK oun nliin boko.
22 Uzi punun baka ze Ejitu; ŋnfooz boko oko injaka oraapl.
23 Pkooz pozi ka philun ze Jako; nin pkalum pozi ka philun zojir Israel. Ptep ze krankanki, baña opduka lado zojir Jako na Israel: Tenun un Uzi doli!
24 Bopugi bominzkun opnazo injaka olyoŋ ohaz; antom naz injaka olyoŋ oiinz, o za kpiinz ankint kde ogoŋar ogoŋari antom kdaan pñaak ngoŋar ofiŋi.
25 Ka Balaki jak Balaoŋ: ze wampo philun pzu bopugi boisraelita khuzin, ika zu baka mnjona uz!” 26 Ka Balaoŋ seemb Balaki antom jaa: “Mbazi zuupu ja nji ka pdo ze un NYEEK jaki nji? ” 27 Balaki jak Balaoŋ: “Biir antom nhya na wi zun ze loŋo, ohilun pho Uzi o phutnu uladar boko khuzin zun ze minzun.” 28 Hunkran Balaki yadun na balaoŋ, bo payo duzu onkuŋ Peor, onteni zojir olaal. 29 Balaoŋ jak Balaki: lempan zunzi ikak 7 antom ubina ŋwai nkal 7 na ŋmpi 7. 30 Balaki do injaka mi Balaoŋ jakmunk lo, ka a do wojun na owai okal na ompalalu okal ze kana pkak.