Balaoŋ zu mnjona ze Israel uyaas wajzan
24
Ze mi Balaoŋ iimunk ja NYEEK jeu pzu mnjona ze Israel, azi ya phyeenk ze mi a hilunk o doli, ka hugl mnkil lo ten zolaal. 2 Kero Balaoŋ deeŋ kil lo, a iin boisraelita ze mi boomi ze iiñ boko, ka Oyek Uzi bi duzu lo. 3 Balaoŋ zuup olado lo antom jaa: Olado Balaoŋ awk Beor, "olado osi ñiinz kil hauloki;4 Ñantei olado Uzi a plado, na anhini ozaafi ombili ze Uzi unkawi philun uzuuz; ajet injaka ña knzaafihi na kil knhauloki.
5 Jako nku nu nuroo injaka zun woonzi uz, aan Israel.
6 Ze mi injir haulomunk, injaka ŋnjardiŋ ze kwaŋ irik, injaka bun usi NYEEK laalwi, injaka bun usi mnsedru ze kwaŋ mnzup.
7 Mnzup mnsumi ze bulunk ze ŋwado boko, ŋnsepe boko oplaalo zun ze ñoizi. Nliin boko ope Agagi pho nyeek; pliin lo o pho phyeek.
8 Uzi punun baka ze Ejitu; uhul baka ofooza injaka orapl okal. Bo pde bopugi bombidouki na boko, bo pkit imoon boko, bo pyu baka na insaaŋen.
9 Ze bo phyooŋ, bo pho injaka olyoŋ onlimoi, o injaka olyoŋ ohaz. Noonzi opkazi pdaŋ olo? Bonzuki wi mnjona, bo phulo mnjona, bonzuki wi khuzin bo pzwo khuzin.
10 Balaki deuzar Balaoŋ, kobr lo iñene, jak lo: Nji duu ubi zu khuzin duzu bobirni, ka wo zu boko mnjona ŋyaas 3. 11 Ze krankanki solun uya ze mez nu. Nji hil ja njo pzuu pña; ka NYEEK neenu pseh pña pminzpun. 12 Ka Balaoŋ jak Balaki: "Nji ŋaj baña uhilkunk ze nji . 13 Ŋanun Balaki hulin praata na mhuru ka mnsum ku, praata na mhuru, mbazo philun pzipzipun un NYEEK hili nji antom ndo. Mbazi hilun plemp mnjona na khuzin ze ween ni. Un NYEEK jaki ol njoun pja. 14 Ze krankanki njo pkak ze bopugi ni; ka biir antom nzuupu ŋun boisraelita oi pdo bopugi nu ze ŋnu ŋi kmbiŋi zurun.
Utezan wakna usi Balaoŋ
15 Hunkran atezanu olado ondai: "Balaoŋ awk Beor, a ze lado; olado ñiinz hilni pten na mnjona,
16 Ñantei olado Uzi aplado, ñankai kme kmbiki ze Uzi unhwobi duzu ŋun uzuuz, ña anhini ozaafi ombili ze Uzi unkabi philun uzuuz, ajet injaka ña knzaafihi na kil knhauloki.
17
Njo bi phina, ka mbaza krankankika; njo ptena ka mbazo pñog ze kwaŋ lo; ohuzu oloŋ pun ze Jako nliin Israel o pka kpe duzu Moabe, aptoom na bowk seti.
18 Apka kpe duzu Edoŋ, Seir nmbir lo apho nnsi lo, Israel opzañ ze pliins.
19 Ña anhoi pun ze kiiñ Jako a pka kpe ze baña uzuuz, abi pfiŋ bonduklokunk zimbaau.
20 Balaoŋ iin Bomalekita, a hul ktezan kloŋo a jaa: Amaleki oun oras oseke ze ŋrasa uzuuz; zotoomi boko o bi pmei onzañi.
21 Antom ka aiin Bokenita a hul ktezan kndaaki: Ku nde liinsi; uzu uyeeŋu nu duzu onkuŋ osi ulaak.
22 Ka nde Bokenita, nde ptoom zoyaar Asur anhya na nde pjuuk.
23 A zañ ze ktezan lo, a jaa: Ai! Noonzi o phil zoyaar Uzi an lemp un ominzi?
24 Boiinz o pbi ze ŋmpur ŋnsi ifaar isi kitiŋ: Bo pka kpe ze Asur na Eber, ka boko uz bo pmei.
25 Hunkran Balaoŋ nazodun kak mez; ka Balaki sa sol ze book lo uz.